每日用人話記錄社科概念 Day 15

失業點樣揭示性別角色不平等

社會學家Aliya Hamid Rao喺Crunch Time: How Married Couples Confront Unemployment入面研究失業點樣影響已婚、受過大學教育嘅美國中產夫婦。佢透過110個深度訪談同多個家庭觀察，分析當其中一方失業時，家庭入面嘅分工、情緒同身份認同點樣改變

表面上，失業只係一個經濟問題，但Rao指出失業其實係一個高度性別化 (gendered) 嘅經驗。當男性失業時，往往會被視為對男性身份同養家者角色嘅威脅。呢種就業壓力唔單純嚟自個人，同時亦係源自社會對男性嘅期望，因為工作喺男性身份認同入面被賦予特別重要嘅位置。例如喺部分受訪家庭眼中，理想嘅求職者係一位全心投入求職嘅失業男性，希望儘快重新獲得全職工作，並恢復對家庭嘅財務貢獻。用人話講即係咁先夠「上進」

相反，女性失業往往較容易被視為暫時性或者較容易被接受。即使有啲受訪家庭入面嘅女性原本收入高過男方，佢哋都表示冇咁大就業壓力，甚至有時會被理解為一個「回歸家庭」嘅機會

不過同時，呢啲女性亦缺乏足夠嘅時間、空間同情感支援去專注求職，因為佢哋仍然更可能承擔家庭管理同情緒照顧嘅責任

呢個研究有趣嘅地方係，失業本來可以成為打破傳統性別角色嘅機會。例如當男性暫時冇工返時，理論上可以重新分配家庭職務，承擔更多家務或者照顧角色。但Rao發現現實係傳統性別角色反而被重新強化。女性即使失業，仍然更可能承擔更多情緒勞動 (emotional labour) 同家庭管理，而男性就可能更專注於重新就業。即使男性暫時冇工返，佢哋仍然被視為主要經濟支柱；而女性則被自然化 (naturalise) 為更擅長情緒支持同家庭照顧。Rao並冇將呢個問題簡單理解為男性或者女性嘅問題，而係指出社會長期以嚟將男性身份同工作、收入連結，同時將女性角色同情緒勞動同家庭照顧連結。當失業發生時，呢啲平時較難察覺嘅社會期望反而變得更加明顯

呢個研究冇畀出一個明確解決方法，但佢提醒我哋社會往往透過工作 (employment) 去定義性別角色同身份。即使工作消失，背後嘅性別規範同社會期望仍然存在，甚至會以其他方式繼續運作

例如男性即使失業，仍然被期待要專注求職、重新成為經濟支柱；而女性即使失業，仍然被自然化為更擅長承擔情緒勞動同家庭管理。

換句話講，唔係因為某樣嘢消失咗，佢嘅社會影響就會消失。反而當工作呢個原本好明顯嘅結構暫時唔存在時，背後嘅性別規範會用其他方式繼續存在，例如透過期望、情緒責任或者家庭分工維持落去。從呢個角度去睇，失業唔只係經濟問題，而且係揭示咗社會點樣透過工作去維持性別身份同不平等