📌 因為窮你做咗啲咩好卑
共 59 條紀錄
老豆生癌，免疫治療每個月要洗4皮，洗哂積蓄捱咗兩三年，冇哂錢，最後唯有同一位追求自己好耐嘅有錢肥仔拍拖
20歲嗰陣出嚟打散工
對方未出糧 喺尖東冇錢起身
厚着臉皮問港鐵職員
職員俾咗張單程飛我
然後同我講
呢張飛 唔係公司俾你 係我俾你嘅
細個屋企家境試過唔好, 暑假嘅時候去參加市政嘅游泳班. 阿媽日日畀$1.5 * 2 程來回車錢由屋企去泳池上堂. 我為咗慳呢程巴士錢,由屋企行去坐免費 香港仔-> 珍寶海鮮舫； 珍寶海鮮舫 -> 深灣嘅免費舢舨shuttle .... 本來十分鐘嘅巴士.. 變咗30分鐘遊船河一程... 嗰個暑假係坐到所有揸船嘅船長全部都認得我. 由第一日驚住畀船長鬧我坐免費船, 到後尾已經熟到等埋我先開船...
疫情時期，失業負債仲壞埋搵食架撐，無錢應付開支同維修。唔敢食早餐午餐，每日只食晚餐榨菜配潮州粥，每次食一半由佢發脹下餐再食，通常可以食到3日。
同期試過下晝太肚餓，戶口得7蚊買唔起腸仔包，最後買咗5蚊咸餐包，喺街一邊食一邊喊
好多謝好感恩太太不離不棄一齊捱

由細到大唔會主動問屋企拎錢，22歲fg搵唔到工果陣日日去megabox坐睇人溜冰上網搵工，冇錢開飯要食人地二手飯，人地一起身就扮野調整個手提電腦同人哋個餐盤個位置，其實係拎嚟俾自己食。
頭嗰一兩次覺得好嘔心，之後就習慣咗。
利伸：已逆天改命
本身想廢噏，但睇到其他人既故事，覺得自己都算好幸福。
從來無負債，感恩。
媽咪響我22歲時cancer，每月5萬醫藥錢，仲要交租食飯，日做20個鐘都唔夠錢過活，要伸手問人借，我覺得勁卑微，每日連眼淚都無時間流，流滴眼淚都覺得浪費力氣。雖然最後日做20個鐘挨足7年將全部債務還清。
自此我發誓要努力工作，買足保險，我呢一世都唔想因為呢啲再開口問人借一分一毫。
當然跟機構有良好的借貸我是鼓勵的。
老豆唔番屋企唔比錢
老母好細個走左
中1已經派傳單 一直番parttime加叔叔比嫲嫲幾千蚊家用養到我同呀妹中7
中7後成功考到大學 要比留位費 然後叔叔失業比唔到 打左比多年冇見的呀媽借
呀媽再嫁左人 要我叫佢呀姨 借比我仲要寫借據 卑微到我一路喊一路拎錢同簽名
然後我之後無論做野幾辛苦都唔覺辛苦🤣
老豆借大耳窿走左佬，屋企最誇張時身家得$20 
因為屋企無錢，規模經濟咁買咗好多餸頭餸尾，以為啲嘢變壞前煮熟咗，放落雪櫃可以再擺耐啲。一次過整左至少7日飯盒，由正常味食到變酸都照食。但平均每餐計食材，每人可能個幾兩蚊。
不過幾無錢都好由細到大，未試過問人借錢。
同你差唔多，不過多左老母生兩次Cancer，再加埋變賣晒D家產黎幫個仆街還債。
除左買餸頭餸尾之餘亦執過街市垃圾桶D爛菜、肥豬肉、去麵包舖R包皮食。
一唔使返學嘅日子就陪阿婆去執紙皮、汽水罐去賣。
有D當年食到想嘔嘅嘢到而家都唔會再食，好似蜆肉、豬油肥膏、椰菜、雞腳、魚蛋、豬皮等等都係因為好似你咁，到而家都有陰影唔想再食。除左食到驚，仲有餿左變味都仲要繼續食。
至於借錢無問人借，係因為當年係香港無任何人願意借錢幫我地，個個都驚左條仆街。好彩係以前慳落嘅錢可以Cover到治療嘅費用，只係好唔容易先係谷底爬上黎小小就又跌返落去，當年細個嗰陣仲好天真以為自己死慳爛慳個幾年嘅積蓄可以幫到老母醫Cancer，後尾大學畢業出黎做嘢，同老母言談間先知個幾萬蚊根本幫唔到幾多，主要都係靠老母自己嘅老本。
以上嘅種種令到我而家所有嘢都計到最慳錢，所有嘢未爛未壞就唔換唔扔，即使而家家境已好轉唔少，老母覺得我唔使咁慳，但個種PTSD係無辦法揮走，我諗呢世都走唔出呢個PTSD。
即使而家我出街見到好想食好想買嘅嘢，都會係心入面諗睇過就代表擁有過唔使買唔使食，除非真係好鍾意。
實在太多痛苦，不能盡數。
心痛🥹
我媽個腦都生左兩次腫瘤，開左一次刀後就判咗傷殘。點知復發又生第二次。
同阿媽相依為命，細個好比心機讀書，讀到大學希望可以改善生活。大學畢業再草錢創業。細個都係慳開，就算搵到錢都唔捨得大洗，買貴野。

户口比人偷晒啲錢
然後係屋企數銀仔等街市收檔買10蚊3籃菜
求社工 我真係無錢
我地大人唔食都可以
但我女得1歲半
可唔可以揾住最普通既麵包比佢食住先
唔洗多 比我過到一星期就得
一星期後我會出糧
不過最後社工話只有罐頭
我話唔係咁合適就無要
最後番左嬰兒園攞就黎過期既baby food比阿女食
唔知係咪咁 所以腸胃炎
好彩出左糧 可以立即睇醫生🩺
12蚊店洗頭水要溝水用。
中學早餐食小食部燒賣，食咗嘅話，lunch就無錢食任何嘢，維持6年。
試過真係好肚餓，食完兩餐燒賣無哂錢。
唯有放學返屋企買小童飛，俾人捉嘅時候我搏命跑，俾人推咗落樓梯。
其餘唔夠錢買飛嘅時候，就會問途人攞幾蚊。
我無得增值八達通，因為根本無咁嘅現金。增咗就會全日唔洗食嘢。
讀緊初中，
老豆老母離婚，老母搬走左。
家姐去左加拿大讀書。
自己一個留係天水圍公屋。
老豆每星期（不定期）擺低$500自己攪掂3餐
其他時間唔番屋企+上大陸搵女人
$500/7~10日 唔敢亂洗
要去超市買咖哩磚煲飯食
有一日食到想嘔，
都要喊住咁繼續將嘔出黎既吞番。
因為唔知老豆聽日番唔番。
間中扮野叫fd 上屋企玩，
夾一份錢可以買好多野食，
d fd 臨走話幫手掉。
我話唔洗，我自己會執。
其實係自己偷偷地收番入雪櫃分幾日食。
試過俾人打劫 戶口唔夠100$ 問個賊借錢撳100$出黎
屋企公司周轉唔到，阿媽要我問人借，有個人由中學追左我8年… 佢有借比我，我都有準時還錢。但我永遠都記得自尊心好強既我當時係喊住問佢。so far佢到而家都無屌過我🤣🤣🤣🤣🤣🤣🤣
諗起試過響大家樂食下午茶，食食下有個睇落斯斯文文男人問我如果食唔晒可唔可以留俾佢。我話我碗叉瀨分量好少我自己都可能唔飽，唔會有剩，點知佢坐響我前面繼續望住我食響度等。結果我嬲到搬左第二度坐。
後來諗返佢可能係冇左份工走投無路先會咁，覺得自己好衰🫣其實我大可以即刻唔食去過第二間再食，其實又唔係好餓，唔知點解當時咁護食。如果再發生我應該會話好呀我反正食唔晒俾埋杯奶茶佢起身走。
未夠18歲就要自己搬出嚟住，自己供自己讀書，自食其力，一日一盒包點忠頭飯食兩餐，剩低白飯加蛋炒嚟食，但我到依家好感恩自己撐到過去
McDonald問對面個人食唔哂啲嘢可唔可以俾我食
Yes 我又唔覺得算係卑微嘅 咪當係唔好浪費食物囉
反正佢又食唔晒 我嗰陣時又真係冇咁多錢
2000年，dot com泡沫爆咗以後，響溫哥華超過9個月搵唔到工，結果去同d印度人爭一份part time，人工min pay都算，仲要俾人玩。個印度manager安排曬d靚更俾同鄉，派得俾我嘅只係零碎兩三個鐘頭，然後隔6個鐘又再要返嚟兩個鐘。忍聲吞氣響個印度上司手底下做咗幾個月，對方好似玩膩咗就炒咗我，臨走時候見佢同d印度同事用印度話講唔知乜，但淨係聽得明佢哋笑住講唔知咩Hong Kong
30 年前，我老公，曾經喺馬來西亞人，13 歲要揸電單車搵食，比警察截停：「𡃁仔，你幾歲呀？揸電單車？」 佢用身上僅有的$2 甩咗身，但發現電單車冇油，問番嗰警察囉 $0.5 入油，嗰警察比番$2 佢。
試過大病入院，俾左一筆醫療費，岀院後要休養，當時一個人住，無晒錢之餘仲要欠債，問屋企人借2萬，但已讀不回，唯有日日食烚菜當一餐，好返少少即刻岀去搵工，幾辛苦都做，一年已還晒啲債
為咗交租大住個肚下半身因為腎石插住條尿管日做12粒鐘（飲食）尿血，失禁「著住紙尿片」唔敢請病假一路做到生
一日淨係食一餐，一個大快活晚餐同阿媽兩份share，我唔夠飽但我唔敢出聲
最窮果陣唔想俾屋企人知現金糧又未出
老豆生日但身上得返兩舊水買完蛋糕就無錢搭車返屋企
我係商場兜左幾圈掙扎最後選擇左買蛋糕先算
好彩有啲零頭找續加幾蚊係背囊唔使行廿公里返去
7 8歲時 細個姑姐同我講奶隻狗屎忽窿一下就比$500我，當下諗都唔諗就衝過去，嚇到啲表姐即刻㩒住我。
到大個先知，原來唔只值呢個價。
我要save低呢個post 提自己已經好幸福
捱得過嘅大家都好叻🫂
學生窮遊想慳啲坐夜車，到咗發現冇公交的士又好貴住嗰度過咗check-in
打算喺火車站瞓睡袋
畀人趕
撞啱仲要係weekend車站的酒店又貴又冇房
on居居頭顎顎咗一陣
竟然有個同火車的本地女子問我介唔介意去佢屋企瞓一晚
最後人生第一次couchsurfing達成🥹
北歐小鎮
真心唔建議學☠️ 雖然後面我喺好多唔同地方又做咗好多次D hitchhiking couch-surfing/ 住啲好dodgy的accommodation/ 跟陌生人去玩去食飯/ 黐trekking guide/ 執hitchhiker/ 接濟冇cash冇book房的traveler 的事… 🫣
俾女飛，想出人頭地威次俾條女睇。借錢炒黃金。借左15萬左右，個時剛畢業無耐。然後輸九成。當時炒金之前已裸辭左。所以失業無收入+爭人錢。死死地氣求前公司俾我番幾個月part time。
但都講唔上真係好窮，只不過係我最窮個期。
響歐洲用自己積蓄讀緊U嘅時候，去超市買d差唔多到期嘅雞胸肉分幾餐食，聞到好大陣騷味都照煮嚟食到肚痛…仲要俾當時嘅男朋友質問我點解要慳埋d咁嘅錢？🤡
差唔多2日食一餐飯，1個月1000蚊內搞掂食
食撚咗成年意粉
仲要踩單車翻學
差啲搞到收錢幫同學做功課，不過收唔落
成年個腦淨係諗到好撚肚餓