成個藝術月，最好睇反而係太古坊的金句takeover。

13句語錄，充滿錯字、反字，筆畫橫飛，原來因為藝術家Coco Capitán 本身有嚴重讀寫障礙同ADHD，連字母都企唔定。

“THAT WHicH YOY DOn’t 2AY CAnnOT BE HEARD”

「讀書時俾老師話，直到讀藝術先識諗，點解一定要好似大家咁寫？點解唔可以用最自然嘅書寫方式？」

呢13句「隨筆」散落太古坊四周，冇hint冇地圖，要你親自行一轉treasure hunt。

對於樓上班睇慣合約條文嘅律師顧問金融才俊而言，突然要學會欣賞串錯字的藝術，相信別有一番啟發。

然後語錄會引導你登上67樓，從相展中「領養」一片藝術家收集的回憶（相片）作為紀念。

現場目測，唔少觀眾好認真逐張揀。睇展覽你唔會咁用心；俾你拎走一張，你會當正法律條文咁逐格睇。

所以點解藝術策展咁重要，幾句潦草一堆舊照片，足以將冷冰冰嘅甲級寫字樓變成一段探索旅程。成個體驗，竟然比打著梵高畢加索莫內旗號的展覽更為圓滿。

成個藝術三月除咗重頭戲Art Basel、Art Central外，其實還有不少周邊同樣值得一訪。

例如第一屆Editable Art Fair，用美食引誘你認識藝術。梵高太陽花冧麵包；億萬作品牆上的真香蕉《Comedian》任食；表現主義「顏料」任飲。在場見有小朋友十分雀躍，品味呢家嘢，本應自小培養。

太古坊展覽去到4月26日，EAF 4月5，復活節不妨留港睇展覽啦。