📌 P牌仔感謝全港各位路
共 78 條紀錄
P牌仔感謝全港各位路面師兄師姊關照
唔想影響人，早排一兩星期都夜晚10點後練習，亦都搵左師傅補兩三次鐘，終於呢幾日假期膽粗粗日頭出車揸，知道自己路面經驗不足，或多或少都會在唔同程度上影響其他道路使用者的駕駛體驗，非常抱歉！
但香港司機都冇我網上見到嘅咁差劣，至少呢幾日都感受到大家對P牌仔既包容，我遇到好多好人，咪錶前後司機讓多啲位我拍、商場泊車搞好耐都冇問候我媽媽、切線讓我、唔推我頭….多謝大家！非常感恩！
請問大家有冇金石良言可以醒下P牌仔？不勝感激
P牌仔+1，老母（30+年香港大陸駕駛經驗）教落特別受用如下：
1. 行新路就係停車場睇定路線先，知道邊到單白雙白
2. 揸慢線永遠冇人話你（高速公路跟巴士最方便，佢哋同你一樣頂磅行70）
3. 最阻人係泊車個陣，一定要摸熟架車嘅寬度長度，攞幾多位等等（夜晚自己泊下咪錶就會識）
4. 打多啲燈冇壞
5. 駕駛態度要保守，魯莽揸車20都可以車死人
6. 慢唔代表安全，安全速度係大隊嘅速度
7. 小心的士小巴，佢哋會接客急剎車
8. 見到大車行快啲，一定要避開佢哋嘅盲點
9. 俾啲信心揸車，你張P牌係一張無敵擋箭牌
10. 裝個車Cam，萬一唔好彩，都有片旁身
11. 你同前面架車距離係要睇到佢架車嘅後碌
12. 綠燈唔代表可以直衝，要留意啲人無啦啦衝出黎
13. Brake早少少慢慢踩落去，你做招財貓唔緊要，後面Dup唔切撞埋黎先煩
暫時記到咁多，諗到再講
多謝留言😀🙏🏻
剛剛google查找拉龍意思，係同前車預留五至10個車位距離是嗎？西沙路點解要拉龍既？
你會搵師傅補鐘，證明你駕駛態度都唔會太差嘅。
加油，出入平安。
除超越前車外，靠左行駛，唔好霸住條快線，無論任何時刻，係咪高速公路都好，靠左行，除非你右邊離開道路
要真正學識善用左鏡，cut 線真係要擰頭架！唔好一次唔成功就驚❗️要慢慢做到經常睇鏡，時刻掌握路況❗️呢D 都要慢慢累積經驗，加油💪
-有人讓完你cut線除咗舉✋🏻可以打2-3下死火燈表示多謝
-嚟遠見到前面慢車/塞車除咗收油可以打幾吓死火燈俾signal 後面嘅車，因為佢未必睇到前面
-出迴旋處/ 讓線望完右記得望前，隨時前面架車急停你俾油就撞
-留意新舊式迴旋處，跟地線係無錯，但cut出出口前都望下左面有無外線L
-停車位尤其咪錶泊之前最好望下附近有無車停定一段時間，有嘅話問吓人係咪排梗隊先
-錶位full哂而泊咗喺錶位就儘量唔好坐喺車等 (就算入咗錶)
-熄匙 撻匙開車 轉前後波/P波，都踩住brake 慢慢鬆，make sure 架車唔會溜前溜後
收到，有時係高速公路見到側邊啲車全部蓬蓬聲勁快，要深呼吸保持冷靜😮💨
1) 上高速唔好聽人講咩「大車左線，私家車中線」，而係一直靠左先啱
2) 小心自己有冇著左高燈照到人
3) 揸慢啲無問題，唔好心急做錯決定
4) Cut線一定要擰頭睇清楚，慢慢你會發現其實盲點大到足以成架電單車睇唔到
5) 覆俾5蚊: 夜晚會睇唔到，可以選擇閃兩下死火燈示意「唔該/Sorry」
收到！
請問架車d燈係Auto既話 係咪就唔駛特別開關高燈？我冇特登開過高燈，聽師傅講係入隧道先需要，不過我見入隧道又見到路，就冇特別開到🥶
當白線與路膊之間有較大空間（大路肩）既路時，可以逐d嘗試一直貼住白線行（但不踩線），聽落有別於學車時所教既行路既正中間，但其實貼邊行先會有意識而主動地練到路線修正能力以及左右空間識別，對於將來你行好窄既路、多車密集、雙向單程等等既路都會有幫助。
直線練好之後，再進階就係練轉彎貼線，對於將來遇到市區燈位轉直角彎、狹窄停車場轉彎、窄位泊車都有幫助。
當直線同轉彎時既路線修正能力都練到變本能後，你會感覺所有路響你眼中都好似比以前闊左好多（純感知上）
理解，多謝賜教，的確係好方法，請問係貼右邊線定左邊線練習？
隨意，大原則係揀一個對你、對其他道路使用者都相對安全既時機and環境。例如上述提及近路肩既白線（多數為慢線左邊），路肩如無特別正常唔會有其他車輛（但有時有死車，所以都要留意前方望遠）+容錯率空間較大，你就算失誤踩線、過線，都唔會hi花碰撞（無路肩既話直接係路膊or牆or欄杆），其他車亦唔洗捉摸你會唔會cut過線而要收慢或避你從而受影響。
初期唔夠信心就揀慢速路段先練，or到你行單線單程既路咪先再練下挨右邊。
可以淘寶d細細地可調角度既側鏡，對住後輪輪胎接地處，就可以清楚檢視貼線情況。練熟後唔再需要時，個鏡又可調角度對向盲點，變成幫你睇盲點（只係幫，最穩陣都係需要擰頭）
明白，左邊空間感真係較弱，特別轉左彎。多謝詳細解說🙏🏻
你唔過港島 唔怪得之你未感受到香港真正駕駛文化
完全唔會有P牌優待
😂😂
暫時未去到理解高速的樂趣層次（主要人細膽），仲係享受緊操控感🙈
唔知你買嗰架車係新車定舊車
起碼一個月檢查一次呔氣… 放定呔氣泵喺車上會比較好。（小米都有出類似嘅嘢）
單程路多望鏡唔好拉龍，有巴士站/避車處可以讓一讓俾其他人… （以免有啲心急人抽頭嚇親你）
唔熟路就睇定地圖先，就算喺香港，寧願用高德都唔好跟Google Maps…
泊車準備好八達通 （一般人都唔介意你埋到位先拎出嚟，但係好介意你唔記得幫張八達通增值），泊車唔夠手長就買定枝棍仔幫手～
收到😉
舊車黎，個呔充夠完，幾日又好似好快漏咁🫠擺定手提泵係車幾好
揸幾日就去買左枝八達通棍，係閘到見到後面有車好緊張，有枝棍冇咁手忙腳亂🤭
其實網上見上嗰啲衰人只係佔少數、因為有bias。揸多啲、真係有咩做錯畀個5、多數都冇事。行錯路最緊要兜多個圈、唔好亂cut。
加油，搵熟嘅地方練熟晒手車先，再去少人少車d 地方又再練
如果喺附近行圈，有人喺附近，打死火燈，左燈 俾人過咗先就會無咁大壓力
唔好鬥氣，遠離的士小巴，小心單車廢老痴線佬
揸快小小唔該，速度保持係牌加五就冇人理你
牌加5-15只係罰錢
高速就行慢線
記得睇地線
收到🫡
早兩日係屯門公路下段，有幾位伯伯踩單車，本身佢踩係左線既邊邊，我諗住借少少右邊線過咗佢，伯伯突然踩到正中間，雖然距離好遠但都嚇死寶寶🥶好彩右線冇車
記得cut線之前要打燈同俾5蚊，同埋睇下係咪雙白線先好cut
泊位嘅嘢，因為架架車睇位都有偏差，要泊多D，掌握到架車盲點同鏡點樣互補就會好
泊商場位，落車之後影返車位number同附近lift lobby相，攞車嗰陣唔怕行錯路搵唔返架車
收到，多謝貼士！低B一問，請問俾5蚊係咪用左手？右手其他司機睇唔到？
邊隻順手就用邊隻、你冇黑玻璃嘅話多數都見到的。有啲會開窗伸隻手出去、但係個人認為冇乜必要
人地要過你，就用佢自己技術過你
唔好俾人迫兩迫，閃兩下燈就騰雞
最重要穩住自己堂軚，跟自己節奏揸車
永遠記住：揸車只為代步。咁你遇到咩人咩事，心境都可以保持平靜
行錯路可以繼續直去，唔洗急，總有慢慢回頭的另一條路
搵個冇人既地方 熟習一下自己架車同物件既距離 例如左右鏡 咁你cut 線拍車各樣都幫好多
香港大部分司機都好人嘅，小心駕駛，唔好鬥快，平安返屋企最緊要
其實香港好多好人嘅，我記得我P 牌第一次自己揸車出去，入咗新高登個停車場。啲師兄見我柒柒下咁，都幫手教我要點泊！
睇下fai sir d youtube 片， 好有用， 特別係口水片
揸車搵食嘅我表示上面師兄講左好多唔重複， 只想講如果用GPS 導航的話 miss 咗路口或者入錯線唔好夾硬cut，更加唔好停係路中心搵路，GPS 識修正路線帶你去到目的地，最多兜遠d同時間耐d，記住唔好好似FV FU d 撚樣咁亂鳩咁嚟做馬路炸彈
我近排都係P牌初上路，但感覺都好friendly 🙏🙏 可能因為係紅日？
單純摸熟部車嘅建議非繁忙時間行下荃灣至深井嘅青山公路
沿路有齊迴旋處上落斜泊位50 70路段
車流唔太多唔怕阻到人
熟左架車視線同大概有幾大先再探險都唔遲
行超過70嘅路請留係左線乖乖行70
佢地急會自動爬頭 單線行車有一推你請去避車處讓一讓
大埔工業村星期日幾好練調頭泊車個啲
無睇comment唔知會唔會有人講過 但單線路（例如大山 西沙）後面拉龍記得入避車處
明白🫡讓一讓後面既車過先
唔好意思請問大山係指邊到？
師兄，呢幾日長假期小左好多中港牌車手同炸彈，下個禮拜六日先係真正香港駕駛體驗🙂↕️
新P牌趁呢幾日香港無車揸左幾轉，
第一日揸唔記得開燈會提我，行高速左線揸70都無閃我無呠我。試過唔夠位cut線，有架貨車係後面幫我擋仲閃燈比我出，真心會令新手無咁驚🥰。不過最緊要都係提自己要小心冷靜