好熱好熱 夏天來了 我其實我鐘意著細細件 貼身衫同裙
宜家我長袖長褲 呢兩日拎翻以前d褲同裙出嚟著 以前XS都太鬆 宜家著唔落 (我知個時厭食呀嘛 唔係話要做翻個個我 只係個反差真係太大 畢竟我三個月內 自己估計都重咗15kg)

我本身好鍾意化妝 扮靚 因為我由細到大都知自己好樣衰 暗瘡 濕診 敏感 樣樣齊
結果依家心情一低落 都唔會特別護膚 有噴爽膚水已經算係咁 唔好話化妝 依家皮膚狀態雖然好咗好多 但係覺得水腫根本搽咩嘢都冇用 自我放棄狀態 連化妝片都無睇

我覺得自己好似好咧啡 翻工好唔professional 平時出街又影響市容 琴日公司突然之間話要今日影張相 我嘅自卑同埋焦慮好似突然之間一下到咗一個頂點 因為我冇好睇嘅衫着 亦都冇動力化妝 結果直接自暴自棄
內疚自己為食肥嘟嘟就直接暴食

以前所有嘅假期我都會攞嚟去旅行 台灣日本泰國韓國 再加啲長途旅行 但係依家好似對呢啲短途嘅國家冇乜興趣 加上依家我都冇同朋友聯絡 又好驚自己會去到當地暴食 所以唔係好所以唔係好夠膽自己去

對上一次自己去旅行 已經係兩年前去英國 之後再同朋友去克羅地亞 亦都係最後一次嘅長途旅行
我會覺得自己好可惜㗎 依家suppose係我最有能力同埋體力去長途旅行 可以體驗得最多 偏偏精神狀態好似唔容許我咁 都費事要家中兩老擔心我啦
結果d假期 我都係留喺自己住嗰度休息 或者陪兩老飲茶
連vlog都無睇嚕 驚自己想去旅行又冇得去 同埋大家都係介紹食啲乜嘢 我好驚會令到我暴食

唔係話留喺香港唔好嘅 呢個康復療程都係另外一種體驗
只不過好似唔係最好啫

以前明明可以同啲同事開心大笑出去玩去飲酒
依家連我自己都默默收埋自己 唔會特別同人傾偈
都知道有同事默默想疏遠我

知道我返工嘅目的唔係為咗識朋友啦 所以可以嘅冇問題
我可以自己一個 不過內心成日都會有好多不解
我係真心教啲同事做嘢 唔會托手踭 有事大家一齊研究
我依家有努力去接觸同事同人類 但係依然係有時有d灰 (未係好消化到點樣表達個感受)

每次灰灰地都會提自己 無事！醫院都住過兩年 又試過做手術失了個少血 ICU都瞓過 類固醇 食嘅搽上面嘅都試過 遇人不熟當然試過啦 有乜風浪我搞唔掂
唔好亂講嘢 唔係好似賣慘咁好樣衰 我已經俾好多人幸福 唔好身在福中不知福 就係咁樣安慰自己

唔想睇旅遊vlog 化妝片 冇問題㗎 我依家睇國際新聞 睇吓美國 講打仗 睇吓無人機 都幾好睇
唔去旅行 同兩老喺香港飲茶 學吓一啲特別嘅樂器
都係另一種體驗呀！

就係咁樣同自己講
係灰灰沉沉嘅自己 同埋積極嘅自己 無限拉鋸