📌 琴日係葵廣聽到一斷發
共 45 條紀錄
琴日係葵廣聽到一斷發人心醒嘅對話🌟
有個五六歲到嘅細路問佢啊媽：媽咪你鐘意我定你自己多啲啊？
個啊媽答：梗係我自己啦，每個人都要鍾意自己多啲㗎
個細路再問：咁即係我唔係你嘅第一位呀？
個啊媽話：每個人都要擺自己係第一位，你都一樣，咁就算有一日你發現冇人愛你都好，你都記得永遠有自己著緊你。

冇諗過會中流量密碼
好多謝你哋肯花時間睇呢段文字🙇🏻♀️
當初我聽到個小妹妹問呢條問題嘅時候，我預設咗佢阿媽會氹佢話鍾意佢多啲，但係冇諗過會聽到後面嘅呢一段說話。
我相信生而為人，我哋都有將自己擺喺第一位嘅權利。如果連自己都唔重視自己嘅時候，根本冇辦法好好咁愛身邊嘅人。
如果有幸比嗰位媽媽見到呢個post，想同你講一聲多謝，多謝你唔止教識咗你個小朋友要自愛，仲啟發咗我哋🩵
Btw 係發人深省唔係發人心醒，我知錯了🥲
維多利亞妹世一 維多利亞媽有智慧
喺傳統觀念入面，我哋好崇尚「犧牲」，特別係做父母嘅，好似唔將自己燒成灰燼去照亮仔女，就唔算係「好爸爸、好媽媽」。但其實，一個過度犧牲、完全冇咗自己嘅父母，往往會帶畀仔女極大嘅心理壓力。
當你同仔女講「我為咗你放棄咗幾多幾多」嘅時候，其實係喺仔女身上加咗一條無形嘅枷鎖。呢位媽媽嘅做法，其實係喺度做「情緒獨立」嘅身教：
1. 拒絕情緒寄生：我愛你，但我唔係依附喺你身上生存。
2. 建立健康邊界：我有我嘅需要，你都有你嘅需要。
3. 預防將來嘅「受害者心態」：父母如果愛自己，仔女大個咗就唔需要孭住「要令父母快樂」呢個沉重嘅責任。
如果你都想好似呢位媽媽咁，教出一個內心強大、識得愛自己嘅細路，可以試吓呢幾點：
練習「誠實表達需求」：
當你攰嘅時候，直接同細路講：「媽咪而家好攰，需要休息 15 分鐘，之後再陪你玩。」等佢知道，「愛。。。
「第一位」唔代表「唯一」：
同細路解釋，將自己擺喺第一位，係為咗令自己變更好、更有能量去愛身邊嘅人。就好似飛機遇上緊急狀況，你要先。。。
☆threads 發文有字數限制 詳文在主頁☆
弊傢夥， 見咁多人都覺得應該要愛自己先，令我突然反醒。
我自問確實真係覺得自己愛仔女多過愛自己🙈 有時甚至可能諗歪咗，覺得愛自己多啲，個人係會變得自私🤔
我頭先將呢個topic同阿女分享 ，問佢睇法，阿女話：
佢都記得細個嘅時候曾經問過我類似呢個問題，我當時同佢講 ：就算他朝有一日，發覺世界上全部人冇人再鍾意你，緊張你，甚至你都懷疑自己再唔值得任何人愛嘅時候，你要記住，最少都有一個人，點都會無條件咁愛你同在乎你，嗰個就係我。知道嘛？🥰咁我係咪已經解答咗我嘅睇法🥹
今日 last lesson 都類似咁樣同學生講！😭
係有自私嘅基因，為自己活著，為自己努力！
每個人都係要對自己負責 🙋♂️
自己活自己嘅人生，自己先知自己做成點，
成日同人比較成唔成功係唔得㗎 🥲
搏盡無悔，
比定義嘅係自己，
自己先知自己嘅路係點樣行落去 🏃
雖然有好多迷惘嘅時刻，
好多唔知自己想點嘅時刻，
但你要知道自己嘅高度同位置，
先可以發光發亮。
誰都可發光，只要找對地方，
平凡也好，做自己的主角！
🌟（陳蕾）🌟
btw 當你未識得好好愛自己，係好難去愛人哋!
我諗起細個我媽成日話我自私剩條諗自己唔識為他人著想，到我長大發現我地呢代人真係好多討好型人格，冇一日係過得開心，就算係被傷害被利用都係怕自己被討厭，到我做咗媽媽之後就徹底覺醒，我決定要愛自己，永遠將自己放第一，我都會教我仔愛自己照顧好自己先，與他人分享同幫助別人係要你喺顧好自己之餘有多餘能力先好做
其實個小朋友只是想聽到佢媽咪講愛佢，但佢媽咪就get唔到反而講左尐佢無諗過的說話，所以個小朋友就問係唔係佢唔係媽咪心中第一位 。
其實個媽咪都可以講我愛你亦都愛我自己，你都一樣要愛媽咪同愛自己 。
愛其實可以係相向、相親相愛 。
但個阿媽就說了個小朋友唔係第一位 。
其實世界上有並列第一，兩個考第一都係可以的
我覺得要睇埋個媽媽當時講嘅語氣，因為呢句說話有少少二元對立，愛自己第一位係啱，但都可以同時無條件愛一個嘅五六歲嘅小朋友，我怕小朋友聽到之後會少咗安全感，等小朋友大個啲，父母再教每個人都要獨立自愛⋯⋯雖然而家啲小朋友可能比較早熟。
唔知點解個細路咁樣問佢阿媽呢？佢一直以為佢阿媽愛佢多啲，但係有一件事令佢懷疑唔係。無論如何，佢可以咁直接問阿媽，證明佢哋關係好好，個阿媽又咁坦率，仲要教佢要愛自己，真係好難得嘅教育
睇到眼濕濕！
真喺好，年代唔同咗。以前的媽媽都要逼仔女愛返佢哋，要仔女為佢哋付出 來討愛。長大後，拍拖後，被分手後，才發現自己是討好型人格，才慢慢懂得自己要學習愛返自己。
💯💯💯💯damn right well said👏🏻👏🏻😼
所以聽到有人吊人「自私」真係既反智又「銀」耳🌚🌚🌚「自私」本質上其實係冇問題😎😎係自私到對他人有負面影響先係問題🌚🌚🌚
一言驚醒。。。
個媽媽一定係好有正能量嘅人
做咗媽媽精神心力好自然都放晒喺小朋友同家庭上，好少諗到自己
好好嘅提醒🥹每一個人都要愛自己，多謝分享🫶🏻
我仔都有咁問我（exact wording 如你所聽）
我都係咁答佢：我愛我自己多d
(佢聽到都O 咀，可能佢 expect 我答愛佢）
我解釋係因為，我愛我自己，先懂得去其他人
有時我都會諗呢個問題，係咪我唔夠好似其他人咁唔夠愛自己，永遠都諗人地先
但我始終相信若果呢個世界每個人都好似呢位呀媽咁諗，呢個世界只會愈黎愈自私
我個女話第一位係鐘意媽咪，之後我同佢講，永遠要鐘意自己第一位，無論長大後遇到咩人你好鐘意都只可以第2。
但你問我 我都係鐘意我個女第一🤦🏻♀️
我都係咁同我小朋友講，雖然喺心裏面都係佢哋最重要
但係想佢哋學識最愛嘅第一位一定係自己，你唔學識愛自己，何來有人珍惜你，呢啲絕對唔係自私嘅行為
或者果位媽媽嘅媽媽年輕時曾經聽過呢首歌(果位樂壇天后已經唔響度)，或者陳百強嘅cover ver. “至愛”，都係講【自愛】
https://youtu.be/IYzlVDlE72w?si=RNHLgmnjsab1rswc
啱呀😭😭尤其係自己啲錢吖🫶！ mpf嘅管理都要放第一位，退休先至有保障🤗🤗就好似萬全強積金計劃，每個月幫你慳好多管理費同有可觀嘅回報吖
人真係要擺自己第一位，唔好到死果刻先發現成世人都係為他人而活，咁先係真正冇意思。嚴格黎講人除左自己思想冇乜野係真正屬於自己
姪女細少少個陣都問過我呢個問題
因為d人成日問佢鐘諗daddy 定 mami多d😀
佢問我話陣我答佢：我鐘意自己多d
佢：🤯 原來仲可以咁答！
作為孩子的媽，我都係同仔講：媽咪最愛嘅係你
感恩今日睇到呢個post,令我醒起自己都需要被愛，有時會將小朋友放咗喺第一位忘記自己
再愛你嘅人都冇可能永遠陪住你
只有自己先係陪住自己最耐嘅人
所以成日提自己要做自己最大嘅支持者(雖然有時都做唔到☹️
之前喺樓下m記聽到一段令人懷疑人生嘅對話🌟
有個阿媽對住佢五六歲篤緊點餐機嘅細路講：薯條要揀無鹽，健康啲！
細路：吓😦？
欣賞呢位媽媽嘅清醒。講真，愛自己唔容易——尤其當你習慣咗先滿足全世界嘅期望。但至少，有人肯咁樣教個女，已經好好。💓
我都係咁教自己仔女，依家外面嘅資訊又多又快，小朋友必須要意識到自己嘅價值和重要性。但老公就要將我放第一位囉🤣
我都係咁教仔女 🥸
人一定要先愛自己先可以好好愛人
同埋真係希望仔女知，自己都唔愛自己時，人地都未必會愛惜你
我媽都係咁教我地～我好多謝我媽咁教我，令我都係咁同我d戀愛腦frd咁說教～
不過做到既人有幾多～好睇個人做化🙈
所以我細細個，媽咪成日都教，你自己D野都唔緊張，邊個幫你緊張呀，你自己都唔愛惜自己，無人會愛惜你。。。
我唔知呢套道理係岩定錯，但分開嚟講，而家呢代人，你地覺唔覺得係比較自我同唔太理會別人既感受🤔😅⁉️
要識愛自己先會識得愛人，可能會有人覺得小朋友未必明白，但重小就比佢明白自愛，總有一天佢大個就明白
其實都幾重要 好多人抑鬱就係因為著緊人地多個自己
最後自己遍體鱗傷都唔識得去照顧咗自己嘅需要先
實際上係嘅，好多人都唔知可以咁，之後投入一段關係，家庭或者戀愛，比對方影響甚至操控，受曬傷
講得好。 成日聽埋啲乜撚野放你係第一位。係度情緒勒索人。 然後小小事就喺度發晒脾氣。
的確 可恨我細個冇人教 大個先明白呢啲咁簡單嘅道理🙂↔️🙂↔️
自愛=一生嘅課題
但其實我希望媽媽愛我如同愛佢自己，同時我都一樣。咁樣大家可以互相做對方最強後盾
我都係咁樣教我仔，我最愛自己，你都要愛自己，珍惜自己，愛自己嘅人先會有自信。
咁講出嚟話埋俾個細路聽係最好
好過成日同你講最愛你但係處處都見佢其實最愛自己
呢個媽媽既心理狀態好好👍🏻小朋友都得到好好既教育，感恩🥹
Btw 係發人深省…
我女都會話鍾意我多過自己，我話我好多謝你咁鍾意我，但你最鍾意必須要係自己。
依首歌都係講依樣
https://open.spotify.com/track/653AyXRRGp0dKgrUTve1XH?si=j5vvgb4mT_Cqd3SM7rOTeA
Jayden! Of coz mami loves you the most 啦！ 你都要最love mami 喎，咁就good good boy 喇😘