📌 好想用一個棟篤笑的方
共 73 條紀錄
好想用一個棟篤笑的方式，
去表達照顧者嘅辛酸
利申：以下全部都係真人真事
Hello,大家好
唔知大家有冇搭過地鐵呢？
我曾經係一名列車車長，我叫阿慧，喺港鐵公司工作咗25年。
我係一個畢咗業嘅照顧者。
曾經要照顧一個臥床三年嘅老豆，一個慢性肺阻嘅媽媽，慢性肺阻即係要用貓鬚氧氣機嗰種。
仲有一對孖女，
大家有冇留意到，我冇提過老公兩個字？冇錯，我仲要係一位單親媽媽。
我喺2023年決定裸辭，離開一份大家都覺得好穩定嘅工作，去開拓一個未知嘅領域。
選擇離開舒適圈，係因為我阿爸阿媽都走晒，孖女亦都長大成人。
我做女兒同媽媽嘅責任都已完成，係時候為自己人生負責。
離開時完全未知未來嘅方向，會再打工定係創業？一切都未知。
但原來命運已悄悄咁幫我安排好了……
2.回顧照顧之路
回顧我嘅照顧之路，一啲都唔容易。
阿媽07年開始有慢性肺阻，要用氧氣機。
身體狀況越嚟越差，甚至連沖涼都需要我幫手。
好記得第一次，面對阿媽赤裸瘦弱嘅身軀，內心真係好難過，好難過。
因為手提氧氣樽比較昂貴，我媽為咗慳錢就唔願出街。
所以，我好珍惜同阿媽覆診嘅時間，唯有呢段時間，佢先肯出街，咁我就可以同佢飲茶買嘢。
我記得有一次實在買得太多太多嘢，全部掛咗响部輪椅上面，結果連架車都反埋。
我阿媽三年之後走咗，佢走咗以後，我老豆就變成隱蔽長者。
以前阿媽在生時，佢都肯陪阿媽落街散吓步，買吓餸。
阿媽走咗之後，老豆唔再落街。活動範圍只限於屋企，身體開始退化得好快。
2015年老豆中風入院，醫生話老豆以後都行唔返。
要我選擇接返屋企或者申請院舍？
如果要接返屋企，就要買定電動床等必要物資，仲要搵房署將屋企改動一番。
基於愛與不捨，我選擇咗將佢接返屋企照顧。
亦由嗰時開始，我嘅照顧壓力亦慢慢開始爆煲。
想問下大家一條比較私隱嘅問題：大家有冇試過屙屎唔出？
接咗老豆返屋企之後，最大挑戰就係屙屎💩
老人家因為消化力弱，腸道蠕動又慢，再加埋唔夠力氣谷出嚟，結果屙屎變成一個大工程⚠️。
為咗令佢屙得舒服啲，就要抱佢落嚟屙，結果未屙到又話條腰好攰，要返上床。
屙一次屎要抱上抱落好幾次，仲要未必次次都順利…..
最後我研發到一套屙屎獨門秘方，但就需要冒一下險……
我唔記得响邊度睇返嚟，話「屙」同埋「吞」係同一組肌肉，突然俾我靈機一觸。
首先：用甘油泵令肛門濕潤，稍等一陣；老人家本身就好容易因為飲水而濁到。
就喺呢個時候，係咁俾水佢飲，而令佢濁到。
當佢咳嗰下，就好快趣咁屙得乾乾淨淨，呢個方法真係萬試萬靈。
佢屙唔到，真係慘過自己屙唔到㗎，陰公！
3.病態嘅執着
然後，我記得情況最差嘅時候，我需要見社工。
因為身邊根本唔會有人明白我嘅情況。冇人會有興趣知道，我老豆屙唔屙到屎？
只有自己一個人孤軍作戰，實在好難頂到落去。
我亦會攞住個籃球，到籃球場瘋狂咁擲，好想將我裡面嘅壓力全部擲晒出嚟。
當時我細女仲要學人離家出走，真係人都癲！
我叫細女，响走之前，逐個逐個舅父通知晒先，再同公公講聲佢要離家出走。
最後佢唔夠膽咁樣做，咁我先鬆返一口氣。
隨住時間嘅過去，我老豆慢慢冇晒意識，但又未走得。
幾兄弟商量過後，決定要老豆插鼻胃喉，因為冇人會忍心老豆餓住走。
喺咁嘅情況，我都唔肯放手，我仲去醫院學埋鼻胃喉落奶嘅技巧，去照顧我老豆。
最後嘅最後，我老豆於2018年在屋企離世。
4.裸辭以後
裸辭以後，我考咗護理員牌，因為我發現，我阿爸阿媽走咗之後，我仍然好鍾意照顧老人家，同佢哋傾偈。
與此同時，我亦幸運咁入咗殯儀行業，因為眼見太多誤解，太多遺憾；我開始做起生死教育講座。
就以我為例，想當年我阿媽向我交代身後事，教我佢走後要點樣做？通知咩人？當時佢叫我逐個逐個電話抄低。
但我根本未準備好，亦有好多唔捨得，所以就叫阿媽唔好再講呢個話題。
然後我媽走後，我就好勇敢咁，問我老豆後事打算如何安排？
但今次到我老豆迴避，話：「你咪攞張席捲咗我囉！」
完完全全係晦氣說話。屋企人因為太多心理牽絆。好多內心說話都唔願意講，何況生死大事？
最後我老豆走之後，我同幾個哥哥帶著老豆嘅骨灰到台山走咗一趟。
因為我老豆响身體狀況好差嘅時候，講過想返台山，但當時身體嘅狀況已經唔容許咁做。
最後，我將老豆嘅骨灰放咗喺阿嫲附近，全都係「我認為」係最好嘅安排。
因為我老豆根本冇講過，後事要點搞？
慢慢我發現，要同父母講身後事，最好都係交由一個合適嘅第三者去傾。
最怕就係父母Get錯咗，怕我哋嫌佢阻埞，又會以為我哋想分佢副身家。
佢哋一旦Get錯，你就周身唔得閒。
宜家，如果時間合適，我都會同老友記傾吓後事嘅安排。
有一個老人院嘅婆婆，同我講話佢啲骨灰，唔想同先生擺埋一齊。
因為先生在生時好爛賭，嗰時已經好想離婚，但因為仔女而冇分開到。
咁我話：
你一定要同自己仔女講清楚喎，因為做仔女嘅，好多時都會理所當然咁將父母擺埋一齊。
我唔會知道，阿婆嘅仔女最後會唔會將佢哋擺埋一齊。
我只係希望，佢哋會跟從媽媽嘅意願。
總結：
我已經立咗遺囑，亦已經係一名無言老師。
無言老師，即係我將我嘅遺體，捐咗俾中文大學醫學院，俾醫科學生做實習。
我覺得响我走咗之後，仲可以幫到人，發埋最後一點光，人生就無憾了！
我一直唔明白，點解我要咁透明地面對自己父母嘅死亡？
經過呢兩年殯儀裡面嘅所見所聞，
領悟到：
愛有限時，
需要及時。
一口氣睇晒，雖然你形容為棟篤笑，講就輕鬆，箇中辛酸同壓力真係唔係人人承受得來，但你對父母嘅愛肯定大於責任，而且好好耐性，同固執嘅老人家相處仲難過教細路，要佢地聽你話，又可以用打鬧呢啲招數，我淨係勸我連門鐘都聽唔到嘅媽媽肯戴耳機都勸到口水乾，我好怕佢聽唔到扮聽到，然後我每一次同佢講嘢都要嗌破喉嚨，重複好幾次，搞到自己好似一個潑婦咁，所以真係打從心底裡咁佩服你。
每個照顧者都有自己嘅難處，真係有苦自己知。好彩宜家多咗好多社會資源，適當時候要搵人分擔下
又話楝篤笑，呃人既，睇到尾眼濕濕
你好叻呀，咁辛苦既路都行過黎，好唔簡單，仲要將自己既苦化成一份使命感，佩服！
睇咗幾句，忍唔住睇曬全篇。
因為寫得生動 有情 有笑 有涙 。
佩服佩服！
多謝你，因為遲啲準備present ，得到好多正面回應，令我信心大增
你好叻呀，由照顧屋企嘅老人家，到而家將對佢哋嘅愛轉移畀其他人👍👍👍
你亦都好勇敢，可以裸辭，轉軌道去做其他嘢，真係犀利👍👍👍
作為曾是照顧者的我想抱抱你,你很棒。現在有能力用你經驗去幫助同路人
你好勁，好叻。衷心恭喜你搵到自己真正喜歡又能投入嘅工作，一份真正嘅志業！祝福你健康、順心，幫到好多喺生老病死問題中迷失嘅人同佢哋嘅至親🍀🍀🍀🍀🍀。
你好厲害，雖然生命比左一啲好難的課題比你，你無逃避仲好積極去面對，雖則你用好簡單的文字去描述你的心路歷程，但我相信你的經歷一啲都唔簡單，亦都唔容易
但我想講，你已經過左最難嗰關，而家只有最美好的事情等緊你
祝你身心安康，快樂美滿
你好有大愛精神🙌好佩服，你父母會好多謝你陪佢地最後日子既相處，雖然身體係痛苦，但你盡左最大努力，希望你無憾，現在過好自己既人生，感受生活，你值得，希望你生活順遂，平安喜樂。
屎嗰part 有料👍🏻
照顧老退化嘅老人家又係另一種挑戰，老人家仲在生，諗返起有d事都幾好笑嘅，當然辛酸嘢都唔少
辛苦了！ 你嘅分享好真摯動人，同時好勇敢🥹 特別係由多年來一直承擔家庭嘅愛同責任，最後又將愛延續出去，教育他人❤️🔥
願你往後生活也同樣得到被好好理解
也別忘了也好好照顧自己喔🫂❤️
辛苦了... 多謝你嘅分享，希望你嘅生活幸福富足，身心康泰～💪🏻💪🏻💪🏻
我媽媽上年過身，爸爸身體都唔太好，完全明白你感受。
我會懷念以前相處嘅日子，不過住後日子都要過。所以而家更加要好好照顧爸爸同自己，呢樣野應該係我媽媽在天之靈最想見到。
大家都加油啦💪💪💪
Chrischris0729!! 你快啲同balu出片🔥
FYI, 好似捐器官就無得做無言老師 (澳洲呢邊係咁, 我前老闆係器官移稙的專家) 所以我係講明如果我不幸地去世，所有捐得既器官都捐左去先，有淨再算。
我十幾年前返香港照顧咗老媽最後嘅六年，但係只係照顧佢一個人，仲有個工人姐姐兩個人夾手夾腳，最後媽媽都算係善終。我算係好好彩，只照顧一個，仲有姐姐幫手。加油。
係醫院咁多年，見盡久病床前無孝子，所以好respect 會落手落腳做嘅照顧者，真係唔容易🫡
你好好休息計劃將來！走過照顧2位長期病患的父母已很叻！
多謝你分享你嘅故事 🥹 吸引咗我入去睇埋你其他post
多d出post 支持你🙌🏻
我相信好多人都會喜歡
正正因為生老病死避不過
更需要過來人分享真實經歷
而你嘅分享 必定會吸引合適年齡的觀眾
好感謝你由衷嘅分享, 道出咗照顧者嘅辛酸亦好佩服你兼顧到咁多事！辛苦你喇🫶🏻
你好犀利！
照顧者，照顧一個人都已經好勞累，除咗體力要求好高之外，情緒、精神狀況都要穩定先做到，而你，仲要照顧幾個（媽、爸、女女......）。經歷完咁多之後，仲進化、昇華到做護理員，真係好犀利！大癲呀！
睇到屎都冇力痾真係好慘，你父母好彩有你，無人照顧果啲…而家香港人咁長壽但又未必健康，我真係贊成安樂死合法化
我身邊既cases都係女仕更肯落手落腳去做照顧者，非常偉大，令人佩服🙏
睇完了，我只想俾個讚你，好叻，令我反思自己將來要怎樣做
一開始以為你係獨女先咁大個重擔，點知原來你有兄弟嘅，點解會得你一個照顧父母⋯⋯
難得香港越來越多人會願意去討論呢樣野
實戰經驗嘅紀錄好重要
多謝你寫出黎❤️
你好堅揪
另，💩💩果度會記住，in case唔知幾時有用