我個仔8歲，最近喜歡收藏Pokémon Card。工人姐姐已在我家5年，相處非常融洽，佢亦好錫小朋友，成日買卡送俾佢。

但我發現工人姐姐不幸地買咗假卡，我唔知點樣處理好，想請教各位...

- 我唔敢話俾工人姐姐知，因為呢個係佢一番好意，我擔心講出嚟佢會唔開心
- 我又唔敢話俾小朋友聽，擔心佢嫌棄工人姐姐呢番好意。但又怕小朋友萬一同人玩/換卡時俾人發現有假卡，怕傷咗佢自尊心到時更加嬲姐姐

請問各位可否指點一下🙏🏻🙏🏻🙏🏻

解釋俾小朋友知，工人姐姐送嘅佢另外keep起留嚟紀念就好，俾我會諗另一個玩法俾呢套卡，唔好混埋入套真卡嘅。

千祈唔好換咗佢呀，換即係你帶頭示範你嫌棄

認真我細個讀小學時唔理真卡定假卡都好、只要係自己鍾意嗰隻小精靈就特別開心。而家啲人係咁炒、已經喪失咗當初打開卡包嗰種喜悅純粹追求有價值嘅卡

我會照同姐姐講嗰啲係假卡
叫佢唔好再買 唔想浪費錢
多謝佢嘅心意 知道佢錫小朋友😊
叫佢留返啲錢買嘢俾自己屋企人
另外都同返阿仔解釋返工人姐姐因為冇玩開呢啲卡
所以佢唔識買 買錯咗

另外買張真同張假嘅對調咪得

如果買左張梵高皮/黃昏莉莉艾點算🫠

有冇一個可能係工人都知道係假，但係都照送😹

係都冇咩問題 五千蚊人工

你一係買包真嘅同佢換 lor，同佢講邊到有真嘅買咪下次再送比小朋友 ，你都識講係心意

唔知你個小朋友同咩朋友仔玩 假卡有假卡玩嘅
由其都只係係8 歲
但小朋友係識笑人地買假野嘅 我細個就試過
細路仔都係貪新厭舊 你咪買多幾包比佢 佢多真野咪自然keep 住玩真野

其實咁少野都要上黎問 😅

叫佢唔好浪費錢了就得了，人哋一番心意唔好踢爆人哋係假

基本上都要話佢知買左假，起碼佢知道自己比人呃先

我識過幾年前唔知道放工果時喺文具舖買咗假咭俾親戚小朋友做生日禮物。一嚟我自己果時冇儲卡，二嚟唔會估到小朋友閃卡都有假？！三嚟我細個抽卡都係文具舖。
之後小朋友開果時都有話點解D咭怪怪哋。我照實話喺文具舖買，應該唔會假掛。之後自己個仔大個咗，開始儲卡，原來先知假卡何其多！我幾年之後先知道同返個小朋友講Sorry原來我先前真係買咗假卡，不過小朋友完全無介意過，都一路儲住，而家俾返我四歲個仔玩，怕佢玩爛真卡😂
小朋友介紹只係心意，同喺咪真心錫佢。

真真假假只有大人先咁介意啫！事實上真係好多唔同版本！

咪直接話買錯，使乜咁多心理戰
唔熟嘅嘢買錯有乜出奇

緊係要講。

物輕情義重，比我會用咭磚或擴展咭磚收藏起佢

係姐姐送，有紀念價值，另買一本簿珍藏，以後凡係姐姐送都入同一本

講就應該講嘅
等佢唔好再比人呃嘛
但真係要諗下點講
話佢果啲係fan art唔係official product?

同工人姐姐解釋係假卡，然後每個月分小小錢俾姐姐買真Pokemon card送俾小朋友，買完之後再叫小朋友送返其中一包俾姐姐學識分享，大家都開心

買包真嘅偷龍轉鳳咗佢 ～ 大家好做

小朋友通常不太care

老實同仔仔講係假咭但係假咭都係姐姐响佢有限能力對仔仔嘅心意都要儲起佢唔好同人換要留低做紀念長大睇返就可以尋返呢份回憶有工人姐姐錫嘅小朋友都好幸福
另外家長可以教小朋友用零用錢回禮