反修例運動｜「正向活動」去與不去？

全文：https://tinyurl.com/4wu5jkbc

近日陸續有反修例運動被捕人士，收到警方電話，通知 4.28 會舉辦「正向活動」，張敬軒會出席。大家收到電話嘅講法都有少少唔同，有啲就聽到話分享會嘅內容係「關於國家安全意識及發展大局」，有人說法係「張敬軒嘅成功人士分享會」，有指活動「有明星睇、有演唱會飛抽」、亦會提供升學就業資訊。

去與不去，唔同人有唔同睇法。《集誌社》同幾位收到電話嘅被捕者傾過。C（化名）承認而家知道有機會結案，係有興趣參與，佢話「如果真係去完可以 case close 嘅話，咁梗係想啦，因為 close 咗就唔使煩，始終你一日未 close，佢一日都可以告你」。不過佢都覺得當局提供「更生機會」嘅講法「有少少奇怪」，因為一般「坐完監先叫更生人士」。

被捕者 F (化名）就有另一個諗法。佢話收到電話後，問警方「係咪參加咗個活動就唔會被檢控」，但對方好清晰答「唔係。係 case by case，唔係你案件主管所以答唔到」。

F 話希望曾經被捕人士，唔好誤會參與 4.28 嗰日嘅活動就會被撤控，他又話拒絕參與活動後，警方都話佢可選擇留低聯絡方法畀主辦單位接觸，又引述對方提到「如果想返大陸飲飲食食，我哋都幫到你」。

曾參與 2019 年區議會選舉嘅馮德森，琴日拍片講返收到電話經歷，佢形容對方「冇兇你話一定要參加，如果唔係我會告你」、又引述對方指「有啲年輕人可能被捕之後，唔知返唔返到大陸或者做唔做到公務員，佢喺講座會話你聽」。馮講到對方有問佢有冇意願參加活動，佢回覆話「我而家好愛國，同埋都好正向」，表示無意參與。佢話點解要拍片交代，係因為覺得「大家太恐慌太驚」，強調「唔係唔拒絕得」，亦認為無論去唔去參與都係個人選擇，大家應該尊重。