週不時見到關於對狼人好惡嘅討論，
係所有討論之前，不妨了解返狼人嘅本質。

一個遊戲嘅進行，離不開三個要素。

第一係規則層。

遊戲會創造一個世界，
每個世界都有自己嘅規則同目標，
例如象棋馬行日、象行田，
鋤Dee嘅花唔夠俘虜打，
而所有遊戲必然係規則內進行。

第二係物理層。

有啲遊戲必須建基於物理法則，
最簡單例子係各式體育競技，
例如足球要用腳踢，網球用拍打
有戰術、策略都必須要用身體嚟執行。

第三係社會層。

係規則同物理以外，
所有有形無形、由人為賦予意義嘅互動，
包括語言、文字、圖畫、聲音、表情、肢體動作等等都屬於呢個層面。
例如狼人唔可以脫離人際關係，
《9 Upper》唔可以唔講嘢。

假設規則層係A，物理層係B、社會層係C，
遊戲就係由三種要素溝埋，以下係啲典型例子。
A：圍棋、象棋，上網捉、口頭捉理論上冇分別；
A+B：足球，轉咗電子世界就變FIFA、Winning；
A+C：狼人，如果禁止溝通就會變點指兵兵；
A+B+C：睇電視睇漫畫好多，Liar Game、魷魚遊戲一大堆，不贅。

一般而言，
規則層為主嘅遊戲著重數理邏輯、抽象思維，
物理層需要體能、協調、反應、技巧，
社會層按遊戲規則，講求社交能力、表達能力等等。

狼人本質係社交遊戲，
玩家會分享、隱瞞、套料、欺騙、觀察、
揣測、說服、拉攏、孤立、引導、表決，
全部都係日常需要嘅社交技巧，
英文稱身份Game做Soical Deduction係非常準確，
因為佢考驗嘅係社交同語言能力，而非數理邏輯，
正因為咁，
叫返工已經用曬社交能量或者怕生保嘅朋友玩狼人，
就好似叫唔鍾意做運動嘅人踢波踢足兩粒鐘。

遊戲本來係各適其適，啱就玩，
唔啱玩過第二樣，勉強唔嚟。

喂好文章嚟 分享下先