《設計界雙雄嘅慢動作葬禮！Adobe 同 Figma 一步一步將自己送入歷史》
2005 年，Adobe 股價 30 美元
2021 年，高峰期 700 美元
2026 年，僅剩約 250 美元 。
Adobe 股價腰斬，但收入仲增長（Q1 FY2026 收入 64 億美元，按年升 12%）。呢個「業績靚但股價跌」嘅詭異現象，喺華爾街行話叫做「Pricing in Future Decline」。即係分析師唔睇你而家幾好，而係睇你五年後幾衰。
而 Adobe 嘅故事，同IPO 後一路潛水嘅 Figma，正係呢個 AI 時代最精彩、最殘酷嘅商業故事，呢兩間公司正一步一步被時代邊緣化。
第一層拆局：Adobe 的原罪
Adobe 喺設計軟件業橫行咗近 40 年，係業界無可爭議嘅霸主。Photoshop、Illustrator、Premiere、After Effects⋯呢啲名字，對任何設計從業員嚟講都係「神級工具」。但正正係因為太霸主，Adobe 患上咗「帝國病」。
佢哋每一次面對挑戰，反應都係「收購對手」，而唔係「自我革命」。2022 年，當 Figma 喺協作設計市場爆起，Adobe 嘅反應係：「俾 200 億美元收購佢囉。」
呢個決策，算係 Adobe 近代史最大戰略失誤。
第二層拆局：「200 億換 10 億罰款」的世紀大蠢事
2022 年，Adobe 以 200 億美元天價宣佈收購 Figma。當時全世界嘩然，因為 200 億美元係 Figma 年收入50 倍 P/S，係科技史上最貴嘅收購溢價之一。市場點反應？Adobe 宣佈消息當日，股價即跌 17%。投資者即刻知道有問題。然後，歐盟同英國監管機構入場調查，話呢宗交易會消滅設計軟件市場競爭，最終拒絕批准。2023 年 12 月，Adobe 同 Figma 宣佈放棄交易。Adobe 要向 Figma 賠付10 億美元分手費 。
10 億美元，連 Figma 一條毛都冇攞到。
但更慘嘅係收購失敗之後發生 。Figma 將呢場「被收購失敗」包裝成一個「英雄故事」，公關大做文章，用成件事証明Figma 自己嘅威脅同能力。終於Figma 2025 年成功 IPO。
第三層拆局：AI 颱風殺到
2023 年，Midjourney、DALL-E、Stable Diffusion 橫空出世，一夜之間令「圖像生成」變成人人可做嘅簡單易事。Adobe 見狀知驚，即刻推出 Firefly AI 生成功能，試圖搭車。但問題係：Firefly 嘅競爭優勢喺咩？「版權安全（Copyright-safe）」。
呢個優勢對企業客戶係好嘢，但對普通創意工作者同學生嚟講，當時Midjourney 嘅生成質素更靚、更快、更有創意。而且愈嚟愈多 AI 工具直接嵌入 Canva —— 啱啱好係 Adobe 喺非專業市場嘅最大死穴 。
無可否認，Adobe 正面對「三線全面被圍攻」嘅死局：
1. 頂端（高階專業）：Figma 喺 UI/UX 設計已成新一代行業標準，大量科技公司將 Figma 定為唯一指定工具，Adobe XD 形同廢物 。專業設計軟件Affinity 被Canva 收購後更完全免費，對Adobe絕對係一大威脅。
2. 中端（普通商業設計）：Canva 憑藉更易用、更快、更平，配合 AI 功能，蠶食咗大量「夠用就好」嘅中小企市場 。
3. 底端（個人創作）：Gemini Nano Banana、Midjourney、Runway、CapCut —— 呢啲工具完全繞過 Adobe 整個生態，直接從源頭奪走下一代用戶。更要命嘅係，Adobe 嘅 AI 功能雖然有用戶採用，但大量 Heavy User 係透過「促銷免費試用」入場，未有轉化成真實收入 。
第四層拆局：Figma 的隱憂
好多人以為 Figma 係呢場戰爭大贏家。但絕對係錯。Figma 嘅護城河，建基於「協作設計流程（Collaborative Workflow）」。佢喺 UI/UX 設計師同 Developer 之間嘅溝通，建立咗一個極難替代嘅「中間橋樑」。但 2025 年 Config 大會，Figma 宣佈大幅擴展 AI 功能，包括「自動從文字生成 UI 界面」。問題係：如果 AI 可以一秒鐘生成一個 UI prototype，傳統「設計師喺 Figma 逐格逐格砌 UI」工作流程，仲有多少存在必要？睇吓 Lovable 等新興AI UI 軟件就知點樣完美打低 Figma。
Adobe 同 Figma 嘅故事，係每一個靠「工具壟斷」建立嘅商業帝國，最終必然邁向嘅宿命。Adobe 嘅帝國用 40 年建立返嚟，但俾一場 AI風暴，喺短短幾年內剝剩一半江山。對創意從業員嚟講，最殘酷嘅啟示係：「精通 Adobe 工具」，已經再唔係一個可靠嘅職業護城河。人最值錢嘅，始終係「策略判斷力」同「創意洞察力」 —— 呢兩樣，AI 同任何軟件公司都攞唔走。
Adobe 唔係輸俾 Figma，Figma 亦唔係輸俾 AI。而係兩者都輸俾同一件事 —— 「停止進化嘅成本永遠比你預期高」。咁你又覺得 Adobe 同 Figma 仲可以點樣自救啊？🤔
好多人呢半年inbox 問我，如果諗住學多啲，學深啲，再睇遠啲，有冇得 keep 住 update？我為咗將主動權攞返喺自己手，我喺特登開咗個【五分之一杯咖啡 join 一個月，一杯咖啡 join一年】嘅「內部通訊」名單，而家限時Free Trial 7日。當大家交個朋友，請我飲杯咖啡，未來有更多獨家更新俾大家，等大家行少啲冤枉路👇
https://buymeacoffee.com/finplayer_ceo
睇完都唔明想咩… 仲用adobe XD做例子… 明明XD係2023年已經被Adobe放棄咗…
再者AI同PS都有ai功能，而且功能誇張到好恐怖，再者用AI檔印刷基本上係好難取代。同時adobe一向都唔做低端市場，which Canva都係for非design專業人士用多
總結一下先，Adobe嘅SaaS係以「乜都做得到」嘅定位存在，通常都係專業人士使用多，所以難用都幾難避免。但Adobe錯在低估咗UI呢行嘅可能性，比Figma食咗頭啖湯，所以已經追唔切而放棄咗UI市場，而Adobe股價低迷係因為市場上多咗好多SaaS而分散咗注意力，即管睇下其他新product係咪搶到專業designer轉會，定係班designer唔想增加學習成本而繼續用Adobe啲嘢
PS: 我都好憎用adobe嘅嘢，又貴，但用慣手勢好難轉會
佢個訂閱/退訂手法低級到唔講以為係咩垃圾軟件，睇依間野唔順眼好耐
Have a look at Google Stitch.. both of them could go away soon
最主要係，需要用到專業軟件黎做嘅media 越來越少
Print 嘅嘢差唔多冇晒咁滯，冇人俾錢影高質廣告相/片，網站全部都係罐頭
唔係話Adobe軟件唔勁，但現實係越嚟越少機會要用咁勁嘅軟件
我係設計師，工作效率黎講，只有Photoshop值得留，PR同Audition 非常繁瑣，平時剪socia l media片，capcut好用百倍，illustrator 依家只係用係最尾output階段。不過，用咗幾十年adobe,真心有感情。用PS同AI已經成為肌肉記憶
Figma pre ipo 吹得太勁了….真係一路喺度潛水…一啲都唔覺得佢係一個好用嘅designer tool.
Figma… 我淨係識佢啲可動figure屌打隔離笨大嘅shf(誤)🤡😂
當然都可以話係又一細公司屌打大公司嘅case