［作為一個非螢花fans，睇完成季《足球女將2》後嘅小小感想］

首先我要好誠實咁講，雖然我呢個page係專講女足，但上年我係對《足球女將》唔係好感冒，自然更加稱唔上係呢個節目嘅fans。 當時我冇特別係追睇，一嚟人在外國唔係幾方便睇到。 二嚟本身自己都唔係特別好呢類育成類嘅真人show。 三嚟有話直說，我就真係對Viu搞呢套嘢嘅方向同目的有保留。 因此，第一季時我偶爾都會睇到啲討論，但真係冇特別去追看。

而到S2，我都好老實講，唔係因為有由我以前睇港超時已經有留意開嘅Cathy @cathychek 參與，我可能都唔會特別留意呢個節目。 但當我睇落，一嚟都真係拍得幾好。 二嚟真係睇著一班初學者由一啲基本概念都唔識，到一路都有所進步，個過程係吸引嘅。 三嚟Viu今季加咗一班以前都有踢波，但因唔同原因（主要係傷）而冇再踢一排嘅人入節目（即係包括埋Cathy sosad），咁睇著呢班球員由冇再踢波，到重新喺球場搵返足球嘅樂趣，當中嘅心路歷程係幾動人嘅。

當中最深刻嘅一集，相信好多人都同我一樣，就係第14集，節目訪問恆仔嗰part，而恆仔真係真心話講晒出嚟，講出喺香港嘅女足有咩難處，甚至係去到同近年已經有改善嘅男足一比，個關注同資源都係差十萬九千里。我唔會喺度反駁啲咩「咁女足冇人睇就自然冇資源」、「女足真係唔好睇」呢啲觀點啦，正如我自己都唔算係螢花fans，好多嘢個人觀感就冇得逼嘅，只係呢一集出街後，我就真係開始睇到呢個節目嘅最可貴之處，就係「讓女足俾大家所看見」。

不論係由恆仔同其他唔同現役球員親口講出現時女足，特別係喺香港發展嘅難處，定係因為有阿K阿Lay喺教練團，繼而成功引起到大家對早前香港女子甲組聯賽榜首大戰嘅關注，以至到我自己碌Threads，真係開始見到有唔同嘅女仔嘗試招人一齊組隊踢波（雖然我唔敢肯定佢哋一定係受《足球女將》所啟發啦），正如上面有講，喺本身好多人都仲係對女足有一啲成見時，呢個節目至少真係令觀眾，有啲甚至平時連波都未必睇嘅人，可以睇到香港，以至呢個世界係有女足嘅存在，而且真係可以好好睇。 甚至係即使蚊型page如我，都真係有人入嚟問點入坑女足，呢點係令我有啲驚喜之餘，亦係有啲安慰。

S2咁就完咗，不論係純粹呢套節目會唔會有S3， 繼而女足會唔會仲持續有更多人關注都好，《足球女將》呢個節目都已經可以話係超出晒好多人一開始嘅期望。 當然，喺節目定我上面提到，女足所面對嘅困境，以至係大眾對女足嘅成見就唔可能單靠一套真人show就改變到。 要keep著大家對螢花，甚至係女足係關注熱度，都真係好靠唔同嘅有心人堅持落去。 我自己就好簡單，就真係希望有更多人可以欣賞到女足嘅精彩同美妙之處。

最後就分享一個自己好一廂情願嘅S3（ 或者單純番外篇）嘅想法啦。 雖然都有好多人希望螢花會踢埋正式嘅聯賽，但睇咗唔同嘅論點，加埋自己一啲好淺薄嘅認知，我其實就係偏向S3唔好踢聯賽，至少唔係足總嘅正式聯賽嘅。 既然係咁，下年係女子世界盃年，不如可以試下有啲集數直頭衝出香港，去到日本、澳洲，甚至係歐美等女足發展算係比較成熟嘅地方，參觀下當地嘅聯賽，甚至係同當地嘅社區球隊交流下，順便咁樣去谷下現時喺Now都有得睇嘅女足各大聯賽同女子歐聯。

當然咁搞法，一嚟經費一定係會上升幾個層次，Viu會唔會有咁大想頭呢。 二嚟Viu係咪真係想發大個節目去呢個水平，或者佢哋真係諗過用呢個show嚟推女足呢？三嚟都幾重要嘅係，Now/Viu會唔會播下年嘅世界盃呀？ 一切太多未知，而且純屬個人一廂情願嘅狂想，但反正都係空想，諗大少少都無妨呀！

📸：@sportsroad.hk

估唔到有人（除咗身邊朋友）因為睇我，而願意去睇一個節目🥹 好感動，會繼續努力💪🏻💪🏻💪🏻💪🏻💪🏻💪🏻💪🏻💪🏻💪🏻

好認同，其實S1好明顯睇到製作團隊不停借位講香港／女子足球／運動員／追夢的人 嘅困境，心底很好，真係唔只想做真人show

我覺得既然有全民造星咁多季，其實俾啲資源去足球女將拍落去都有得諗，因為我開始覺得全民造星已經冇話題性，甚至乎我覺得悶。（純粹個人睇法)

好文 留友看

第一季已好值得睇, 我都是叫人追看, 應先看第一季

我同意S3如果有資源，係可以試下衝出香港同其他國家U隊比拼，始終電視節目係要噱頭先可以吸引觀眾，尤其S2做得咁好成績要突破真係要更多心思。但係要螢花成為一支正式球隊，都明白大家睇完終極係會有呢個念頭，但諗深一層呢樣嘢要好多單位配合，特別係球員同教練，如果出嚟個效果有落差，以香港人嚟講熱潮好快就會消退，亦未必可以繼續推動女足。所以應該節目還節目，體育還體育，臨近世界盃viutv可以先將兩樣加埋放大足球熱潮，同時將螢花球員多啲亮相獲得更多贊助成就S3呢件事，相信一直有螢花，香港女足就會容易俾人看見。

啲相影得好好🫵

多謝 @sportsroad.hk

希望有S3
衝出香港🇭🇰交流又好，參觀又好
每個地方5-8個人出發應該夠做

如果可以搞幾場賣門票友誼賽，等更多人留意螢花/女足

樓主係咪大陸人來「好感冒」呢啲支語都用

原來「好感冒」係支語😂我睇到既時候仲以為打錯字，因為我睇唔明。

台灣同中國原來有唔同意思。長知識🤭

幫手推流量