📌 想問下各位靚女係點樣
共 51 條紀錄
想問下各位靚女係點樣解決容貌焦慮
本人屬於五官還算可以，但係面型差到極致嘅人，塊面又大又方，顴骨又高，同時我五官又唔算特別大，顯到面大五官細
平時化左妝用頭髮遮遮塊面都會被人讚靚女，但係素顏無人問津，冇頭髮遮面就更加唔洗講，樣衰到分唔清係男係女
因為面型差，就算化左妝都唔上鏡，平時同朋友出街見到佢地都影到靚相，但係我影到成個男人咁，就好唔開心好焦慮
成日好羨慕啲塊面好細輪廓好流暢嘅女仔，有諗過之後要唔要削骨，但係又唔想去到咁
我唔想冇左真實嘅自己，但真實嘅自己就的確係有好多缺點，想問下大家都係點樣解決容貌焦慮🙏🏻
靚唔靚其實同五官關係不大，你諗下陳法拉都係細五官又方面，大家都覺得佢好靚，因為佢行出嚟就係有自信。
我都係方面額高五官細
細個都幾醜下，擺到25打後突然靚返少少，主要係因為膠原流失所以無咁腫。
但28~31 係我覺得自己最靚嘅年紀，主因是心理健康了很多，有返自信，所以行出嚟就抬頭挺腰，眼神唔斯縮唔做people pleaser.
你可以入我profile 睇，絕對唔係靚女，但你會見到我眼神係好有信心，我清楚我自己係咩人，我知自己做緊咩，人生有目標，有方向。
因為咁，偶爾耐唔耐都會有人讚我靚😂
上次見到呢個覺得講得好有道理：
當你發現美貌唔會為你帶黎實際利益嘅時候，就唔會再容貌焦慮了🙏🏻
都的確係，我由細到大都知道自己唔係靚女，所以都冇咩容貌焦慮
之後入左u開始學化妝，發現自己執一執都會被人讚、會被人鍾意，但係又知道真實嘅自己其實一啲都唔靚女，然後就開始容貌焦慮了
包裝得耐左，唔知點面對返真實嘅自己🥲
我都係臉型唔好睇，帶口罩會靚10倍，同埋要整下髮型
如果你唔係靠樣搵食，調整下自己心態，零死角都唔係個個明星做到
或者試下做激光或打針，風險會相對細啲
削骨就唔好搞，會有後遺症，之後皮膚會下垂，除非你好有錢，老咗可能要拉皮
你幾多歲？25歲後慢慢無哂骨膠原，有啲後生靚嘅會變得好殘，後生唔靚(又圓又方)嘅屌打哂其他人
我細個d嗰陣時都係方圓面，再加Baby fat。真係30歲打後開始流失膠原蛋白就塊面輪廓再出咗，不過我都有幾年前試過嗰啲日式小顏整骨，啪番塊面瘦長啲，腮骨嗰個位推入啲，就冇咁明顯囉👀都有啲朋友好高顴骨都可以推到變返自然。。。冇乜痛感嘅。
我本身細個就係你相反嘅焦慮，上鏡好過化妝，化妝再好過素顏個樣。真人無乜人會讚我靚，十幾年前啲人都話我係《畫皮》<~唔知你有冇睇過呢套戲？🤪
素顏無人問津真係好正常㗎，我諗99%既人素顏都唔會有人理㗎～而化妝要上鏡就其實都要化幾濃妝，同埋嗰啲光暗影要學吓點樣加😊不過上鏡嘅妝，真人可能會好誇張
日本好多拍戲嘅女神級明星都係方圓面㗎，佢哋都係用頭髮去修飾面形，你俾人讚靚女就已經係好靚女㗎啦😊俾啲信心自己，個人開心啲，散發出嚟個氣質都會更加靚㗎♥️
換個髮型應該可以改善到，同埋呢30歲以後少咗baby fat，塊面會瘦少少同無咁方，唔洗太緊張。我見過有個女仔塊面好方，但超有自信，身材keep得好好，佢 老公不知幾愛佢。
我宜家都係用頭髮遮一遮塊面，嘗試緊箍牙同減肥做gym唔知會唔會有改善😬
我都成日好焦慮🥲我會諗呢個世界上仲有好多人都樣衰過我👉🏻👈🏻有50分都叫好好彩啦😣大把人化妝都救唔到個樣（咁諗心地好差但可以暫時安慰下自己😣）
靚女 但冇自信 同
唔靚 但超自信
我通常會被後者吸引🤩
利申：女
其實你靚同唔靚根本冇其他人在乎，最在乎嘅往往都係自己。所以當前唔係解決另外嘅問題係解決你心靈嘅問題，我都有容貌焦慮，素顏唔敢出街，但係最後發現當你放過自己嘅時候嘅世界就好舒服，根本你素唔素顏出街就冇人care係你自己care咋嘛，如果你都可以放過自己放手嘅時候你就會覺得呢個世界實在太輕鬆啦
你得閒留意吓條街上面其實有好多人都唔一定係所謂嘅標準美女，但係佢哋好放鬆好自在咁做自己嘅時候，你就會發現why not me
其實大部份人都係化完妝先好樣d的
唔洗太焦慮
化完妝靚靚地已經係好好
天生麗質其實唔係真係好多㗎咋
如果唔想整容
可以紋眉，眼線，紋唇，整睫毛
咁就可以延續妝後狀態
又可以養好皮膚
令皮膚白到識發光都係一招
我識d 女仔本身樣麻麻地
但皮膚好，勁白，有仙氣
會令人覺得係靚女
仲有身材，keep 到好fit
或者著衫好好睇
都係一個吸引人嘅標記
另外性格
有d 女仔好溫柔，好有家教
或者好活潑開朗
都好受歡迎
個樣係咪真係靚就唔係重點
(咁講好似有d 離題，但覺得有時樣唔係最重要）
最簡單嘅方法就係乜都唔好做；因為只要一早就喬裝易用；化妝嘅定義係落咗妝都仲認得；但係嗰啲化完妝之後落咗妝唔認得嘅…
我：醫美
幾年前日日叫春 好嬲點解世界咁唔公平
跟住得閒打吓針 得閒又整吓對眼 後尾會好了解自己個樣 知道點樣可以最低限度地做醫美調整五官令到自己順眼啲
因為我發覺除咗靚到明星咁靠樣搵到食，普通靚女只會惹來一大堆想騷擾你嘅噁男，冇咩實際好處😂
你自己都講平時化咗妝用頭髮遮下塊面都有人讚你靚女，就已經證明你係靚，只係你太care自己嗰少少缺點，一直放大先令你焦慮
但日常生活第一眼留意到嘅，通常係你整體嘅氣質，而唔係塊面嘅細節，成日形著顴骨高自己唔夠靚，耐咗真係會越嚟越唔靚，只要夠自信，顴骨高都可以係特點而唔係缺點。
如果真係好想從問題改變，咁不如剪個瀏海，通常嗰啲都唔使點樣打理，就算係日常都可以令你接受度更高，不過我覺得你應該要接受囉，塊面係自己嘅你學吓點樣有唔同嘅風格同呢個特點融合更好
同自己講你會襟老d，年紀大所有野向下墜時你仲有d骨撐住。
同埋外國都幾多人覺得女人塊面有菱角吸引，Margot Robbie塊面都幾方，尖面對佢地黎講太普通。
我面形同你差唔多🤣我都有呢方面嘅容貌焦慮…我仲要結婚生小朋友😂我成日提自己唔好照咁多鏡就OK…
你係咪（/想）靠個樣搵食？
唔係就唔好自尋煩惱
化咗妝見得吓人就夠
魅力來源唔淨係靠個樣
自己內心足夠強壯，就不會在乎別人的評價。生得漂亮，不如活得漂亮。只有你自己可以定義你靚唔靚，其他人無資格。
完全贊同😭 我又係面大又方，素顏完全路人，但係化妝就會比人讚，所以極度容貌焦慮。拍拍你，希望我哋可以搵到解決方法🩵
我天生好樣衰 好多劣質基因都齊晒 哨牙扁鼻厚唇顴骨高顴弓外擴等等 係得對眼好少少係雙眼皮 我係先學化妝 當我化妝技術已經爐火純青 依然得5-6分突破唔到 先至開始醫美 微整的話我全面都打過針、埋線 跟住先開刀 到依家眼鼻嘴都開過刀 可以話係一眼美女全妝都有7-7.5分 先開始諗削骨推顴骨 黎緊都會去做 因為想面部輪廓再流暢啲 我覺得你可以一步一步黎 顴骨高或者外擴可以先填充改善
利申 嚴重客貌焦慮 依家從事醫美行業
做人要有人生目標 就會靚in your own way
我係姨姨
到咗一個年紀
都會覺得人有自信，生活開心自然有吸引力
直接做下小顏， 你唔好理人話無用定點，想靚就去做，呢個係解決辦法之一
同埋你想下點解自己咁介意面型唔靚，唔靚會點？ 無咁得人中意？ 由呢個途徑去想下
每一個人都有外表缺點， 有啲人矮，但細細粒粒好得人喜歡， 李嘉欣五官精緻， 有啲男人嫌佢精緻得濟，唔會有十全十美嘅人係世上
你打扮比人讚靚女已經係優點來， 好多靚女（特別mk 妹），都係靠color con執靚自己， 素顏都好樣衰下，一樣都生活得好開心
唔係得你一個，唔需要特別對自己咁嚴苛
我都係面形好差，化妝都會俾人讚靚女嘅人。但又冇容貌焦慮，因為樣衰嘅人都會有人鍾意，靚女都會有人唔鍾意。
除咗中學期間，基本上素顏無人問津係常態，唔洗唔開心，做人有自信又有內涵，自然望起嚟有氣質～唔洗有容貌焦慮～
進修下自，加強氣質就對
解決容貌焦慮嘅最佳方法就係同自己和解 接受自己🥹 
因為人永遠係貪心嘅 得一想二
即使你靠醫美解決咗某個面部缺陷之後 你就會想郁下一個部份
接受自己嘅全部就係最好（但都最難）嘅辦法
明白你！
塊面大到人哋影group photo 我後面行過都會autofocus 咗去我度 。
我覺如果係「差少少就可以好靚」就話焦慮啫，塊面（連個頭）都已經咁大，真係冇嘢好焦慮，做咩都冇用就接受啦 。
我真係有諗過，但整容都冇用：塊面唔係好似人哋咁削下顎就得，真大面要削埋顴骨，最重要係就算削埋顴骨都仲有額頭同個頭，如果塊面尖咗但有個大頭同粗頸應該仲怪😂
都咁嘅地步真係冇嘢可以焦慮
我內雙眼皮，有倒及，牙唔齊，之前仲有爆牙
當然比人笑係小不了ge 過程，最成日比人笑鞋抽面
容易爆豆基因，皮膚都唔算白
會選擇非手術貼雙眼皮貼同去箍牙，睇皮膚科醫生
我會選擇唔睇我唔好地方，去睇我自己好ge 地方
會諗自己眼睫毛好長，唔洗植眼睫毛
頭髮好多，髪質唔算差，腳都算長同幼雖然矮
但冇咩人睇得岀我得158
就係咁樣一步步同自己和解
你總有d係人地冇ge 美，只係掛住望人地冇發現姐
最後就心態上改變，相由心生
咁都好好啦，我係面型差五官差仲要頭大，但只要don't give a fuck唔好理人點睇就唔會焦慮
染啱色頭髮 & 適合的髮型
會改善面型！！ (e.g. blackpink rose)
其他交比化妝吧🫶🏻🥹
其實醫美已經可以外輪廓唔流暢問題，面方可以先判斷下係咬肌定骨性，咬肌可以打支肉素 會有改善好多！！！
以為自己夢遊開post ，我又係面型又大又方觀骨勁高冇髮型遮就出晒事。
如果唔整容其實係解決唔到，唯有隨時間過去學識同不完美嘅自己和解。