做咗幾年腸胃調理，我發現一樣嘢：
好多人個胃成日唔舒服、個肚成日谷住，唔係因為你特別難搞，係你每日啲習慣一路喺度整衰緊個腸胃
你以為自己淨係胃脹、頂胃、反酸、冇胃口、便秘
其實好多時唔係突然出事，係你長期咁樣生活，個脾胃慢慢俾你磨差咗
以下10樣，真係好多人日日中
1️⃣ 唔肚餓都照食
有啲人一到鐘數就食，
但上一餐都未落曬，下一餐又塞落去
個胃長期頂住頂住，
胃脹、打嗝、食少少都滯，就係咁嚟
2️⃣ 成日餓過龍
朝早唔食，晏晝又拖，拖到個人手震先食返
你以為冇咩，其實咁樣最傷胃
好多胃痛、反酸、食少少就唔舒服，根本就係餓出嚟
3️⃣ 食親都要凍嘢落肚
熱飯熱麵照食，但一定要配凍奶茶、凍水、凍檸茶
中醫睇，脾胃最怕寒
你餐餐咁樣凍落去，
消化慢、肚脹、便便唔順，好難唔出事
4️⃣ 食嘢太急
香港人食飯真係快到誇張
幾啖吞曬，冇乜點嚼
啲嘢一舊舊咁落肚，個胃咪焗住做
久而久之，食滯、頂住、胃氣多，全部都會出現
5️⃣ 夜晚先一次過食返夠本
日頭求求其其，夜晚先大餐補返曬
呢種人通常都係夜晚最辛苦：
胃脹、口苦、頂心口、瞓低就反酸
人想休息，個胃仲要開工，點會舒服
6️⃣ 一大壓力就胃痛
呢樣我見得太多
有啲人唔係食錯嘢，
係一煩、一燥、一諗多兩樣，個胃即刻抽住
中醫成日講肝鬱犯胃，
講白啲即係：你個人頂住，個胃都跟住頂住
7️⃣ 成日夜瞓
成日一兩點先瞓，
第二朝冇胃口、口淡淡、口氣重、肚脹、大便爛爛地，
真係好常見
你以為自己淨係唔夠瞓，
其實脾胃一早已經俾你搞到弱曬
8️⃣ 便秘都照拖
幾日先去一次，
去到又谷到面紅先痾到少少，仲覺得忍下就算
但腸道唔通，成個人都會唔對路
個肚脹、個胃口差、塊面差，甚至個人都會燥曬
唔好以為痾便便唔順係小事
9️⃣ 胃唔舒服就亂食呢樣嗰樣
一胃脹就食保健品，
一便秘又買酵素、纖維粉、益生菌亂咁試
問題係你個腸胃本身已經亂，
仲不停加嘢入去，
好多人最後都係愈食愈滯、愈搞愈亂
🔟 以為養胃=長期白粥麵包
短時間清淡係可以，
但長期咁食，個胃未必真係會好
中醫調脾胃唔係叫你一味戒到清曬，
係要食得啱、食得定時、食完個人舒服
唔係日日靠白粥頂住就叫養胃
好多腸胃問題最麻煩嘅位，唔係你今日胃脹一次，係你日日都喺度重複做緊啲傷胃嘢
真正要調嘅，唔止係胃嗰一下痛唔痛、脹唔脹，而係你背後成套習慣：食嘢時間、食嘢方式、情緒、作息、排便
脾胃一亂，成個人都會跟住亂
成日攰、面青青黃黃、個肚成日谷住、食完又滯、便便又唔靚，好多時根本唔係你「腸胃天生差」，係你每日都喺度慢慢磨爛佢
好多客都係忍到頂唔順先揾我，其實未嚴重到嗰步就應該處理㗎啦！你如果已經中咗2-3樣，PM我，我先同你講你而家最應該改邊樣！
咁你都算叻啦😂 中2同4都仲有得救！
最緊要係唔好畀佢變成長期習慣，唔係個胃真係會慢慢同你計數㗎！
你呢個真係中得幾全面🤣
最易出現嘅通常就係胃脹、頂心口、食少少都覺得唔舒服
睇下你有冇中埋，真係中得多就唔好再拖啦
中得呢啲都做嘢勁辛苦冇得adjust，邊個唔想隨時有時間餐餐慢慢嘆
呢個真係超多人都中曬🥲
唔係你唔想adjust，係個生活節奏根本冇俾你慢慢食！
所以先會愈拖愈胃脹、愈食愈頂，最慘係個人會慢慢習慣咗嗰種唔舒服，仲以為自己冇乜大問題添。
減少食飯同白面包之類嘅澱粉，狂飲水同食番正常菜量
啲澱粉落肚會產生氣，跟住就肚谷住谷住，重要番工放工少郁動就更加嚴重