📌 優秀，真係一種罪？
共 47 條紀錄
優秀，真係一種罪？
最近睇返《星期日檔案》講「三高女士」擇偶嗰集，感觸好深。
入面位年薪百萬、幫過法國總統預備晚宴嘅高管，喺職場入面無所不能，但講到感情，佢只係淡然講咗句：病到想暈嗰陣，都希望有個男人守護。
其實，呢份唔係軟弱，而係一種最基本嘅對等。
我哋呢代專業人士，好似跌入咗一個怪圈：
細個努力讀書，大個努力上位，為嘅係追求「選擇權」。點知爬到上去先發現，高處不勝寒，身邊可以並肩睇風景嘅人，反而越嚟越少。
入面有一個細節好扎心：
一對同樣係 High-flyers 嘅情侶，見面竟然要兩星期前預約。最後分手，男方話想要返個「簡單啲」嘅女人。
呢個就係最殘酷嘅現實 —— 社會教女人要強大，但傳統擇偶市場依然喺度獎勵「平凡」。
#三高女士 #專業人士 #擇偶困境 #星期日檔案 #不將就 #中環生活 #精英社交 #兩性關係
好多「三高」人士最後寧願選擇凍卵、選擇同貓過、或者放工瘋狂操練 Triathlons，都唔肯隨便搵個人「嫁咗佢」。原因好簡單：因為我哋拒絕「向下兼容」。
正如片中嗰位女士所講：「如果一開始姿態就擺得低，未來 50 年會更加差。」呢份唔係傲慢，而係對人生最後一點「質感」嘅堅持。
睇完呢集，我諗咗好耐：點解優秀嘅人，喺愛情入面反而好似受緊懲罰咁？
我哋每日處理緊幾百萬嘅 Deal，解決緊最複雜嘅專業問題，但面對「搵一個同頻嘅人」呢件事，竟然顯得咁無力。係咪因為香港太細？定係我哋對「精英」嘅定義太過單一？
我想聽下大家意見：喺你嘅專業圈子入面，你覺得「優秀」真係擇偶嘅障礙？
歡迎留言或者 DM 分享你嘅經歷，純粹交流下。
#三高女士 #專業人士 #擇偶困境 #星期日檔案 #不將就 #中環生活 #精英社交 #兩性關係
琴晚同朋友食飯，佢竟然話：『我唔敢話畀男方聽我搵幾多。』聽完真係覺得成件事好諷刺 —— 點解一個喺職場咁出色嘅人，返到去感情世界竟然要選擇縮細自己？
三高嘅男人往往唔介意另一半地位職薪，成為家庭經濟支柱，甚至財政支援另一半，唔會刻意要求對等。
三高嘅女人係咪一樣? 唔係嘅話可能需要反思一下 why not
人地包容你就得 你包容人就唔得
無相向既 仲講乜愛吖 成世單身咪幾好 人地又唔會欠你 你又唔會欠人
男人會選擇比自己差嘅異性，但女人唔會，咁地位同自己差唔多或高過自己嘅仲剩返幾多？有時男人對女人好，又唔會謀住女人啲錢嘅已經可以揀，但偏偏女人就係會覺得冇安全感，所以唔係獎勵平凡，係你哋將個機會讓比平凡
神又你鬼又你，感情就係唔會有兩全其美，喂～你唔好講到世界欠左你先得架，你搵錢叻唔代表你有乜特別，只係特別愛財咋，分分鐘生幾件個公屋師奶做人重叻過你，你自己咪喺度無病呻吟啦。
算唔算assume 咗單身係一種懲罰？If u assume 優秀係罪…
男人有錢會揀賢內助，幫佢生仔湊仔照顧屋企，唔會揀返女高層so sad but ture，女高層可以揀小男人。
其實有冇諗過社會話女人要強，係啲女權撚自己嫁唔岀，所以創造依套理論出嚟搵你老襯？
好多三高女士，到問佢屋企開支果陣，都係一蚊都唔會出。
男人就成日向下兼容架啦，多數係女人只肯向上搵，咁你top1%女人要求top1%男人，但top1男人都唔缺錢，你搵錢能力係佢黎講無咩value，不如搵個後生靚女聽話易配合架啦，約女都要appointment咁，你咪照做女強人囉，無問題架
其實唔關優唔優秀事，係婚戀市場中女性同男性嘅籌碼是不同的；男性的是事業，鈔能力，即社會中認為的優秀；而女性的是性能力（包括外表、身材、生育）為大宗，一個女性如果是能力優秀，那就是有點不太對題。
女人可以選擇做優秀的女強人，或者做簡單的女人，但男人沒有選擇，男人必須優秀
其實3 高女士真係唔明點解咩？ 唔洗咁 emo，咁文青講一大段廢話。
一個3高既男人可以接受18-40 既女人，3 高女士你得唔得 ？
一個3高既男人可以接受月入0-10 萬既女人，3 高女士你得唔得 ？
一個3高既男人可以接受冇學歷既女人，3 高女士你得唔得 ？
一個3高既男人可以接受個女人唔洗返公，3 高女士你得唔得 ？
男人選擇既pool 超級大，3 高既女士大部分都要同自己接近，咁個pool 細好多。我覺得眼角高，要求好，絕對冇問題，但係冇得怨 。3高對於女士選擇上唔係加分。
都係嗰句，你以為嘅優點係咪利他嘅？
你作為高管/女強人事業上幫唔幫到對方？喺家庭支出上會唔會幫輕到對方？
冇嘅話即係你嘅所謂優秀對對方嚟講係一文不值。
同埋呢班人通常會綑綁埋高傲、高要求，大部分人見到會即走。
宜家同以前唔同，所謂既“優秀“好多時俾盡都只係高級打工仔，加上AI，成個社會文化對於工作所帶黎既成就越黎越唔重視，一個係你地眼中“優秀“既男人根本就唔會去care個女仔做咩有幾叻，要既係個女仔識唔識care人，有無驚喜同可唔可以俾到佢真正既生活，偏偏呢班“優秀“既女仔最欠既就係呢啲，平日返工已經夠悶夠煩，返到屋企仲要同頻講生意？搵個簡單既可以一齊出去玩既仲好啦
唔關事
以港女嗰種計較尖酸刻薄唔係對方就想
根本出呢個結果合情合理
只係個女唔肯面對現實
歸咎於自己學歷高呀
要求高呀
喺度自欺欺人
首先我相信優秀嘅人揀偶應該有好嘅mindset。當一邊嘅職權/經濟地位明顯喺社會主導位置，佢揀嘅伴侶要具備乜嘢特質佢理應清楚。
High-flyers 揾 High-flyers本身就係攞黎搞，政商聯姻都算啦，一個冇家族傳產嘅high-flyers揾個高情緒價值&家庭關懷嘅後盾先係佢喺事業廝殺嘅最大保障而唔係膚淺嘅「差唔多收入=並肩」
龍力蓮都識揾送水輝啦，你覺得自己經濟上向下兼容緊另一半，另一半咩又係情感上向下兼容緊你，match(互補)咩得囉
男人搵會俾女人洗，女人搵會自己洗。佢三高同我有乜關係？
事實上好多女醫生，女ibanker, 富二代都結到婚，往往佢地另一半都十分優秀
所以呢班女人結唔到婚，應該唔係因為佢地太優秀定眼角高，而係作為一個伴侶佢地根本冇令人想同佢結婚嘅條件。簡單講係佢地性格太難頂
最主要原因就係男生天性願意向下兼容 女生天性慕強 所以愈上位既女性普遍愈難搵到自己岩心水既追求者 上位既男性則普遍唔會有呢煩惱
補充番 慕強唔係錯 而係選擇 無得既要又要
咩叫傳統擇偶市場？
其實每個人都有個人意志選擇。give and take, it’s fair
有冇男人出街去玩滾女強人？😂 你職場講到咁叻你都唔識sell你自己？都唔同market，你去同基督徒sell可蘭經？有錢佬有能力嘅搵女強人嘅咩？一間公司要兩個ceo做咩？
我見好多男人可以向下兼容，點解女人唔得？哩頭歌頌女權，果頭都仲係有一個攀附既心
女人以為自己搵到錢有多d選擇
對於男人黎講女人高薪根本唔係加分位，唔足以令你有更好叫價能力
一日唔認清呢點，一日都係條件錯配
一個人真正優秀係唔需要同人講你好優秀，節目中嗰 d "優秀女士" 開口埋口都係人工，錢，自己好優秀。。。
其實謙虛d，放眼世界，就會發現自己其實係好渺小。。。
唔係話唔俾女人慕強，而係女人會唔會「多元化」咁慕強，例如男人夠細心識氹人加照顧屋企（能幹貓嗰種）比有上進心、事業上成功更吸引，佢都可能會搵到呢類人做伴侶。搵一個補足到自己短處嘅伴侶rather than一個比自己更能幹嘅另一半。
同時就唔可能得一想二，又要人家有錢有事業又照顧頭家（那怕係2人定有細路嘅家庭）。
自已優秀好好，但自命清高，睇其他唔上，就唔係社會問題
咁咪唔好嫁囉有乜問題？幾時到你想點 男人就要接受？
好簡單講，優秀女士唔會向下兼容
只係想要同樣優秀既男士
但優秀既男士基本上全部女士任揀
女士既優秀，對同樣優秀既男士黎講唔係利他性
咁優秀男士做咩要揀你？
心態高， 眼角高， 年事已高， 除非你真係優秀到陸軍元帥級別， 唔係無謂折騰😅
點解呢套節目會包裝度港女搵唔到伴侶係佢哋所講嘅優秀學歷高事業有成
就係因為知道啲港女鍾意聽呀嘛
咁樣先有收視率
其實很簡單，因素可以有很多，但唔重要。"一"個字：舒服。
男人／女人，是一齊生活，唔舒服就算開始到都唔長久。長久都不是叫愛情。
你可以三高，但前題是相方相處得舒服。相反，你三低，相處唔舒服都一樣唔掂。
香港大把靚仔，不過從事低下層
貨倉酒吧嗰啲
佢哋都無咩不切實際的要求，就睇尊貴的香港女性肯唔肯屈就
女人拒絕向下兼容，但大部份女人都預設男人要向下兼容，雙標得可笑，可恥
一個想搵伴嘅男人睇嘅根本唔係睇呢堆3高……...3高自然而來對對人chur 反而是關係裡的毒藥。 一段關係唔會想要chur 同追KPI； 一個平庸，但貼地知人辛苦嘅MK妹反倒比所謂三高更適合過人世。