其實香港升職加嗰少少人工，對好多人嚟講冇乜嘢興奮。 真正令職場白領覺得人生巔峰嘅，係終於可以搬離出面嗰格又窄又冇私隱嘅 partition豬肉枱，入到屬於自己嘅經理房。終於有自己私人空間嗰一日，呢一世都會永記在心😎

以前喺出面partition做嘢，郁吓都要提心吊膽，明明做完嘢想睇吓 YouTube，都要練到神速 switch tab，驚死老細行過😨

而家？閂埋門入面就係你嘅天堂。你間經理房可以做到嘅嘢，同去日本嗰啲二十四小時網吧私人空間，完全冇分別🤣

你喺入面用 iPad 睇YouTube片、打機、同朋友煲電話粥，出面班細嘅完全唔知。最爽係咩？係你打完機，飲啖咖啡，行出去嗰陣即刻經理上身，好嚴肅咁同佢哋講：「呢排大家進度好似慢咗啲喎，要勤力啲啦！」😡 望住佢哋嗰種「係，經理，我會努力」嘅眼神，你差啲笑出聲

所以話升職最重要嘅成就感，唔係個名片銜頭，而係有咗間私家房，蛇王都蛇得專業過人。呢種「門內打機，門外訓人」嘅反差，真係爽到不得了。有無人明？其實有間房先係升職做經理嘅目標。 如果你有自己房，你會喺房度點樣蛇王呢？ 大家有乜嘢諗法，不妨分享吓☺️

唔使扮嘢，升咗職終於有自己房坐嘅，一定明白我講嘅係乜嘢😅

等我簡述吓有乜嘢可以喺間房入面自己做先

帶着耳機 睇YouTube 聽網台 睇Netflix
甚至睇足球直播
炒股票 打機 睇電子書 睇連登 玩Thread
同女神煲電話粥
叫下屬入嚟訓斥 又或者入嚟聽我演講
睇吓食評陣間晏晝去邊度食飯 諗吓今晚食乜餸
用zoom 教仔女做功課
睇旅遊網站買平機票計劃去旅行
上網睇樓盤
叫外賣買嘢食 喺房度慢慢嘆
種花 窗口前邊開個花圃

你一定會問，點解會咁得閒？ 好簡單啫，將啲工作大部份分配比下屬咪得囉，佢哋做咗八成，剩返嗰一兩成我補埋位，簽隻龜OK

所以真係忙到不得了🤫

忙到攰，去廁所行過圈，打個白鴿轉。返嚟嘅時候再去啲下屬面前，督促下佢哋要勤力做嘢

有時我返工得閒，喺自己間房度睇吓日劇，都有啲感想嘅🤫

其實有乜好怕？連老細都係坐豬肉檯，其他人都係照撳電話

咩年代🤣傾計叫埋老細一齊傾

點解老細都冇房坐㗎 ？你嗰間係咪日本公司啊？

歐資

去到board 先叫有房，而有房都係因為機密問題。Board 以下就算係C level 都冇房坐

其實就一啲問題都冇，亦都唔使避忌老闆

我全公司都係open office, 板都無，老闆管理層一齊坐，幾好呀，夾嘢傾job又方便，無事非無小圈子，大家都係做努力嘢無冗員。

好多舊式公司，仲有好多經理房總監房總經理房，好似經濟商務同埋頭等機艙咁樣咁大分別

無錯，呢種公司需要有強烈階級管理觀念。

經理實有房你坐？畀個後排位置你咋

而家銜頭通貨膨脹，不過如果升到做總監點都有房坐啦

Office都冇位佢坐 只係掛個牌係度都見過

即係升職只要俾間房你坐，一亳子人工都唔加，你都唔在乎？

你俾間房我坐加埋我銜頭，就算唔加人工，對我嚟講都係好大生活改善啦，因為我會按比例喺間房入邊 瘋狂蛇王㗎嘛