好多好多年前，我個下屬要請一個初級分析員。佢（用廣東話）見完幾個人之後揀咗一個喺英國讀完碩士返嚟嘅女仔。我喺未見呢個女仔之前，就叫 HR 畀一份簡單嘅英文筆試佢做。但我見佢嘅時候，一開口我就發覺，佢講嘅英文同筆試嘅水平完全唔同級數。好基本嘅嘢都搞唔清，例如 analysis、analyst、analyse 三個字完全混淆晒，仲有好多簡單用法都唔識，講嘢又表達唔到自己意思。我再 chok 多兩 chok 問深啲，先知原來嗰份筆試唔係佢做，係佢搵個男仔幫佢做。佢喺英國讀書嗰啲功課都係人哋幫佢搞掂。最後，我梗係冇請佢啦——我反而見咗「幫佢做卷嗰個真正嘅高手」。

我見到嗰位真正嘅高手（港男）之後，就順便問佢而家做緊咩工。佢話自己一直搵唔到嘢做，因為連見工嘅機會都冇（冇喺外國留學、香港本地high dip 成績又係十分普通）。咁我就叫佢即場做返一份簡單嘅筆試同計數。結果佢真係做得一樣嘅水準，英文又講得十分流暢，只不過佢份履歷表真係好「削」。佢仲話，今次係佢唯一一次有得見工嘅機會；之前佢已經發咗超過 500 份履歷，都冇回音。最後，我就請咗佢。