以我朋友嘅慘痛經歷，警惕大家:辦白事搵中介，千萬要小心!
我有一位好朋友近日離世，留下一個仲好後生、乜都唔識嘅女。個女好想幫媽媽做得好睇，盡 最後嘅心意，點知就因為咁，俾人當水魚咁劏，仲要受盡氣。
佢經朋友介紹，認識咗一個殯儀中介，叫「花姐」(化名)。就係呢個人，將一件應該莊重嘅 事，變成一個荒誕又憤怒嘅經歷。我寫出嚟，係想用朋友嘅教訓，提醒所有人，唔好再跌落呢 啲陷阱。
1. 強行指定殯儀館，仲要搬「報夢」出嚟
個女想媽媽同公公婆婆一樣，用返某間殯儀館。點知花姐第一日就堅持要用另一間。個女堅持 己見，結果第二日朝早七點，花姐就打嚟話:「你媽媽尋晚嚟咗同我傾偈，佢話唔要你揀嗰 間!」用先人嚟操控個女，呢啲說話都講得出?而且阿女屋企經歷過四大長老嘅白事，一早同 媽媽溝通好，知道媽媽係想用道教儀式，點知花姐竟然話「媽媽想要佛教儀式」，又係用「報 夢」嚟扭曲先人意願，完全係情緒勒索!
2. 聲稱八萬蚊「全包宴」
第二日，花姐就問個女攞五萬蚊訂金，話係「全包宴」，叫佢俾咗錢先會寫低包咩。個女雖然 覺得好似俾人呃，但係因為唔識，又信個朋友介紹，就照俾。結果俾完錢，真係一隻字都冇寫 過，連收據都冇，仲話:「你係我世姪女，唔通我會呃你咩?」
3. 無理指揮，態度惡劣
- 領屍: 冇預約，一個電話打嚟就話「聽日去醫院攞你媽媽條屍，唔嚟就要俾附加 費」。個女要即刻請假，無奈地跟去。
- 車頭相: 媽媽生前影咗張彩色相，花姐堅持唔用得，話一定要黑白。佢擅自將張相改 到唔似媽媽，個女話唔似，佢就發爛，話要用就要再收錢。最後個女自己上網搵人整 過張彩色相，佢又突然之間話得。
- 儀式: 個女想做道教，花姐就話做乜唔做佛教呢?個女堅持後，佢就一路單單打打， 話個女「唔聽話」、「好硬頸」。
4. 守夜當日，錯漏百出，侮辱先人
- 遲到: 約咗 3:30，佢影都冇，靈堂連先人張相都未有，得親友花牌到咗。殯儀館職員 都要周圍搵佢。
- 二手花牌: 佢訂嘅 15 個花牌，一啲香味都冇，百合有黃點，玫瑰就嚟謝，懷疑係回 收再用嘅。
- 寫錯姓氏: 靈堂牆上嘅黃紙同門口燈籠，個女嘅姓氏係錯嘅!之後連先人歲數都錯! 連基本嘢都做唔好，仲要大大聲鬧人，仲成晚郁手郁腳。
- 乜都冇準備: 佢預備咗三個吉嘅衣箱，反問個女「有冇嘢擺落去」，如果唔係就燒吉 盒。好彩個女自己喺淘寶淘咗大量紙紮品。
- 騷擾儀式: 喃嘸佬做法事嗰陣，佢不停喺度大聲講嘢，嘈到所有人都聽唔到法事內 容。
- 背後中傷: 佢喺親友面前講個女壞話，話個女「麻煩、固執」，又話女人唔可以擔幡 買水，但之後又自打嘴巴話自己好開通，最後惡毒地俾個女做買水，唔俾佢擔幡。
5. 大殮當日，繼續離譜
- 靈堂未拜先收錢，揭開公司真面目: 大殮當日，個女同親友去到靈堂，連同媽媽講聲 「早晨」、裝一炷香都未做，花姐就急住開咗張枱喺靈堂正中間，當住先人同所有親 友面前大聲催收尾數。個女當時成個人呆咗，強忍眼淚俾錢，先可以繼續進行儀式。 就係喺呢個混亂場面，我哋先發現原來花姐間公司叫「中 X 殯儀」。之後我哋上網 Google 返，先知呢間公司唔單止手法有問題，原來之前仲俾人淋過紅油，上過新聞! 如果早知係咁，點可能仲敢搵佢?呢啲嘢真係要自己查清楚，唔可以齋信朋友介紹。
- 偷走物品: 前一晚留喺靈堂嘅獨立包裝蛋糕、紙巾，第二朝全部俾佢拎走，仲話「啲 嘢唔可以過夜」，拎咗俾啲乞丐。
- 吉儀呃錢: 佢叫親友拆開吉儀，食咗粒糖，唔知點解係薄荷糖，然後將個一蚊俾返 佢。我即刻叫親友將啲一蚊收集起嚟捐咗，唔會俾佢。
- 再錯姓氏，極度無禮: 擔幡買水嘅燈籠，個姓氏又係錯!我叫佢換，佢竟然大聲鬧: 「關我咩事!女都做唔到擔幡㗎啦，嘥氣!」然後佢自己攞住個錯姓燈籠，吐兩啖口 水扮吹熄，連燈籠都吹唔著。
- 阻止拎車頭相，仲要亂帶路: 個女想自己拎媽媽嘅車頭相，佢都諸多阻撓，最後個女 堅持自己拎先得。之後個女拎住媽媽張車頭相，諗住跟住靈柩落地下搭車，點知花姐 又郁手郁腳想拉住個女向靈柩嘅相反方向，話要用親友嘅 lift 落去。好彩殯儀館一個職 員即刻同花姐講「唔係行呢邊啊」，先至避免咗呢一場尷尬。離開靈堂之後，有兩位 親友話俾個女知，原來花姐留低咗擔幡買水嘅燈籠同埋一支白色嘅紙棒喺靈堂，冇帶 去火葬場燒俾先人。殯儀館職員見到都幾憤怒，話點可能呢啲基本嘢都拎漏。個女聽 到之後覺得好尷尬，媽媽最後一程，連呢啲儀式用品都搞成咁。
6. 尾聲:連骨灰都幾乎被操控
- 火葬場嘅儀式五分鐘就搞完，求其到一個點。
- 個女想自己攞返媽媽骨灰，問佢拎骨灰紙，佢竟然話唔知咩係骨灰紙，仲要 sell 咩
「幫助死者上位，還俾祖師爺」嘅額外服務，盛惠$28,000。
- 最後個女自己攞返火化爐收據，先發現原來好多嘢根本唔係佢做。
- 隱瞞免費存放，再呃一筆: 明明先人骨灰可以免費存放在殯儀館直至上位，花姐完全
冇講過，反而叫個女將媽媽嘅骨灰放喺佢嘅道堂，每月盛惠$680。個女後來經其他朋 友先知道原來有免費存放呢回事，反問花姐之後，佢先至死死地氣話「媽媽係有資格 可以放喺殯儀館」。連呢啲基本資訊都刻意隱瞞，為嘅就係想再賺多幾個月嘅存放 費，真係離譜到一個點。
而家呢一刻，個女仲未拎到媽媽嘅骨灰，亦都唔知可以點樣幫媽媽上位。佢成個過程都唔敢同 親戚朋友講，驚人哋覺得佢蠢，覺得佢戇居，所以自己一個啞忍，俾人呃錢、俾人鬧、仲要俾 人喺背後中傷。
我想同所有人講，唔好覺得佢蠢。佢只係一個想盡孝、但乜都唔識嘅後生女。佢信任朋友嘅介 紹，喺最脆弱嘅時候俾人趁虛而入。呢個花姐嘅手法，係操控情緒、製造混亂、再從中取利。
我出呢篇文，係想用我朋友嘅血淚教訓，警惕所有人:
1. 辦白事一定要搵信譽良好嘅公司，事前上網查清楚背景，睇下有無新聞、Google 評論，唔 好淨係信朋友介紹
2. 所有收費同項目一定要白紙黑字寫清楚，唔好信咩「全包宴」就俾錢，收據都一定要攞 3. 唔好輕易信「報夢」呢類說話，呢啲好多時都係情緒操控嘅手段
4. 喺最傷心嘅時候，更加要打醒精神，因為啲衰人就係等你脆弱嘅時候落手
請大家幫手 share 出去，等少啲人受害，唔好再有人喺最痛嘅時候，仲要俾人再插一刀。