分享吓一個被前女友出軌嘅故事。前女友個反應都幾好笑，唔知點解我成日遇倒呢d女仔。

人活到咁上下年紀總會經歷過一d綠帽事件。派帽俾人有，俾人派帽自然亦都有。故事其實好簡單，當年我喺內地做嘢同咗個仲讀緊大學，細我好多年嘅女仔一齊咗三個幾月，大家基本上係半同居。個女仔係鄰近地區嘅人，間唔中會返吓去探親。有次返到嚟佢同我講佢喺等朋友唱K嘅時候俾仔撩，條仔誇張到係停架車喺鬧市嘅一條單程路落車問佢攞電話，有得後面d車砵，用群眾壓力逼佢俾電話號碼。女友話佢迫於無奈最終都俾咗個電話個男仔，但就同時Blacklist咗對方個電話。一路相安無事多幾個禮拜，女友話同個女仔friend去日本三日兩夜。個friend我都識，原本冇乜嘢，但女友去到日本變得好鬼鼠，講電話又趕住收線，又唔肯video call。去完個trip返到嚟頭兩日又唔願見面話攰話忙，之後過嚟我度過夜又成日掛住撳電話。我昅倒佢成日同個男仔喺度msg但睇唔倒內容。我有試過講笑咁問佢係咪識咗第二個，話唔緊架喎有嘅話大家好聚好散，佢堅持話冇。過兩日我心血來潮打咗去女友喺日本住嗰間五星級酒店博一博...

... 我用之前昅佢電話時見倒嗰個男仔名，話我漏咗個相機叫佢check 吓有冇。我報咗我前女友全名，同埋check in check out日期，話唔記得房號。酒店當然話冇見倒部相機，我話冇理由，又講到部相機裡面d相幾咁重要，叫佢confirm 一次入住人個名，話驚佢哋搞錯房號。可能因為我之前已經講咗女友全名，對方好自然就重複咗一次，然後順便講埋個男仔個全名。收線後我打去同女友對質，佢仲諗住狡辯，但見我連對方全名都知佢焗住承認。佢講咗一輪對唔住，見我冇出聲，突然話風一轉話想香港一個男朋友，返到去又有另一個男朋友，仲問我有乜問題。我反問佢，冇問題你頭先又道歉？冇問題你就唔駛講大話啦。講完分手後我立刻送返佢d個人物品去佢屋企就冇再主動同佢聯絡。

講真，當年喺內地我都唔係咩好人，但同咗佢一齊我確實一條心對佢，斷哂同其他女仔嘅聯絡。不過都係嗰句，綠帽呢家嘢人俾你你俾人，唔開心就梗㗎喇，或者係遇人不淑，又或者係報應，其實都冇乜大不了，反正當年喺內地每日都人來人往。

不過題外話，當年香港人喺內地好似有光環咁。一班男人出去玩，d內地女仔都會揀香港人而唔揀d又靚仔又有錢嘅同胞，有d莫名其妙。