📌 希望尋日仆心仆命幫我
共 98 條紀錄
希望尋日仆心仆命幫我嘅的士司機叔叔睇到：我都唔知可以點形容，除左感謝外，滿滿嘅暖心，多謝你，香港的士司機仍然有好多值得我地衷心嘅Salute ！
件事係咁嘅，尋日我新居入伙大日子，因為買啲嘢由屯門站下面搭K53巴士返回掃管笏，一落巴士，摸摸個袋，發現漏咗個銀包喺巴士上面，我就即刻衝上去諗住截架巴士，可惜司機睇唔到，我好心急搏命追住架巴士，希望喺下個站可以上去攞返個銀包，一路跑個心一路希望唔好俾人執咗（錢唔多，但係身份證、信用卡，同埋有啲好值得紀念嘅嘢喺銀包入面，剛巧過兩日我要飛，冇咗身份證，我諗我都會幾麻煩）
但係個站離得好遠，我跑到幾乎斷氣，都追唔到，一路跑嘅時候，剛好隔籬就有一架紅的，我立即截停佢，司機叔叔問我咩事，我喘着氣同佢講，你幫我追前面嗰架巴士，我漏咗銀包喺座位上面，當司機叔叔一聽到就話：「唔使擔心住，我幫你追，希望冇人執到你個銀包啦！」
於是的士就風馳電掣追住前面架巴士，到最後差唔多去到三聖邨，的士卒之追貼住巴士嘅側邊，好心嘅司機叔叔不停為我響咹，希望側邊嘅巴士司機能夠聽到，Thanks God , 巴士司機聽到啦，雙方立即攪低個窗，然後（留言續）
我哋同巴士司機講我漏咗個銀包喺架巴士度，跟住巴士司機話：「好嘅，我埋站你上嚟拎！」
啱啱行多一陣就埋站，我即刻飆落的士，巴士司機叫我上去搵，我去返自己個坐位，個銀包完好不動就在那裡，我執起銀包嗰一下，除咗失而復得嘅感動之外，就係呢兩個司機一齊合力幫助我嗰份暖心，我默默留下眼淚，真係好多謝佢哋呀。
我落車嘅時候，真係估唔到的士司機叔叔仍然係路邊等我，佢叫我上返車話載我返番屋企，因為佢知道我今日新居入伙，佢叫我唔使俾多錢佢，唔需要打賞，平安就好，我整個人都軟左，個心感動到唔知講咩好。
落車嘅時候，我不停感謝呢位司機叔叔，並且同佢講：「今日真係好多謝你，亦都好感激可以遇到你，好人一定有好報，多謝晒。」
雖然今日新居入伙發生插曲，但係都因為香港人互相幫助嘅精神，一方有難，八方增援，最後變成一件令人暖心和值得令我哋香港人感到驕傲嘅事。
我哋香港，全賴每一個你和你，感謝🙏🏻
好感動呀，雖然你唔識我，我都唔識你，大家都可能覺得呢一件係小事，但係尋日係我買樓入伙嘅大日子，剛巧又漏咗銀包喺巴士，以為好日子會倒楣，點知遇着兩個好嘅的哥和巴哥，將倒楣嘅事扭轉成為Lucky嘅事，人生就好似戲劇一樣，咁先精彩。
多謝你祝我入伙大吉啊🙏🏻
睇threads就係為左睇呢啲🫵🏼
的士司機＆巴士司機 一律可以chop香港人已認證。
巴士我就記得個車牌係1907，但係的士叔叔個車牌同埋佢個名，係我最心急嘅時候唔記得抄低，所以想多謝的士叔叔都冇辦法，希望呢一度，的士叔叔可以睇到。
信香港係好人多過衰人💕💕，祝司機路路暢通，唔會俾人抄牌🙏🏼
睇到我都腰濕濕～ 睇似係件小事，但真係好感動🥹 願所有好人都一世平安
琴日唔見咗銀包嘅時候，真係抹一額汗，好心急，好心急，而且又撞正入伙，本來好開心，但係就遇着一件咁論盡嘅事，好彩兩位司機大佬幫我化險為夷，真心感激佢哋，佢哋其實係我哋城中嘅「無名英雄」。
香港人有時係冷漠D 但一有起事上黎我覺得大家都好願意去幫手 好人一世平安
雖然個的士司機話唔使打賞佢
但佢咁嘅行為同埋心態
好值得狠狠地俾張$500去懲罰佢
我俾多咗錢佢㗎，但係個的士司機點都唔肯要，叫我收返，佢真係好好人，係一個好心地、好熱心和好忠誠嘅一個司機大佬❤️
你咪去信表揚佢吔。在馬路上追截巴士，的士司機可能會被告不小心罵駛，巴士司機又在駕駛途中分心同你講野。
我喺度要補充一下先，的士叔叔好好嘅，佢喺安全車速範圍內幫我追架巴士，剛巧尋日又係公眾假期第一日，路面冇乜車，所以追咗一段路，就已經見到番架巴士，好感激。
至於我哋追貼架巴士嘅時候，剛巧就係紅綠燈停車位，的士司機才響咹，幫我告訴巴士司機我銀包留在他的車上，一切都是剛剛遇着啱啱，但係就好肯定呢兩位司機都好熱心幫助人，感激佢哋🙏🏻
香港人依然仲有好多好心人☺️☺️
樓主，下次有機會都一定要幫番人💪🏼💪🏼
因為你，巴士同的士兩位司機大佬各為其行業加返一分啦。
真心要多謝呢兩位司機大佬，並唔係個個司機都唔好嘅，而好人好事係真係值得表揚❤️
對，冇錯，只係擔心萬一真係唔見咗銀包，可能趕唔切處理報失嘅事，總之一係手機，一係銀包，唔見咗就真係好擔心。謝謝你啊！
我喺度補充少少先，因為巴士已經埋站，巴士司機好好，佢等我上車，而呢個同時，我都立即俾咗錢的士叔叔（因為我真係唔知道我搵唔搵得返個銀包，或者我喺巴士上需要幾多時間去處理呢件事，所以我立即俾咗錢佢，唔想阻佢時間）同時我亦多謝巴士司機等我俾咗錢的士後，我立衝上巴士並且唔該司機為我等一等，我去到座位，真係見到自己個銀包原封不動喺度，真係感動到唔識出聲，好多謝依兩位司機。
點不知好人好事仲未完，落返巴士之後，竟然仲見到個的士司機未走，在路邊等緊我，佢話載返我返屋企，知道我今日新居入伙，並且講明唔需要打賞，只想我順利平安，媽呀，感動到喊😭
其實你應該寫信或者電郵去運輸署同埋巴士公司表揚呢兩個司機，起碼等佢兩個都有機會受益
我會發電郵去巴士公司表揚呢位巴士司機，但的士叔叔，我就係慌亂嘅時候，忘記咗睇佢個名同埋車牌，真係好可惜，希望呢位的士叔叔喺呢度見到我多謝佢🙏🏻
發生呢啲暖心事，真係值得寫threads, 俾多啲人知道。
我其實當時真係好緊張吓，好驚入伙一搞到唔開心，又驚唔見咗銀包，冇晒證件事小，唔見左有紀念價值嘅嘢先可惜，真係好多謝兩位司機，熱心幫助我。
戥你開心，祝你入伙大吉！兩位司機事事順利，好心好報！
謝謝你喔，爭啲入伙發生一件咁唔開心嘅事，好彩最後大反轉，衷心多謝依兩位司機，佢哋嘅熱心和愛心，幫我執返對我嚟講好重要嘅銀包，讓我響琴日嘅入伙日都沒有影響心情，反而更加感激能夠發生這段小插曲，比我遇上暖心嘅人與事🙏🏻
係呀，我都覺得我真係好好彩啊，係非常非常咁好彩，可能配合入伙大吉，最後都有驚無險，不過，真係全靠呢兩位司機大佬，如果唔係，入伙日就變咗去報失，同埋心情都會大受影響，失而復得，化險為夷嘅感覺，真係經歷過嘅，先會明白嗰種好彩。
謝謝你啊🙏🏻
開心事幸福事就想喺呢度同大家分享，大家keep住有愛啊！
我真係好好彩，亦真係好感動，香港人一遇到事，一定會互相幫助，無分你我🫶🏻
多謝你分享，老土啲講句：往後幫多啲人繼續散播善意
袋住呢件事喺袋，萬一往後偶然唔好彩遇到唔好嘅人同埋事件，就記返起你曾經遇到好好嘅人❤️
Well said , 一定會，善意係會散播嘅，愛亦會互相感染，相信生命影響生命，雖然天空不是每日都是常藍，但係都要學習正面去生活，不以善小而不為，相信我們個社會會一路好🫶🏻
你真好彩，遇著倆個好司機。
如果係小巴佬絕對無硬。
本來唔見銀包係好倒楣嘅事，但係事情一個大反轉，又比我遇上兩位咁熱心幫助人嘅司機叔叔大佬，等我可以失而復得，嗰種說不出嘅喜悅，真係自己先知，默默流眼淚之餘真係衷心感謝佢哋🙏🏻
係啊！如果真係唔見咗個銀包，只係擔心後日出國搞唔掂所有證件同報失嘅嘢啫，跟住去旅行都心掛掛，而家好好彩，多謝兩位司機大佬救我一命🫶🏻🙏🏻
暖心事真係值得喺度紀錄下，俾多啲人睇到，特別希望嗰兩位的哥及巴哥可以睇到🫶🏻
掌聲十分值得給這兩位有愛心並敬業樂業的司機大佬❤️
我而家一去到屯門站，返屋企嘅時候都一定係搭K53，應該有機會再遇返呢個巴士司機❤️
真係感動到流淚，實在太好彩，也多謝兩位司機大佬，謝謝你的祝福，我終於開心入伙❤️
大團圓結局
的士+巴士哥嘅心地真係好好🩵，等我搭多啲佢哋車😂
冇錯，非常驚險的經歷，幸好最後大團圓，因為我遇上兩個心地好好嘅司機叔叔，我以後都多啲搭的士同埋K巴🥳
真係好感動，感恩我們大多仍是有好質素嘅香港人，即使任何背景、任何職業和任何身份，只要有需要，香港人都好樂意去幫助其他人，但願呢份愛繼續keep落去🫶🏻