對唔住 令你地失望了

屋企本身就唔有錢
得我老豆返工一個月的兩萬令
但係依然會盡可能比最好嘅我
補習補幾錢補幾多照比
喺佢地眼中 我會入到u
但對唔住 我諗真係唔得了
點解我咁蠢
要你地一次又一次咁失望

之前仲天真咁樣認為
可以考好啲 令你地唔使再擔心我
我好想有能力可以比返最好嘅你地
我細個嘅夢想
係買層樓 比屋企人好多錢 可以生活無憂
唔需要再因為價錢委屈自己
但 還是太天真了

其實都辜負左學校老師
有好幾個都覺得我做到 對我有信心
其中一科因為我底好差 驚fail
study leave嗰陣成日係咁問佢
有係咁做好多嘢比佢改 希望可以進步
煩左佢幾個月 佢都毫無怨言 不辭勞苦咁教我
對我有期望 但睇黎 又要辜負了

我嘅補習老師們
你地對我有信心 睇到我進步
但係冇諗過我dse先失手
仲要差勁多 跌1-2grade
我都冇面同你地講...

其實仲有好多
例如我啲朋友
同我一齊努力
一齊學 互相鼓勵
明明相約好一齊入u
但對唔住 我要失約了
希望你地大學生涯愉快

我呢一刻唔知仲可以講咩
也許我嘅出現係為世界湊人數
我根本唔值得任何嘢
如果我冇出世
所有嘢 應該會更加好吧？

頂 最後都係忍唔住睇到喊😭
我會努力考埋佢的了
就算唔得 我努力過盡力過就好

點解隔左咁多個鐘仲越黎越多人睇QAQ
btw 雖然我只係like cm
冇逐個逐個覆
但我真係每條都認真睇同諗的！
有好多人打好多字鼓勵我
其實我會驚唔覆淨係like msg會好似唔係好禮貌的🥹
我明白且吸收到你地講嘅嘢
但我唔識覆 而且好難個個覆 所以like msg🥹
抱歉冇得一個個覆🥹🙏🏻
但心意我絕對是收到曬的！
謝謝你們🥹😭🙏🏻

唔重要
但
點解咁多人以為我係仔仔/細佬😭
我係妹妹黎...🥹可以叫啊妹嘻嘻🫰🏻

Hello 👋 妹妹 🫶

每條cm我都有認真睇完的！
謝謝你們！！😭😭🫶🏻🤍
睇到眼濕濕
但係喺車度我係唔會喊的😼
其實真係冇諗過會咁多人睇
本身諗住自己呻下自己就算
但 都係謝謝你們！
我覺得呢度好溫暖😭🫂

你識得知恩圖報，反省自己，已經叻過好多人。真心，唔係安慰你。感恩，代表你會遇貴人，貴人願意幫助你；反省，代表你唔會原地踏步，會改善自己。

考試成績當然會有立刻嘅影響，話完全無係呃你嘅。生活係唔易，就算讀唔讀到大學，搵食都唔易。而成績差的確可能行啲冤枉路。輕則repeat，再唔係就assoc/dip再升學，或者直接做嘢，有好多條路。（無話非讀書不可的）

但對於你最希望嘅「報答親恩」同「自我價值」呢，其實呢個影響有限。我一直都係成績好的，一直讀到博士，長期都內疚唔太夠錢供養父母。我細佬就無讀書做裝修，好早就可以照顧家人。我就非常自豪佢裝修技術了得，真男人技能。

有好多人仗著小聰明，讀書一帆風順，但一直讀落去都唔知自己做緊乜，到了幾十歲才苦苦掙扎，那是先甜後苦。考試錯折令自己提早思考人生，反而少了人生的冤枉路，可以是先苦後甜。

真朋友的話，入咩U都咁friend。我34歲了，去埋外國，都仲同中同好close，大家讀乜都有。人生一定會有自己闖蕩嘅路。

而且你都未考完～ 既然你都知有咁多人支持你，點可以未考完就放棄。屢敗屢戰，遇強越強先係！加油，戰鬥吧！撐你！

唔會，bro，我都同你講吓我嘅情況吖~

屋企本身唔有錢，我都係，話補習佢哋都會好肯去畀，盡曬力畀到佢哋可以畀嘅嘢我，喺佢哋眼中，我係一定會入U，唔單止係因為初中要成績唔錯，佢哋更加覺得我一個數學攞過100嘅人入U點都唔會難，但事實上我攞100過一次小學二年級，對一個發過光嘅我，而家我已經發唔出

細細個諗過自己將來可以做嗰啲咩，有醫生又律師，而家？做條撚咩，書又讀唔好，人又衰，口又臭

最衰係咩呀，我F.4以嚟加入咗一個school team，唔單止到教練，仲有其他嗰五個隊友，仲有2個lab tech，佢哋都喺我求救嘅時候都好用心咁幫我，喺我啲三年嘅高中生活都一直陪住我。對唔住呀教練、lab tech同埋我嘅五個好隊友，我辜負咗你哋

我嘅朋友....受過你哋咁多嘅幫助，包括我兩次踢波斷骨，都夾$扯我去醫院，夠返我呢個傻仔，希望你哋可以享受到你哋豐富而快樂嘅u life

我嘅親戚們，我其實真係好羨慕你哋有一個可以跳咗碩士學位直接讀phd嘅女、一個讀到港大然後飛去外國做交換生嘅女、一個中五直接去英國讀law嘅仔，成為咗我學校歷史上第一個冇畢業嘅人，我係家族嘅恥辱，對唔住

你好同學：
睇住你寫嘅每一隻字，感受到你嘅沈重同壓力，同時你嘅痛苦係因為你係一個會為人著想、心入面會裝住身邊每一個人嘅人🫂

希望你可以緩一緩，去睇睇：

關於屋企：
你爸爸辛苦做嘢供你讀書，係佢作為父親出於對你嘅愛而選擇嘅擔當。呢份愛係一份禮物，而唔係債務。家人內心最深處嘅願望，其實唔係要你買大屋回報佢哋，而係想見到自己個仔女過得平安、快樂。

關於老師同朋友：
老師嘅教導同朋友嘅同行，佢哋對你有信心，係因為睇到你個人嘅本質，而呢份本質係唔會因為一場考試嘅等級而改變。你都冇失約，你只係行咗一條同原定計劃唔同嘅路。

關於你自己：
你話你「唔值得擁有任何嘢」，但事實上，你呢份想為屋企人付出、想對得住老師嘅心，已經係呢個世界最珍貴嘅嘢。世界唔缺「湊人數」嘅人，但好缺好似你咁識得感恩嘅人。

呢場考試，只係人生入面一個旅程站，但絕對唔係終點。請容許自己唔開心、容許自己只係暫時做唔到而唔係永遠做唔到。

你都唔需要變到好叻好勁，但你依然係呢個屋企、呢個世界珍貴嘅一分子。

慢慢嚟，先好好休息🫂

香港教育就係俾人感覺DSE考衰咗就一定要收隊乞食。

因為我屋企都唔係啲咩有錢可以供我讀書嘅屋企，亦都未必係支持我讀書嘅屋企。本身喺中學predict嘅分數係可以入大學，最後因為嗰陣時自己嘅唔成熟，因為感情影響咗自己最後DSE成績。

但係DSE唔代表一切如果你真係有打算繼續讀書，如果真係好差，都唔使好灰心，喺香港嘅話政府會借錢俾我哋讀書，因為我都係慢慢係繼續讀書嘅過程先肯定自己會想入大學，但係喺過程入邊我自己經歷緊好多嘢導致我而家本身係讀基礎文憑上高級文憑。高級文憑嘅時候坦白GPA唔靚仔，而且因為就業機會太多競爭，都會想偏向繼續返工再儲啲錢繼續讀書。明白選擇讀書會有好多考量，無論家庭背景、金錢問題、甚至DSE成績，但係最緊要係俾心機考埋個DSE，唔好俾暫時嘅情緒影響咗你努力咗嘅表現。

而家仲考緊DSE唔好諗咁多住，盡力考埋其他先，出成績嘅時候再諗都未遲～因為我都係一路行一路諗，我相信我做得到你都可以做到！！！！

加油，睇到樓主已經好生性努力去讀，臨場失手冇人想，我都唔會話公開考試冇所謂、唔使介意，因為衰咗唔得你就真係要花多1年時間retake or考慮其他出路，但以我人生至今經驗同感受，如果將時間線拉遠少少，真係會發現一場公開試唔係你呢刻想像中嘅天咁大，或者話以後人生中應該仲有其他挑戰考驗等住你。

只要你keep住之前努力學習嘅心態，絕對無嘢可以打擊到你，另外都唔使太憂慮其他人嘅諗法，明白父母師長朋輩都對你好好，你好想用成績報答佢哋，但你嘅人生係屬於你自己，你只需要向自己好好交代就可以，應承喺度留言嘅大家唔好放棄考試，繼續認真準備完成埋佢，搏盡先可以無悔。

人生亦好奇妙，你一定會搵到只屬於你自己嘅出口同美滿未來，其實見你整篇文字都係一個好負責任嘅學生、一個合格嘅準大人，所以我其實又唔太擔心你，只係想提醒吓唔好畀太大壓力自己：見字飲水，今晚好好整理思緒+瞓一覺休息，聽朝起身再嚟過就Ok ，支持你😁

雖然好老土，但你嘅價值從來都唔係建基於DSE成績。

你屋企人比你補習，老師不辭勞苦教你，朋友同你一齊努力，係因為佢地愛你呢個人，唔係愛你張成績表。你爸媽想你讀書，係因為佢地希望你將來過得好啲，唔係要你用成績嚟證明自己值得被愛。

你話自己蠢、辜負人、唔值得，但我睇到嘅係一個好努力、好有心、好愛屋企人嘅人。你會驚fail而不斷問老師，你會珍惜同朋友嘅約定，你會諗住將來買樓比屋企人。

呢啲全部都證明你係一個有情有義、肯為人著想嘅人。

DSE失手真係好難受，我明白。但呢個唔係結局，只係其中一條路行唔通。就算最後路途遙遠，其實好多人都唔係一take入U，最後都過得好好。

而家最緊要係完成剩低嘅考試（你已經行到呢度，唔好放棄），考完之後好好休息、同信任嘅人傾訴，同去玩正散下心，成績出咗之後，先再慢慢諗下一步點行。

你唔係嚟湊人數，你係獨一無二嘅人。

好好照顧自己，就係對愛你嘅人嘅最好回應。

某程度上咁講，喺香港讀大學有少少不切實際

依家全球周圍都大學生，但其實大學生嘅負債都比較較高嘅主流原因係「學費太貴」

我識好多人佢哋讀大學，如果冇屋企人支持嘅情況下自己一個人工自己讀大學基本上九成要正政府錢仲要讀到上去之後未必有機會咁快還得晒

同埋當你學歷越高，你做嘅嘢就會發現更加唔成正比投放嘅時間越多，但係所獲得嘅嘢就越少

成為管理層嘅時候，你就會發現原來做最低層嗰啲搵得多過自己

呢個社會唔係教你去用學歷搵錢，而係教你去點樣用最少嘅資源搵到最多嘅錢

所有嘢都係一個固定嘅因素情況下，點樣去善用身邊嘅資源去提升自己

學歷只係一個入場券，或者佢只係多一個選擇

好多人讀完大學出嚟揸巴士，亦都有人讀完大學之後我為咗自己嘅夢想同目標而離開咗大學嘅層面工作

成績只係一個過渡之後話俾你知喺呢間學校裏面或者喺香港嘅教育制度啱唔啱你代表唔到你嘅能力準則

加油啊！支持你

完全感受到你嗰種辜負左人地，白費左努力嘅痛，可能你嘅補習老師同屋企人都同樣經歷緊，佢地會覺得係自己嘅錯。

「如果當初俾你讀間好 D 嘅中學……」「如果當初冇叫你狂操 PP，如果當初教多你一 D concept，如果當初 tip 好 D 好嘅題型」

你永遠唔知上天安排左一條咩路俾你。

當初個天咁樣待薄自己，其實係為左令你有「將來獲得另一 D 野」嘅資格。
幾年後甚至十年後睇番，你先會明白原來所有野都係有原因。

所有失手，都有意義。可能，炒數學係救緊你。
可能，另一個平衡宇宙中，無炒數學而入到大學想讀嘅科，你嗰 4 年會讀得超級辛苦，甚至 Year 4 先 Quit U。你永遠唔知道。

五六年後你回頭睇番，就會明我講緊 D 咩。

當年樓市高位買左樓嘅人，樓價下跌，瞬間就變成負資產了。薈蕎呢個龍床盤，跌左超過 50%。

跟住安排好嘅路，好好走就好，用心走就好，盡左力就好。

https://youtu.be/e8VQvOTGyzA

一日未出成績，一日都仲有希望，就算出咗成績，都唔等於冇望！

除非你知道自己想入神科， 否則入大學係好多機會， 唔一定要從DSE考試途徑。

90後ADHD叔叔無家境，仲要照顧細佬妹，當年都係中三扒到中五會考，10幾萬考生。retake都英文唔合格重讀中六，連升中七考AL既資格都無。 挨到會考英文合格再考AL，最後AL係無大學收讀AD再retake AL。即係考左3次CE+2次AL。

當年cityu nonjupas psychology in完唔收都好灰，覺得AD衝過3爆4都係好似無用咁。最後挨到係BU畢業，2017讀Msc。

因為叔叔細個讀文商科關係，係工作上好多機會都發展唔到，所以今年再讀夜校考phy chem bio。即係CEx3 ALx2 DSEx1😂😂 我咁7都讀到Master，相信你都可以💪🏻💪🏻

人生好似多元宇宙咁，有好多唔同結局， 如果你而家選擇放棄，將來就會冇咗好多機會。

而家大學學額比當年多好多，所以你肯挨就一定得🔥🔥🔥 加油2026考生

諗下個問題係咩先

因為屋企冇錢
所以寄予厚望想你一個窮二代可以逆轉成個家族
你嘅終極目標係想搵錢，搵多啲錢
而你為咗實現呢個目標，選擇嘅方式係考好DSE入U

但係淨係入到U係做唔到呢個目標架，要狀元級入神科先得
大把U讀水泡科乞食科出到黎咪又係萬零兩萬一個月
所以DSE炒咗入唔到U都未係真正令你實現唔到你原本個目標：
「搵多啲錢逆轉家族貧窮」

你需要嘅係直接去學點樣賺錢，而唔係為咗搵錢走去死背死溫啲應試教育課題

建議嘅係無論人工高低都好，搵份工先，你現階段最缺嘅係原始累積
死慳死抵儲返兩三年錢，期間睇下啲類似富爸爸窮爸爸之類嘅書
開發下自己財商，窮人家庭出世最缺係呢樣， 因為你上一代完全冇呢啲概念，你應該都未接觸過

要逆轉成個家族嘅世代貧窮你預至少十~二十年，而家set個目標比自己
30~40歲再諗失敗都未遲
炒個DSE 真係好小事

我大你一輩，係A Level 時代嘅人。當年考A Level ，響一科無可能炒嘅科目中炒咗（有查卷但上訴被駁回，嗰個時代查卷只話畀你知結果但唔會畀你睇番份自己份卷衰乜，所以我極之懷疑有人整唔見我份卷），結果只入到間自己唔鍾意嘅大學，可以話好彩，但自己成個暑假唔開心，但當大學一年級時，見到好多前輩放工返大學讀PT ，突然醒悟就算考試炒咗，將來仲有大把機會要讀書。後來出來社會做嘢，先發現其實無乜人care 你會考／DSE 考成點，花幾多年先攞到個學位番嚟，甚至覺得細個時學校社會講到會考／DSE 決定你人生，係一個坤你嘅一個大話。我嗰個時代已經係咁，你哋呢個時代，更加唔好信呢D 大話。

唔好叫你唔努力學習，但只是自己唔好為錯誤扭曲嘅價值觀去讀書，先對得住你屋企人同教過你嘅老師們

就好似同初戀失戀嘅人講其實冇乜嘢一樣冇意義
所以唔講大道理
因為對呢刻嘅你嚟講
DSE就係你全世界
當個世界突然冧左
好多人都會因為咁而質疑自己生存意義
所以你現在還好嗎?

老豆關心嘅往往唔係「讀好書」
而係想你擁有「更好嘅人生」
有時失手都唔係你想
可能就係咁啱少咁啲運氣

所以好想同你講
從你嘅文字已經感受到你有盡力過
無論老豆定呢度嘅人都知道的

除咗呢度會有人陪你
如果自己一個定唔到落嚟
都希望你可以試吓打比佢哋

2389 2222 香港撒瑪利亞防止自殺會
2896 0000 撒瑪利亞會
2382 0000生命熱線
18288 明愛向晴軒
18111 情緒通

有時真正嘅辜負可能唔係呢樣
亦有啲人係第二年retake先爆出嚟
因為第一次對佢哋講係熟集遊戲規則
同埋適應DSE期間嘅心理壓力

唞吓先
其他嘅嘢唔急

每一個人由佢出生開始就已經有佢存在嘅意義，俾多啲信心自己🫵🏻🐷✨️✨️✨️✨️

其實Dse只是人生中的一個小部分，你諗下你宜家都係十幾歲咋嘛，只係啱啱開始認識呢一個世界，我明白你可能會覺得好似辜負咗其他人對你嘅期望，明白人生唔係往往都係順順利利，但是轉個角度去想，或許你出到來嘅成績很好呢🐷👍🏻✨️✨️✨️✨️

你屋企人俾咗最好嘅嘢你即係代表佢哋信任你，同時亦都愛你，從呢一點你要知道即使你未來是如何也好，我相信他們也會站在你那一邊支持你。未來是好是壞我哋難以預測，但是在現在這刻我們也能夠改變未來🫢🐷👍🏻

所以加油，唔好放棄亦都唔好諗太多，我相信你未來會順順利利的🐷🌹👍🏻👍🏻👍🏻👍🏻

我想同你分享一樣野，我小學讀屋邨學校，中學有幸入左全港數一數二嘅中學，果陣以為嘅世界係我嘅，點知一黎跟唔到，二黎真係冇自信，會考炒左原校都升唔到中六，好彩有間好好嘅學校肯比我讀中六，但自己唔爭氣，高考拎多2個U 1個F。最後死死地氣去讀asso，2年後有幸入番U讀社工，畢業出黎做野10幾年都叫事事順利，上年完成碩士。我分享自己嘅故事係想比你知道公開試炒左可能真係會令我地失去左一啲選擇，作為過來人嘅我知道呢刻感受一定好複雜，不過比啲時間自己回氣。人生呢條路真係好長，我見好多人喺呢條路跌低，但最後都係可以行番順。想提提你，只要你願意，一定可以企番起身，甚至可以有意想不到嘅結果。撐實呀！

孩子，而家呢刻你會覺得dse佔你人生其中一個好大既部分。實際上佢只係你生命裡面其中一樣野，中學學制最大既盲點在於條路應該要點走。

作爲你既父母、老師或者補習老師既人，比起成績，我相信大家更樂見個個盡力去溫習既你；比起結果，大家會更appreciate你既勤力同用心。

想話你知，其實仲有electives，仲有好多可以行的路。EMO是沒問題的，唔開心同埋失望都係正常的情緒。

都提提你，盡力唔好對答案啦、對答案真係影響身心既行為🚬 未到最後一刻好多野都唔知，唔建議呢刻落定論住。

個陣我以為自己數學1硬，最後都2到。但係因為呢個唔開心，最後影響左通識，同本身差左好多個grade！

仲有electives架，俾心機🫶🏻

嗯 謝謝你🫶🏻🤍

你會咁諗 因為dse對於大部份呢個年紀嘅人嚟講（唔止你）係「人生目標」 過多一兩年 「人生目標」會一直變 由要gpa到要grad 要揾份咩工/讀唔讀master
所以係必經的 會猶豫 會質疑自己好正常

記住dse係你其中一條揾到未來嘅路 唔係唯一一條
我讀u時 見過n咁多個人 由high dip/asso上返嚟 同年紀 一齊grad

dse 有時候真係睇邊個啱個種讀書mode 大學係完全兩回事

甚至對某啲人嚟講 大學都係局限咗自己 佢哋發展到自己嘅興趣 發掘自己嘅路 過上自己想要嘅生活

人生三萬幾日 都係想開開心心過啫

人生 真係好多條路 唔好因為目前嘅情況已局限自己 貶低自己

呢啲 如果我18歲嘅時候就明 就好🤣
加油






DSE只不過係人生中其中一個階段，我當年公開試都係考得好差，入唔到U，但十幾年前嘅時候已經年薪過百萬，超過99%成績比我好嘅同學。

對我嚟講，讀書同考試係其中一種能力，有啲人天生特別叻，好快就掌握到呢種技巧，有啲人好似我哋咁，根本就唔係讀書同考試嘅材料。

但公開試成績唔會定義你，因為每個人天生都有各種唔同嘅才能，只係剛剛好我哋嘅才能唔向讀書方面。出到嚟社會工作，反而有更大嘅空間去發揮你自己獨有嘅才能，你可以去揀適合自己嘅路去行，而響呢條路上面你會做得比其他人更好，發揮自己嘅價值。

若干年後你會好似我咁，睇返當年嘅公開考試成績，會自嘲，一笑而過。

我都想講下…. 睇到你篇嘢以為你係我個女，因為佢情況好似….. 先講我做阿媽實知個女有幾多料，一早估佢考得不會好，但自己能力有限，又日日返工，所以我不論補習費多少，中英數Econ account Geog 科科都叫佢補習，仲最後半年加請私補中文英文，總之每月要萬幾蚊。我只想比阿女知道我係有幫佢，我只希望佢覺得有人响佢人生第一大難關時，無限地支持佢。 成績如何不重要，盡了自己最大努力便可以。 DSE 好難，我聽完今年的題目，覺得如果自己去考一定科科U，將心比己， 只希望你也不要覺得令父母失望。 因為父母只想仔女快樂做人，堅強積極面對難關。加油呀！

個人感受：你屋企人比錢你讀書為咩就係為咗你日後既生活好啲炸嗎，感點先可以令生活好啲？就係錢炸嗎讀書係冇fxxking用嫁，努力啲搵錢你入到U 就要浪費三年搵錢，出去識下人見識下呢個世界學點樣做人好過啦，不過吾好行錯吾好行歪路，你有成就有小成功活得開心快樂你父母就會好開心嫁啦，今日開始同自己講我要搵多過我老豆💪同自己講你得既💪讀書只係你人生一個短暫對於人生黎講，未來仲有好多路要行，仲有就算大學生讀完出去搵份工以為自己好勁點知搵十間公司冇人請。祝你下次返中學聚會有司機接送，幾感威水我信你得既加油💪

小弟中學嘅時候同你諗嘢諗得好似 所以留下言
想比你知道dse只係其中一個最大路方式入大學
只要你內心有強烈慾望係想入大學嘅話
無論你用乜方法都好 你一定會千方百計揾到方法入返你想入嘅大學
就正如你所講你有夢想 你想讀好書 比屋企人過好啲嘅生活 你就會有心願想做到你想做嘅事

所以無論結果如何 dse呢啲嘢 問心無愧就已經好夠
知道自己能力咩界限 但仍然繼續努力先係最值得珍惜嘅事
而家專注考好埋其他未考嘅科目就可以了

讀書呢家嘢 要真係攞岀嚟比嘅話係根本無得比
淨係單單補習補幾多科 補咩導師都好睇你屋企承唔承擔到

妹妹，好明白你的感受呀，我仔都是今年dser,佢好努力去預備，但考完主科感覺都唔係太好，最慘是數學，係佢本身最冇信心的一科，但佢努力操數操到穩4衝5（佢的最好了）,花最多時間的一科，但估唔到轉晒題型，連Part A1都出得深，依家當然應該4都不保，但我告訴佢，問心無愧就可以！人生往往都係咁，付出唔一定有收成，但最少對得住自己，唔知你有冇信仰，但我地深信天父一定有最好的安排和預備，記住DSE只是人生的其中一點，努力過就夠，態度最重要！條條大路通羅馬！加油呀！

同我屋企情況一摸一樣 好明白你 雖然屋企唔有錢但細細個開始就俾最好嘅野我 好捨得投資係我身上 上年dse考衰咗 決定retake 用咗好多個月好多時間溫數學 最後好似星都惦唔到 升得一個grade 好對唔住我屋企人 考完之後就係度喊 好想自己唔好咁蠢 可以醒啲 好明白你諗嘅野 今日全日屈係屋企喊 出咗個街之後就無咁depressed了 希望你都可以重新振作 考埋之後嘅科 相信你屋企人都見到你嘅努力 搏盡無悔就好 我諗你屋企人都係想你可以開心啲 而家升學方法咁多 總有條路啱行嘅 加油！

睇埋你最後一段，我想分享多兩句算係座右銘
If you're not making someone else's life better ,then you're wasting your time
99.99% 嘅人注定唔會係改變社會嘅偉大人物，但係只要你為家人 你愛嘅人 怎至寵物 客人 服務對象 同學 ,係佢地嘅生活 生命 帶黎快樂 回憶 改變，咁你就已經冇浪費你嘅生命

第二 係 the only shortcut is do not take any shortcut
人生好難，好多引誘 快錢 捷徑，但係我好肯定話你聽 信奉呢句先係真理 , 但係不等於打工搵萬令蚊係甘心認命，你可以學投資 但唔可以盲目賭博嘅意思

當年最有信心既中文寫作都U左，我依家三十二歲了，我都仲未知點解，又無錢查卷，當年第一屆DSE，學生老師都嚴陣以待，好記得學校中文老師每日都幫我改文，結果失手了，對自己好失望好自責，唔敢面對老師。但我由高級文憑讀上去大學，依家仲有可能讀碩士。一次公開考試唔斷定一世，雖然起步比人慢，但過程半工讀top up degree，令我學到更多。每個人條路都唔一樣，可能十年，你發現就因為呢次看似失手，但其實更捷徑地去到你想去嘅地方。諗返轉頭，原來係好事～

姨姨話你知， 我想當年考會考 0 分 放榜個時有啲同學好緊張去搵出路撲學校，相反我同啲同學仔去唱k 再慢慢諗點行，雖然我揀左再重考但都係0 分😂😂 我自問自己唔係讀書材料，所以直接去搵工做，有時會去進修下，隔左好多年之後我決定考大學，人大左想挑戰下自己 ，最後成功畢業了，
每個人目標同方向都唔同，唔洗比較，唔洗灰心。
「努力會說謊，但不會白費」

成績唔代表一切架，努力左盡左力就得
最緊要搵到自己既興趣，開開心心每一天！😇加油呀

Hello，同你分享姨姨我係好多年前考會考嘅人，數學中一至中五都無合格過，做咗三間學校嘅mock都係26/100分，最後E低空飛過，即係合格 。 you never know.

勉強讀完中六七之後去咗讀副學士，避重就輕按自己特質同專長揀咗適合自己嘅科， GPA好高分，升返大學，畢業後一直從事自己擅長而且不討厭嘅工作，人工都ok 。

我知你好唔開心，睇得出你已經好努力，不如呢一刻試吓將呢份唔開心擺喺櫃桶入面，用一個清醒嘅狀態考埋其他科。搏盡無悔。

唔使say sorry 嘅
最清楚以後點做嗰個係你自己
學習面對失敗都係人生嘅課題之一，唔通你會預計之後嘅人生每次都贏？ 輸咗咁點算？心態好緊要。
平伏心情後就好好去了解下自己嘅問題，壓力下會腦袋空白？ 估錯晒啲題目？ 冇大包圍準備？….等等，咩問題係要你自己去探討。一定要徹底了解，因為要避免make the same mistake again.
驚？係冇用㗎。只會擾亂你情緒。
如果冇辦法預計，就索性唔好去諗。
做啲加強自信心嘅事情好過。

過來人多口嚟搭訕…..

Hey bro, 當年alevel 放榜我同你有一樣感悟，報埋樹仁，以為自己無大學收，我仲desperate 到send email 俾我dream school 成個faculty，由dean 到parttime lecturer. 其中有個好好既professor話我成績應該難d 入，但可以試入碌入低分科再轉系。

fast forward 我畢業好多年了，真係轉系入到我dream school畢業。入到大學就發現好多同學唔一定係經公開試入，仲有副學士都有好多猛人，又勤力又叻，一個考試未必係你人生嘅絕對，你仲有好多好多可能性🫂你屋企都一定會支持你

我明白，公開試對一個想改善家庭生活嘅年青人係有幾重要，我曾經係中學老師，睇過20屆放榜，睇到學生係畢業十幾二十年後嘅生活。
老土講句，升大學唔係唯一出路，有心讀大學又唔一定要中六再升大一，人生可以好多可能性，唔好以為自己冇路行。
如果目標係買樓，唔係大學畢業就做到，依家經濟模式唔同咗，可以話難揾到穩定工作，但又有新嘅機會。
嚟緊呢個月，你只要記住一定事，盡力考試，放榜睇下咩情況，一定有途徑升讀大學嘅。

Hi ! 雖然有好多人已經安慰咗你
但係好想喺呢度同你講🫶🏻
你細個嘅夢想買到樓，
加凍飲唔使考慮價錢？etc. 
但其實以上只係我哋人生其中一啲目標
我亦都相信將來嘅你都會有方法做到！

冇錯，香港係一個好現實嘅環境
有錢當然可以解決到好多嘅問題
但係我哋人生本身有好多嘅課題
更加唔會一試定生死

每一個過程
一係成功
一係成長

鑽石要閃係要時間磨練
而且鑽石有大有細
所以唔需要逼迫自己🫶🏻

Hi同學仔，我相信無論有幾多個正能量留言，當刻呢件事我係你當前人生面臨最大嘅黑暗和恐懼，無需逃避，反而可以換角度睇，呢件事嘅背後反而證明咗你嘅才能和天賦，往往可能唔係考試讀書的邏輯上，正正可以借呢個機會，去研讀一下自己感興趣嘅內容或者發掘一啲感興趣但係冇去嘗試過嘅技能，當比自己一個喘息空間又好，一個新方向又好，其實幸運一直都係你身邊，只係佢透過唔同嘅方式話俾你聽。

你真係好乖、好乖、好乖，居然唸到咁多愛錫你既人點唸。想像到你身邊有好多人都覺得你乖，所以咁願意幫你。

失望與否，同考出來的成績未必有關係，大家都更想你快樂、幸福、有自信。

要喊未喊囉，ok 既。考左就唔好唸，考一份、丟一份。向前望。

直接考到U梗係好啦，迂迴一點，又會睇到更多風景。

入U又好、副學位又好，出年幫人補習，幫補下自己的生活費。而家expected life span 係100，你有好多日子可以好好孝順老豆。

Hey boy, you only live once! 一生人流流長，何必struggle係呢一年好與壞。考得好當然開心，真係一個唔覺意考得唔好又算得啲咩呀！以過來人身份加活又左好x年既老屎忽話你知🤭呢個世界唔係淨係得讀書，世界很大👀欣賞你有為自己及家人努力過就夠了🫶🏻我係你屋企人一定Proud of You (More than 幾多粒5**）！畢業後出嚟做嘢講既係態度唔係成績，夠上進肯學習已經打敗99%既人🧏🏻‍♀️加油！（唔使覆💕俾心機考埋佢！）

個啲咩DSE唔係人生全部… 唔講喇
個個都講左

但我好欣賞呀妹你感恩
明白到爸爸已經盡可能比最好既你
知道老師對你既用心教導
我仲以為而家既細路仔只會嫌自己得到既唔夠多… 🥹
信我
你識呢樣野
你呢個人一定會有運行、一定有比其他人優勝既地方
你好值得人愛錫既妹妹

考得好DSE或者係其中一樣調味料
但你呢碟餸既本質已經美味

衷心祝福你搵到自己想行既路
路路暢通 順利❤️
考唔好唔緊要
你要發光喔🌟

以前嘅我曾經好似你咁諗，不停諗要考好啲唔好辜負人哋
考好啲唔好浪費自己嘅一分一秒
當時嘅我壓力大到結果考試期間入咗醫院
入醫院個刻我身邊嘅人都喊哂
反而病床嘅我覺得輕鬆咗
因為我當刻明白到，原來每件事只需要盡咗自己能力就得，唔需要理結果係點，你考試前有盡你能力努力就可以啦
結果當年嘅我係home leave 去考試，結果當然無我學校預期咁好
結果入唔到我自己鍾意嘅科

但原來命運係一早會為你安排好
結果符碌入到大學
結果符碌識到我而家嘅老公
結果符碌識到一班好同事

我樂意分享我呢個經歷俾大家聽
而家嘅我都會教我小朋友
明白重要考試失手嘅失落感
但更要知道自己曾經努力過
上天會見到你嘅努力
保持一顆善良的心繼續行落去
就會發現有好多同行者
加油餘下嘅科呀

作為2017年考生 我知我唔中意香港教育制度所以我hea考 我得10分得英文佔一半分好似？ 但我憑作品集入到世界排名第二大學
依家擔心成績尚算太早 等出成績先再擔心啦 個人覺得嘅係唔好諗到咁差或者諗唔開 依家其實學歷已經貶值㗎啦 有有科技公司會請啲未讀大學嘅人 讀唔到大學唔係一件世界末日嘅事 同埋根據未來嚟睇，可能真係自己創業會好啲 如果有諗頭嘅話可以申請政府Bud 加油啊少年 問心無愧盡力就好！

你知唔知你其實已經好努力！
DSE只係佔你人生嘅一少部分
你嘅父母你身邊嘅人
最希望嘅係你要開心
亦都好多謝你出世係呢個世界上！
咩事都好盡力咗就得！
呢個世界上仲有好多美好嘅事等著你～

我哋係明愛連線teen地網上青年支援隊
有需要可以揾我哋傾下！
_______________
📱 Hotline | 21170321 | 93773666
🌺 WhatsApp | https://wa.me/85293773666
🌴 Telegram | https://t.me/caritasinfinityteens
💛 Instagram | http://instagram.com/caritas.infinityteens

以前喺你年紀時都會覺得真係公開試好重要，但人越大後就越發覺人生其實好多出路，你未來仲會有好多機會同可能性，DSE係你呢一刻嘅人生大事，但你將來會有更多大事經歷，每刻都盡力就好土
睇得出你係個好努力嘅人，努力係個難得嘅優點，堅持努力會為你人生打開更多美好嘅可能性，加油！
唔敢代你父母同師長講咩，但如果我有咁識諗咁努力嘅子女或學生，我唔止唔會失望仲會好欣慰
辛苦你了，加油

還有幾萬種出路，你出到嚟做嘢就會知道分數好小事，你嘅人格、責任心、道德、同理心、上進心等等...比起一切分數都更加重要。
我曾經都好似你咁樣，自己分數唔好走一文不值，但係事實並非如此，你仲後生，唔好咁快以為the end of the world.
我咁樣講係因為我曾經都好似你咁，而我相信有好多人都曾經係同路中人。
總言之：你有盡咗努力就已經好好㗎喇，唔好放棄，多姿多彩嘅未來仲喺度等緊你！♥️

又唔係你唔想考好d, 盡力咪得囉，學習唔係你肯學就學到，要講教同學嗰個夾唔夾到，學習方法有無用夾既，有無即時反饋，全部都有份決定你既結果。

失落係一種情緒，但不應該俾佢決定你既人生。

而且而家讀到書亦唔代表有好既成就，所以根本無需要自責。

到最後真係唔得既，就搵野做儲吓錢，再去讀又得。 而家比以前幸福得多，升學途徑多到你唔信，只要你想就有得讀，咁你仲要驚d 乜野呢？