今個週六英格蘭足總盃將會上演八強戰。晚上7點45分首先有曼城主場硬撼利物浦，戲碼絕對係提早上演嘅決賽；去到深夜12點15分，車路士返到史丹福橋迎戰今屆最強黑馬維爾港；跟住深夜3點正，修咸頓就會喺主場越級挑戰阿仙奴！

1️⃣ 4月4日 19:45 曼城 vs 利物浦

曼城上仗喺聯賽盃決賽以 2:0 擊敗阿仙奴，下半場靠尼高奧拉利短短幾分鐘內2次後上入楔頂入，協助哥迪奧拿再添一盃。贏波事小，最重要係曼城喺大賽搵返最擅長嘅控制節奏、兩翼推進同後上殺入禁區嘅板斧，士氣肯定大振。相反利物浦上仗聯賽作客 1:2 不敵白禮頓，韋碧克梅開二度，紅軍只係靠卡基斯一度扳平。整體表現依然偏向被動，近3場聯賽只得 1 分，走勢明顯滑落。

雙方今季最近一次交手，曼城作客晏菲路以 2:1 反勝，當時貝拿度施華同夏蘭特尾段連環建功。雖然利物浦今仗有望迎來沙拿復出，對右路進攻同埋門一定有幫助，但門將艾利臣依然上陣成疑，上仗正正因為缺少呢兩大主力而吃盡苦頭。面對啱啱捧盃兼狀態回勇嘅藍月亮，紅軍想喺伊蒂哈德球場反客為主，難度極高。

今場勝負關鍵在於曼城能否利用中場控球將利物浦壓制喺半場。只要紅軍前場第一波逼搶唔夠狠，洛迪或貝拿度施華就好容易控制大局，將個波分去兩邊拉扯防線。就算沙拿趕及披甲，狀態亦屬未知數；加上曼城啱啱踢完決賽，對住呢種一場過嘅生死戰，戰術執行力絕對信得過。今場主隊秤先少少。

阿Lo推介：全場讓球 曼城 （-0.5/-1）上盤

2️⃣ 4月5日 00:15 車路士 vs 維爾港

車路士上仗聯賽作客愛華頓大敗 0:3，失波過程相當肉酸。先被比圖單刀笠入，之後中場甩波再畀比圖入多一球，尾段再被尼戴耶禁區邊彎入死角。全場藍軍空有控球率但製造唔到實質威脅，門前把握力同防線保護都錯漏百出。英甲球隊維爾港上仗就喺主場 1:0 擊退保頓，佐治賀爾接應積謙希迪利妙傳冷靜射入，憑住前場逼搶同全隊拼勁力保勝局。

車路士賽前傳來好消息，多名主力已經復操。迪納普、加拿祖、拉維亞、艾斯迪華奧、杜辛、巴迪亞舒尼同韋斯利科芬拿都有參與訓練，意味住藍軍輪換空間比上仗充裕。面對維爾港呢種踢法直接、硬淨嘅低組別球隊，車路士只要唔自亂陣腳，穩住後場第一腳出波，再利用球員個人能力慢慢撕破密集，主場晉級應該冇難度。

阿Lo推介：半場主客和 車路士 主隊勝

3️⃣ 4月5日 03:00 修咸頓 vs 阿仙奴

修咸頓上仗英冠主場 2:0 輕取牛津聯，開波僅 6 分鐘拉連就接應費路斯右路傳中撞入，13 分鐘舒亞查理斯再喺 30 碼外第一時間狂抽破網，閃電拉開比數，完全控制大局。呢場勝仗令修咸頓各項賽事錄得 14 場不敗，狀態弗到漏油。阿仙奴上仗就喺聯賽盃決賽 0:2 飲恨不敵曼城，全場被對手拖住節奏嚟踢，眼白白睇住錦標溜走。

牌面上身處英超榜首嘅阿仙奴當然超晒班，但兵工廠今仗面臨嚴重嘅陣容殘缺問題。國際賽期後，阿迪達陣中有多名主力提早退隊或需接受治療，包括沙卡、迪格蘭賴斯、馬杜基、沙列巴、加比爾、添巴、杜沙特同奧迪加特，連蘇比文迪都因為膝傷返球會。前中後三線都可能要大洗牌，球隊嘅壓迫強度同中場控制力勢必大打折扣。

修咸頓主場氣勢強勁，從上仗可見佢哋兩翼傳中同中場後上極具威脅，絕非一味死守。阿仙奴喺殘陣之下，要作客呢個地獄球場輕鬆過關絕對唔易。考慮到修咸頓走勢凌厲，加上兵工廠人腳變數極大，今場就算贏波都好難出現大炒格局。

阿Lo推介：全場讓球 修咸頓（+1/+1.5）下盤



入場及投注人士須年滿十八歲，切勿沉迷賭博。