📌 復活節剛過，想起當年
共 93 條紀錄
復活節剛過，想起當年在婦產科學師時嘅事。當日有個孕婦入咗產房，由一個好有經驗嘅執媽助產，我在旁邊幫手兼學習。大約下晝兩點幾，已經見到個BB頭露出大半，但過咗半個鐘都生唔出，個執媽拉咗幾次個BB頭，都拉唔出。我就推個媽媽肚上面子宮頂，加啲力俾個媽媽生產，後來個媽媽開始冇力氣，執媽要急call 醫生入嚟。個產科醫生幫手拉咗幾次，終於拉出個BB頭，原來係臍帶緊緊纏住BB頸有3圈，身體部份仍然困在子宮內。咁解釋到點解個BB生極都生唔出。終於剪開臍帶，拉出成個BB，交俾兒科醫生急救。好不幸，個 BB應該在子宮內已經缺氧一段時間，全身癱瘓瘀黑，急救成個鐘，不停心內注射腎上腺素，都冇復甦反應，終於要放棄繼續急救，宣報個BB 死亡。之後我幫個死嬰抹身，用被包好，但露出塊面，放在儀器房外，等個媽媽元氣恢復多啲，可以見BB 最後一面。大約過咗3個鐘，個媽媽已經返回病房，我要清理現場用過的儀器，途經發覺個BB口角有些少口水泡，我即刻摸個B心口，發覺佢有些少呼吸，我即刻推個B入返產房俾氧氣，又急call醫生嚟急救，勢估唔到，救咗幾分鐘，個BB突然大力吸氣同喊，神蹟復活。此事係我在職以來，最引以為傲嘅事。
見到有趣友話，個B救返生後，會有嚴重後遺症。我救咗B，等於害咗佢父母。在此我可以講多啲嘢，當年所有在產房或NICU certified 已經死亡嘅BB，尤其係未足月、死胎、早產嬰兒，好多都拒絕父母直接領走遺體埋葬。好大部分死嬰都會儘快運走，去醫院特設嘅焚化爐直接火化。當時我發覺個B尚存一口氣，若果一念之差，唔去救佢，個B就會好快運走，被監生燒死，我就會罪孽深重，我嘅罪過，十世都還唔哂，仲會連累下一代。希望個趣友明白點解我同其他醫生，都堅持去救返個B，仲可以救返自己嘅良心。
我屋企有midwife（奶奶），話當時60年代接生，有個男嬰出生冇呼吸，醫生隨便睇下就certified，奶奶覺得係個足月bb非常唔捨得，係緊幫佢心肺復蘇，連個產婦都要佢放棄算啦，佢一路又祈禱，搞咗半個鐘，終於都救返，之後果個媽咪年年帶個小朋友來拜年。我奶奶話，佢救過唔止一個bb。仲話當年佢接生嘅bb，之後長大返咗佢間醫院做醫生😂😂😂
加油啊！總之聽佢講果d case，當時佢哋也真叻過醫生（果陣時醫生好高竇），同埋佢當值果時，特別多bb出世😂😂😂
我嗰個年代都係咁，基本上大部分入院生產個案，都係由助產士處理同執仔，除非個孕婦或BB產前或生產時出現問題，先至會搵醫生到嚟。
缺氧咁耐再救返
好大機會都變植物人
咁就一世
救返都無用
反而害咗人地全家
利申: 過來人,個老母要照顧個植物人bb 而自殺過好多次
你所謂嘅救返人一命好可能只係自我感覺良好打飛機
當然救返咩事都無, 係正常人咪好囉,happy ending
好感動的事，值得你引以為傲講一世🙏🏻❤️
呢3個鐘好重要！以後所有被certified 的B B，醫院應該都要比媽媽抱番一段時間，盡最後力量比機會個B生存
多謝！我都覺得係個媽媽抱過，俾出正能量，個BB先至可以復活。
令我諗起電視劇 Outlander 最新一季其中一個情節 🥲
我睇嗰時仲覺得太誇張了 （雖然個故事本身已經好誇張神怪）
現實有時往往離奇過小說
我未睇過呢套劇，但過往咁多年嘅經驗，所見所聞，離奇古怪，見得唔少，不過我總係覺得，係有神蹟，保𧙗個B翻生，並非我啲本事。
醫學嘢我唔識,但有個問題我覺得好奇怪!
點解公立醫院好堅持自然分娩唔到唔到最後先肯開刀?其實係咪有咩隱憂定有其他原因?
每當我諗起一個出生嘅嬰兒係幾咁充滿着咁多人嘅期盼，同埋準備付出嘅愛。喺呢度真係要講一聲多謝，絕對係唔容易嘅工作。
吾識想問，喺香港...無一個婦產科醫生幫人生仔，只係一個叫做執媽既都得？？ （ 啱啱上網搵左執媽叫助產士）
多謝你救返bb, 生命好奇妙，我也差些放棄仔仔，幸好仔仔順利出生，現在亦健康成長，順便感謝當年的醫院人員
真係戥你開心，努力正面養大個仔，個仔回真心回報，第日享受兒孫之樂。
多謝你嘅祝福，阿仔好孝順，錫我，成績好好，即將成為會計師，只要他健康快樂，我就快樂。
多謝樓主救返佢。佛家有句說話：救人一命 勝造七級浮屠。更何況樓主係做醫療嘅，拯救生命係理所當然啦
好神奇。但都想問點解個頭露出大半都要過半個鐘先搵醫生？卡響產道一定好大機會缺氧㗎喎⋯
當時孕婦已經坐產，我哋會俾時間個媽媽自己生個B出嚟，可能我講得唔夠詳細，其實個B露出個頭，已經見到鼻孔，我已經用氧氣喉向個B輸氧，試過起碼十次，個媽媽都痾唔出個B，個執媽好醒目，出盡全力，用手指去探到B B有臍帶纏頸，見到個媽媽開始唔夠氣力，即call 醫生到場，前後大約半個鐘。其實想講清楚，臍帶纏住個B頸，係好常見，通常係繞住一圈，但係呢次係我在職咁多年，只係見過呢一次臍帶纏頸3圈，又緊又實，個B似俾人吊頸咁，就算緊急開刀都未必救得返生，所以今次個B死過翻生，我認為係神蹟。
睇咗呢段字幾次，眼濕濕
多謝你
一念之間無怕麻煩，無驚多事
拯救唔止bb 仲有佢屋企人
好彩你細心發現，挽回一個生命，經歷生產之痛嘅媽媽唔使再經歷多次喪子之痛🙏🏻🥹
我知道個媽媽事後知道個B救返生，唔夠半日，想立即衝去NICU睇吓個B，但俾姑娘阻止，怕佢發軟蹄跌親，隔咗一晚在第二日至俾佢探望個B。
我有個同學佢老婆前幾日去醫院生BB，好可惜難產，BB出到黎已經無呼吸，救唔翻了
好彩你眼利 好彩仲有香港人做醫護 大陸人一定一鳩扔落醫療廢料就算
多謝你救番Bb 同佢一家，作為媽媽睇到眼濕濕，好人好事 ❤️❤️
多謝你的細心，救回BB一命，隨喜功德隨喜讚嘆冷漠阿彌陀佛🙏
多謝你🙏🏻呢個post 令人好感動！希望BB身體健康！快高長大！
犀利，好彩你eagle eyes 發現到。真係救命恩人。 好人一世平安。
好人有好報，願你一家一生順利平安！👍🏻👍🏻👍🏻👍🏻
已經係40幾年前嘅事，佢依家應該係40幾歲嘅狀男。
好多謝你 原本心情好差 睇反你個post就開心左💕🫂
出完頭唔摸有冇cord round neck 就出shoulder嗎？
當時係個媽媽好努力，個肚不停向下推，想儘快生出BB個頭，個執媽同時要用手頂住個BB頭，要就位同阻止BB頭出得太快，阻止個頭由陰道口失控標出，避免BB腦部受創引至腦腔出血，但無論個媽媽點努力去推，都等左成十幾分鐘，個BB頭先至出左一大半，到個執媽可以用手探到有臍帶纏頸，即刻知道臍帶箍得好實，點調個BB個頭位置，點就住都解唔開臍帶，又落唔到較剪，更加鬆唔出BB膊頭，即時急call 醫生到嚟，但當年正值大批越南船民湧來香港，日日都有十幾廿個越南人塞爆產房，曾經試過有日有成六十幾個產婦出入，仲未計在手術室等緊開刀生仔嗰啲產婦。無論醫生護士都忙到踢晒腳，所以要等多成十分鐘，先至有醫生到場，唔係執媽冇料，而係當時嘅環境混亂，人手極度不足，所有產婦同BB能順利返屋企，都唔係話咁易。
救返個BB之後，醫生立即幫佢做全身檢查，包括呼吸，四肢同身體各部份神經反應，全部正常，所以個醫生話個BB肯定會正常成長。
產前會分3楷段作超聲波檢查，在34週作最後一次檢查，評估個B發育同成長，胎兒同胎盤位置，胎水會否過多或過少，個B個頭有冇生長過大，分娩時有冇卡在媽媽的盤骨最低位置嘅風險，亦可睇到有冇臍帶纏頸，但係若果個B體積比較細，或者胎水太多，子宮有多餘空間，當媽媽在36週打後開咗作動時，好多時個B會被收縮嘅子宮擠壓，咁就令到個B好容易在子宮內不停郁動，甚至轉動，打關斗，個B嘅頭未能向下，好多時令到臍帶纏頸，如此的話，產前檢查，超聲波都未必可以檢測出嚟。但在生產時，個B嘅頭開始突出陰道，有經驗嘅執媽會用手指去探下個B條頸，睇吓有冇臍帶纏頸，若果有，個執媽會用手去移動個胎位，令到個頭可以轉動，鬆開臍帶，順利產下個B，但今次係纏咗3圈，所以要即刻急call 醫生去評估係咪要即刻開刀。
助產士路過～
Bb出左頭之後，係一定要check有冇臍帶纏頸，standard黎既。
一般臍帶纏頸會評估下纏幾多圈，鬆緊程度。
唔太緊會用手解開，太緊用clamp clamp cut既方法剪開臍帶再解。
所以Bb如果出左頭，會叫媽媽吹氣吹氣，唔好疴住。
我地一般都處理到1-2圈既臍帶纏頸。但有臍帶纏頸都會影響成個生產過程中Bb既心跳，可能心跳跌左上唔到，要醫生去評估同介入。
當年兒科同產科都好有料，有愛心。留咗個B住在初生嬰兒ICU半年，由兒科醫生評估過個B發育正常，識食識喊識扭計，確保個B冇其他問題，之後俾個媽媽接出院，日後兒科肯定會密切跟進。
個醫生應該唔會咁詳細講俾個媽聽，點解個B會救得返。若果個B真係如醫生所講，正常長大成人，依家已經40幾歲。呢件事係發生係1983年中。