今日喺洗衣店返工，遇到一件超委屈嘅事，決定還原事實講出嚟。

我係自助洗衣店清潔員，今日發現乾衣機入面，有兩條街頭理髮舖嘅圍巾，機內滿佈大量頭髮碎同毛屑，搞到其他客人無法使用，嚴重影響他人。 呢間理髮舖不時會嚟我度洗毛巾、烘干物品，次次都唔會預先清理頭髮碎，長期亂用同霸用我哋舖頭嘅洗衣機同乾衣機。 呢個情況好多熟客都親眼見到，亦多次向我投訴。
我好心將圍巾送返畀佢哋，心平氣和向「一號老闆」提醒，希望佢哋日後清理好毛碎先再用機，用完自行清潔，唔好影響其他顧客。 我全程態度良好，冇鬧人、冇挑釁，點知舖內的「二號老闆」突然黑面，走嚟向我發晦氣，仲惡言相向： 「污糟就應該由你負責清潔，你冇資格話係我哋造成，仲質問我究竟想唔想做呢份工」， 仲揚言會打電話畀我老闆投訴我，出言恐嚇。
我鋪頭附近一帶嘅美容院、按摩院、其他理髮舖，全部都好有公德心。 在我隔離的理髮店甚至見我唔係度就會幫我做埋清潔，大家都會自行清理毛屑雜物先至用機，唯獨呢間理髮舖蠻不講理、死唔認錯、只懂推卸責任。 今次乾衣機入面，起碼一半以上頭髮碎都係佢哋造成，鐵證擺喺眼前仍然否認、仲要惡人先告狀。

我只係盡責、好心提醒，換來就只有無理指責同恐嚇。 公用設施唔係私人專用，做生意應有基本公德同承擔。 做錯事唔好搵基層打工仔發洩，更唔好濫用投訴逼人。 等屯門街坊認清楚呢間舖頭嘅為人。