失業期間，最大問題係銀行嘅還款。之前同朋友夾份做生意，失敗咗，需要錢填返個窿，朋友直接失聯，佢阿爸係大陸，佢媽媽係外國，著草都唔知點搵，結果我就一個人孭哂，差恒生同渣打兩間銀行錢，分期還，唔經唔覺已經還到最後一年，幾年嚟中間無斷過，無遲交過一日。因為失業，我寫封信去銀行，希望可以俾幾個月我緩衝，我亦明白剩低嘅錢可能成舊會再起釘，恒生好好，俾咗少少選擇，咁我覺得至少俾我鬆一下，零收入下，搣少一蚊得一蚊。渣打就發神經，個職員係咁打嚟問我係咪即係無還款能力，然後不停叫我去財仔借錢還俾渣打(個代表無提過渣打旗下另一間水浸嘅 MOX Bank, 而係好清楚講“你可以去其他財務公司借返嚟俾我哋”)，當我表示我失業，都唔會借到錢，佢就“提醒”我有啲財仔可以免入息證明，不過條息貴啲，我直接表示佢好似想迫到我申請破產咁，最後迫住過期，渣打打電話嚟都唔聽，過期7日左右，渣打就已經將我交咗俾財仔追數，財仔嚟到，我都直接講咗成個故仔，財仔反而重文明，覺得銀行明知個客唔會還到錢住，唔同客傾，反而叫佢哋白行。我真係唔撚知渣打攪咩，睇到網上話渣打 service 第一，好關心啲客嘅打手 post，真心笑出聲。
家父仙遊之後去揸兜取消個銀行戶口，已經去 "遺產受益人支援組"攞左"確認通知書"，然後家母去取消嗰陣銀行話金額唔啱(辦理確認通知書之後有幾千蚊過左入去) 之後入數嗰啲錢唔可以俾佢，叫我哋再去支援組出過一張金額啱嘅通知書，咁我知道之後就打去支援組問啦，支援組就話嗰張確認通知書並唔係確認金額而係確認承辦人，所以金額5萬之下完全無需理會銀碼啱唔啱，咁家母就再去銀行取消，點知銀行堅持話多左嘅金額唔可以俾我哋，咁我響電話(無去銀行) 同佢解釋法例係點，佢揾個唔知乜嘢主任定經理黎同我講都係堅持多左嘅金額係唔可以攞嘅，咁我問佢唔俾我攞即係歸你銀行呀？佢又無人答得出......
最後第二次取消唔到唯有打電話去總行問，點知成個客服連經理都係唔識法例嘅！都係堅持多左嘅錢唔可以攞！我就同佢講你咁L大間銀行一定有法務部㗎嘛，你去問完法務先再同我傾啦，之後隔左兩粒鐘個客服主任死死氣打俾我道歉，仲約定時間去邊間分行揾專人同我哋搞，一去到間分行即刻有個烚熟狗頭嘅十九主任帶我哋去房仔幫我哋取消，當然一路取消我就一路狂小呢班冚家富貴，最後客服再打黎道歉問可以點補償，我就要佢出返封信書面道歉，完。
佢最後肯書面道歉又衰唔晒，試過會瘋更加衰，錯左都死唔肯比道歉信，靜靜雞入返錢去我戶口了事🙄
作為銀行佢唯一可取咪識道歉囉，但係銀行運作一啲都唔識！🤣