【3月26日 晴天 第四場的記錄】
今朝聽證會上半場有六位居民作供。第一位吳女士話大維修期間每朝八點幾都聽到有嘢跌落，平台有煙頭有建築廢物…防煙門仲試過推唔開!CLS防煙門推唔開係咩玩法！聽到好嬲！第二位王女士係第一個打999嘅居民，逃生之後去咗廣福邨親戚屋企，喺嗰度望到火勢失控，消防員灌救但啲水去唔到2樓，最終成棟大廈起火

第三位係八十幾歲嘅冼婆婆。佢講返當日一個人喺屋企，開門見到走廊全部都係黑煙，即刻諗計自救…開晒抽油煙機同風扇，成個人都好驚，聽到999台警察用好和平嘅語氣安慰佢先至放鬆咗少少。後來消防員到咗，四個人幫佢戴面罩，仲奇怪點解佢間屋冇煙，知道婆婆嘅方法之後即刻比咗四隻手指公佢。落樓梯嗰陣，消防員仲提婆婆話12樓有個大公仔，唔駛驚跨過去。婆婆話知道嗰個「大公仔」其實就係一具遺體，後面兩個消防員帶走咗具遺體，覺得雖然人已經走咗，但早啲帶離現場，屋企人會好過啲，唔會再二次、第三次被蹂躪。聽到呢度我真係眼濕濕，心痛到爆。婆婆最後話，一生人未必好長，但永遠都會記得香港嘅消防員，係香港嘅驕傲。聽到呢句我即刻喊咗出嚟。婆婆您都好叻，一定要健健康康，將香港人嘅故事繼續講落去..

之後仲有幾位居民作供，張先生講返當日，煙湧入屋絕望到爆，到夜晚八點..有消防員敲門，形容見到頭頂燈光好似天使咁，嗰刻以為自己死咗...鄭先生就話之前已經好多次見到天井有發泡膠同垃圾，仲投訴過，但火災當日發泡膠仲封住窗...陳先生講到火災當日逃生，全程冇聽到火警鐘聲，管理處亦冇用大聲公叫人走..仲見過工人做野個陣食煙，覺得承辦商監管有問題..聽完之後好多人應該同我一樣覺得痴線..比咁大筆錢維修，換嚟發泡膠封窗.比錢管理處有事就幫唔到手!!

法庭線有訪問過婆婆，有過相關報導

你講完我都有搵返嚟睇 婆婆真係好叻女

呢位婆婆先係真正“說好香港人故事”既婆婆👍👍👍

呢位真係婆婆好叻

🙏🏻🙏🏻

🙏🙏🙏感謝師姐，原來已經第四場

婆婆好叻！

每次睇到婆婆同4個消防員嘅故事都眼濕濕 好叻女好叻仔🥲

我都睇過這個婆婆之前的訪問，原來用抽油煙機係同一人。