📌 我睇「破地獄」好有感
共 70 條紀錄
我睇「破地獄」好有感覺係佢兄妹嗰段。個阿哥一家飛走留低個阿妹喺香港照顧老豆老母，我真係覺得好仆街，如果我係入邊嘅女主角我永遠唔會原諒呢個阿哥。
因為我家姐都係咁自私，你唔好同我講因為結咗婚嫁雞隨雞，我唔理，關我撚事，我點解要為你嘅幸福而咩起獨自照顧兩老嘅責任？ 你為自己生活 點解要犧牲我？
兩老每年都會飛去加拿大探我家姐一家
我永遠都唔會去， 連聯絡都不了，無野好講
佢對仔女生日嗰時過節，我老竇老母仲要求我封利是俾佢哋
又係關我撚事？
知道佢話我阿爸今年80歲，想一家人飛去加拿大慶祝
我即刻答「 我唔會去 」，
話「老豆80歲大壽喎～」  so ? 你唔返嚟 要我地去？
你要返工 我唔使？
我唔會比人再情緒勒索我
錯的係你父母唔plan自己退休
你怪你家姐自私？
你自己比父母情緒勒索成功，然後唔忿氣人哋走得甩
你家姐放得低兩老，其實你都可以放低佢哋。
每個人一出生就有責任照顧自己，你兩老都一樣要自己照顧自己！
真係唔需要覺得點解呢樣我唔會嗰樣，唔需要內耗，唔覺有責任全在自己嘅，得閑見下面個飯互相關心下就好，唔好委屈自己🫂
你可能好細個，或者你可能父母全部都過咗身
有年紀大嘅父母如果你夠狠心，當然你可以唔照顧，但係好多人會放唔低自己嘅親生父母選擇去照顧佢哋，每個人嘅個性唔同有啲人比較念親情有啲人比較自私
係你父母沒有計劃自己退休生活。何解要怪別人。
兄弟姊妹成家已經係獨立，生活各有各忙。做兄弟姊妹邊個做到就邊個做，何解要計來計去？既然你唔願意照顧你父母你也可以自己自由生活，又何解要將自己嘅疲累推到別人身上呢？你咁樣生活過得開心？
仲有，你父母要山長水遠去探個女有何問題呢，呢個係你父母嘅意願你勞氣又有何用呢？你可以唔做，但你唔可以阻止別人。
點解唔係佢飛番嚟同老人家賀壽
要全家飛去俾佢賀壽？
佢兩老咁鍾意大女
你都係少見為妙
所以佢地每年都去一家團聚，我唔理，佢地開心 👌🏻
我點都唔會去
問題係你父母要令你要照顧，唔係你兄弟姊妹。唔好將上一代既野放落自己度。
20年時候，我亞哥叫我一家快啲移民，因為我有小朋友，佢同亞嫂會留港照顧父母。果一刻我係感動嘅，而家我哋已經有永居，兄嫂每年到英國探望，我哋亦每年回港探父母，心存感激！
好toxic, 講緊你
咁係咪所有人都一定要等老竇老母死晒，先可以移民？
1.點解兩老一定要下一代養 同要痴喺身邊？
2.下一代唔喺上一代嘅排毒接收者
3. 你成篇文更似情緒勒索
我老婆個case 同你有d 唔同
佢都係2兄妹
未移民前
佢呀媽有咩事，例如唔舒服/屋企電器壞左/有表格唔識填 etc 都搵我老婆。
個仔就唔煩佢，因為呀仔忙/要返工 etc.
我地移民後
佢呀媽就好唔開心
有d 怪我地離棄佢，令佢好唔方便
有次壞左個雪櫃，又搵我老婆，老婆隔住個電話好難先幫佢研究到係應該壞左。叫佢搵呀仔幫手，又話呀仔返工好忙。。。。
最有趣係。。佢曾經開口講第時層樓要留返俾個仔，個女係無份架
其實我地唔係貪佢層樓/遺產，但佢既重男輕女成日令我老婆好唔開心
好人話樓主葡萄家姐走得甩，自己抵死俾兩老情緒勒索。因為我都喺類似case，所以想講「移民咋，唔喺離開地球呀。唔可以親身到，出錢請鐘點、工人，多啲打電話關心，而唔喺要全家人遷就」 仲有移民前一定發生過好多事累積，移民/80大壽只喺引爆點
由始至終睇唔到有邊個情緒勒索你，只見到你勒索自己，響度庸人自擾，自怨自艾，你冇本事好似你家姐咁移居外地啫，唔好講到自己一個人要響香港顧哂兩老好辛苦，你係利用緊父母去親情勒索緊你家姐，同你做姊妹果個真係要搭飛機
全家最巴閉、最偉大、最受委屈果個係你囉；Loser特別多嘢呻，抱怨全部人，自己就啱哂，自戀型人格障礙；你只想其他人同情你嘅話，就勸你唔好L出po喇，盞俾更多人diu你；你嘅司馬昭之心，路人皆知囉，唔好響度搵架嚟丟
你為咗承擔家姐嗰一半照顧相親嘅責任，犧牲咗啲乜嘢？ 如果唔承擔，雙親會點？ 畢竟好多香港人無兒無女都一樣生存到
「破地獄」我同老公上年係外國戲院睇，睇到佢呀哥掉抵中左風呀爸比呀妹照顧，自己一家三口移民…..
睇到眼濕濕
十年前，我同埋老公，湊住2個BB，離開香港去外國展開新生活，感恩兄弟姊妹多，由細到大感情都算唔錯🙏
咁多年，呀哥家姐同細佬都無同我計較（當然應該要夾錢同比既我都會安能力比）重好明白我，屋企人會去外國探我地，成日寄野比我，而每次我返香港，都會「識做」，主動請食飯飲茶，會抽時間拜訪所有兄弟姊妹，又會安排時間陪父母覆診。好感恩🙏❤️
Btw，唔想界入任何人因果，不過屋企人無得揀，緣深緣淺都好，隨緣！
問心無愧就夠，每個人都有自己課題
祝福大家❤️
你香港有兄弟姊妹幾個人會好好多，但係我只係一個人，一個最普通嘅打工仔，我唔知佢點解咁睇得起我有能力去照顧兩個老人家。 同埋真係睇能力同年齡，可能當時你兄弟姊妹已經有經濟能力，但我當時只有我自己一個人，迷惘中嘅年輕人，我連自己條路點行都未知，佢就走人先。
同埋真係睇人性格，如果同我家姐獻殷勤，又關心佢etc
佢會覺得呢啲係我應份。
大家嘅處境唔同。 你真係要感恩。
同親生阿哥13歲開始已經冇嘢講，佢19歲拍拍囉柚離家出走。跟住我老竇喺我19歲就冇再俾錢返屋企。
跟住我就要孭起頭家，一切燈油火蠟阿媽醫藥費所有嘢都係我一個人頂晒。
我而家46歲，都仲係養緊阿媽，每個月至少一萬銀。我都好撚憎嗰個濕鳩大佬，我細個嘅時候日頭返工夜晚返學放假都要做兼職，人哋可以玩車溝女去旅行working holiday享受大學生活嘅美麗時光我就乜都冇做過 。
反而佢就可以自由自在冇責任，仲可以借到周身街數，成世人可以條條揈冇份工可以做超過半年真係爽 ，我仲知道阿媽偷偷失啲錢俾佢洗。
我case係咪俾你更加黐線？
你柒撚完未？
又咁講，點解你家姐又為左兩老而犧牲佢既家庭幸福？
又咁講，如果你早過你家姐結婚，而你老公移民，你又係咪會離婚？ 如果你唔離婚而移左民，咁你覺得你係咪deserve你今日怪你家姐既說話？ 你又會點面對呢啲說話？
你家姐同你係一家人，但佢同佢老公都係一家人，有時人係要選擇喎
又咁講，點解你從來唔講「點解佢離開香港時唔帶埋兩老？」 咁你咪唔洗而家咁囉
呢個世界無咁多如果，你覺得你諗既係唯一出路，咁你應該做既係「成長同長大」
而唔係一味覺得「個世界欠左你」
支持您，唔想做嘅嘢就唔好逼自己做。每個人都係「食自己」。您願意孭起照顧呢樣嘢已經好難得。我唔會話照顧係您嘅責任，因為呢個係佢哋自己嘅責任。
辛苦您要照顧自私嘅上一代。成個「家」得樓主一個孤立無援。因為佢哋槍口一致，一致咁對住您。
樓主保重，記得照顧好自己。
唔駛客氣，有需要再上嚟講。
記得自己係世上最重要嘅人。
要行有餘力、量力而為。見攰就唞。😉
點解你要照顧老豆老母？
個個成年人 應該自己照顧自己
唔講西方 日本已經係咁 父母自己搞掂自己 仔女去東京札根
定你要黐住老豆老母住….
所以點解你要對父母咁上心？ 佢地有佢地既人生
你有你既人生
你家姐有家姐既人生
香港已經好方便 老豆老母照顧唔到自己你都可以請個護工
係咩思想教你成個人生圍住父母轉？
身為仔女對父母上心我覺得係應該
只係應唔應該係全部都係我責任
and, 點解要係我請個護工？ 而唔係我家姐
你嘅思想好有問題 你諗一諗你自己先
咁樣講，其實有福果個係你
可以有勇氣擔起一人照顧父母到老，喺宗教角度嚟講係好大嘅福報，之後可能中六合彩，你家姐就無咁嘅福氣啦
我明，最嬲係移民果個臨走淨係一句「記得睇實阿爸阿媽」，真係頂出聲，你想過自己人生我明呀，但你憑咩站係道得高地叫我睇住呢？真係有咩事就話「叫左你睇住阿爸阿媽」，唔係要綁住你留係香港一齊照顧，但都唔好將件事當晒係留喺香港既人既責任，
一係你咁把炮就留低個錢請工人照顧兩老，有錢移民、無錢留個錢搵人睇住兩老，但又要指示人去做呢樣野喎，貞節牌坊就佢攞晒，留係香港同兩老一齊住果個但凡有咩做唔足就招人口舌
移左民就係咁叫兩老搭十幾個鐘飛機去探佢哋，點解唔係你間中返香港探佢哋呢？
利申：我老公就係要留低做呢樣野果個，我係側邊睇都嬲
亞洲父母最鍾意將養兒防老呢個概念融入孩子成長！
每個人都應該計劃+好好過自己人生！
父母唔係你／你家姐嘅責任～
你家姐／你移民都唔係問題，你父母好應該自己計劃老年人生。
所以，都有啲感謝個天要我受唔可以懷孕嘅多科長期病患。
而家先得44歲，如果早啲結婚，又冇做某啲身體檢查，根本唔知有病。
而家決定唔生，搵人睇命盤/星盤，我起碼都70歲過後先至死。
有乜業，喺我呢代就完結，自己第時冇人照顧，咪入院舍囉。
養乜兒防乜老？
自己都搞唔掂就咪鬼生個仔出嚟，性行為做足保護，就唔會帶新命嚟呢個世界。
而家世界太可怕，仲做乜要生仔，諗唔明囉！
你肯定你可以比到最好嘅生活佢，自己老來搞得掂自己，唔好煩到啲後生，亦唔好情緒勒索啲仔女先至好生！
利申：已經受浸廿二年婚姻失敗但未離婚嘅女人，教會幫唔到我解決問題，所以去搵朋友睇命盤/星盤，用另外嘅角度睇我嘅未來，完全唔係想催吉避凶。
（有好多網友會查背景，為免不必要嘅爭執，先利申信仰背景）
樓主 @lovekippi ，你應該係負擔得起嘅人，起碼有兩個單位。
記得而家唔好比你父母或其他家人親戚知道你搵幾多，必要時白色大話，話燉冬菇/失業乜都好，留返啲資源自己未來生活。
人不為己，天誅地滅！
希望你早日逃離魔掌⋯⋯🙏🏻
願平安！🫂🫂🫂
個問題係你自己
要衝出黎要照顧父母
你家姐想去邊係佢嘅自由
冇人情緒勒索你 係你自己自覺偉大
佢哋住緊嘅地方係我嘅，咁你係咪意思叫我趕佢哋走？
有啲嘢冇你哋講得咁風涼咁瀟灑
為什麼你的兩老會住在你的地方？本身佢哋沒有房屋，還是你叫兩老與你一起居住，方便照顧？
我明妳感受
我朋友家姐都係十幾歲出去讀書，一去無回頭
佢就好似兩老私家看護咁不停陪佢地複診，提佢地幾時食藥，點知兩老掛住嘅依然係在遠方嘅大女自己有時間就同另一半出去玩下休息好了，畢竟已經付出這麼多，不要自我情緒勒索自己啊
睇埋你上個post，你未又係頂唔順搬左出黎住，心態上一鳩樣，只係你家姐做得比你更好，講到尾你只係妒忌你家姐
其實你都可以唔照顧你父母，不過你廢做唔出咋嘛！要嬲就嬲自己，唔係嬲人哋。🫠🫠
我老豆都係咁，嫲嫲、兄弟姊妹都起鄉下，我地起香港扎根生活左幾十年。
因為重男輕女，我老豆又係長子，所以嫲嫲對我老豆特別，可以話係偏心偏得好勁果啲，但我叔叔同姑姐又好愚孝果啲。
我係細女，所以由細到大都比人當垃圾咁看待，所以我姑姐係勁勁憎我成日攞我黎發洩。因為佢唔敢直接衝撞我老豆。
咁嫲嫲臨尾幾年身體唔好要人照顧，咁岩撞中疫情封關上唔到去。咁老人家最後幾年精神有問題成日起道發癲（又跳河啊又話叔叔同姑姐要害佢）。我次次聽堂兄弟姊妹講都覺頭痛。
有次我姑姐唔知發咩癲同我嫲嘈交，影左啲嫲嫲排洩物既相比我，指桑罵槐咁鬧我點解咁得閒唔返上去幫手照顧嫲嫲。暗串我老豆老母唔照顧老人家。（其實我地出錢請左私人護工去照顧嫲嫲，6000rmb/月）
果日我姑姐鬧到我叫我跳青馬大橋😂總之係鬧我落地獄啦。之後叔叔話佢痴線做咩鬧個姪女。我同叔叔傾左好耐電話，我話我都明啊，我哋呢啲唔係長子既，不嬲起呢個屋企係垃圾黎。但我覺得人人都有佢選擇對邊個好既權利，人生在世，最緊要照顧好自己先，再照顧人地。叔叔話，咁果個係佢阿媽啊？唔可以唔照顧。我話佢有護工啦，你就交個責任比我爸同我哥，我地呢啲唔關事既人行開就得。
供你參考
我好讚成你唔好畀你家姐情緒勒索
我好讚成你講，做乜兩老生日，要成家人飛去搵你家姐， 如果想兩老生日去過Trip，都應該揀你爸爸最想去旅行嘅地方。

但另一邊廂，你家姐結咗婚，離開原生家庭，飛去加拿大生活，又唔可以怪佢，你怪佢唔照顧兩老，都PUA緊佢
我非常明白你,本身屋企就係成日,情緒勒索我,我而家已經抽個身出嚟,拒絕負能量,拒絕内耗,接收正能量,自己能力範圍之內,做到就做,做唔到就say no
我都係咁 其他人會話你都走羅 你都唔好理父母羅 可惜我心軟 做吾出 或者我都情勒緊我自己 只可以講自私自利才人活得開心 才是人類進化必要 做吾出嘅人 唯有承受
睇破地獄呢套戲，我覺得最撚自私嗰個係女主角阿玥，佢都一樣只係諗自己，仲要係出聲閙人嗰個，完全無為過對方著想，仲要覺得自己係啱曬。
睇咗好多你覆嘅comment . 其實睇落係父母問題多..
我係加拿大大, 中間跟屋企人返過香港再自己回流. 都係有小朋友,父母好支持
佢哋有屋有錢有買基金
幫埋我哋買(全部人都有) , 無人要比家用
我都係咁教個仔, 佢只要為自己嘅人生負責任, 大學佢會搬出去, 之後去邊個國家自己揀
我鄰居係白人, 佢都話仔女大咗其實真係一年見得過一兩次 , 佢哋有自己人生. 
好心你就唔好情緒勒索你家姐…
佢有細路，要為佢地負責。
你父母有啲遠見嘅，老早就90年代移民… 當年無做到，就要呢一代去還… 實要有一代人做出犧牲去斬纜。
睇到你呢個post, 你好似講到一家人移居走就係自私， 係咪都講緊我。 我地一家都係20年尾移居左。 我地只係用左兩個月預備時間就離開香港了。 期間我係照以前咁比家用，但的而且確兩老就靠阿哥去照顧。 呢幾年兩老既身體和精神都每況愈下，直接d講係老年人最不堪既晚年。 還健在，但已經自己照顧唔到自己。 本身兩老既關係一直都不佳，所以做唔到一個老伴既角色。 由於阿哥同兩老係同住，屋企都無空間載多一個工人。 到現在我知道他們的狀況我永遠覺得我係委屈左佢地兩老。 因為我既離開，我不能照顧佢地，他們不能見到d孫。 但我唔知你家姐情況，但我就真係唔想。 我的小朋友還有好幾十年要生活，我帶左兩個小朋友來呢個世界，見香港現在咁既情況，只能無奈地離開。 我希望你都能體諒一下你家姐，唔好帶住不安既情緒落去。 亦唔知你兩老同你關係如何，既然他們都行得走得，你可以享受跟他們相聚的時光。
睇你點睇，每個人角度都唔同，有兄弟姊妹，大家可以一齊照顧年老嘅父母當然最好，但為左下一代要移民嘅話，我都會尊重，每個人嘅能力有限，做自己能力範圍嘅事就得。就係大吉利是有一日佢哋不在了，你唔會後悔有野做得未夠好。唔好內耗自己！用心盡力，問心無愧就好！
80歲坐長途機去見佢一家？冇嘢呀？梗係佢飛番香港啦
係呀，但係我阿爸阿媽擔心佢要返工、有細路會麻煩、返香港住酒店會貴，幫佢諗晒所有藉口㗎
所以我冇問題，佢哋照去，佢哋開心就OK
但係我覺得我家姐嗰邊好有問題
睇到啲留言都好正常，我就放心了。
其實你係覺得唔公平姐？如果係咁，你咪一樣移民囉，你父母無咗你唔會生活唔到，都80歲人啦，大不了咪你地兩姐妹夾錢請工人/看護。
你家姐嫁咗出去，就已經係獨立，有自己一個家庭，無理由反對佢移民，更何況佢有小朋友，佢都要為自己下一代去想。只有你一個自己諗唔通姐，你家姐都叫你一齊去加拿大玩，但你為啖氣，偏偏唔去，就係無謂話佢唔啱啦～換轉移民個個係你，我諗你家姐都會支持你。
明白你
人走左就出返多少少錢
咁留低嗰位出力都gur d🙂
但嗰種背拋棄感真係好難放得低
一句：呀爸呀媽就交俾你 然後拍下蘿柚走左去
屎就由細幫手執到大 但兩老唔覺得有問題
仲會覺得你唔幫手係你問題 一家人都咁計較系列
這幾年移民的人都是這樣，為仔女？走難？老豆養仔仔養仔？不理父母像是理所當然！
有人說怪要怪父母沒有規劃好退休，他應該是移民或贊成的一批，樓主沒說過兩老缺錢，如缺錢也不會年年去加拿大，除了錢，陪伴也很重要，對時間的控制，樓主也有壓力！
樓主加油！做好本份便ok，不要給自己太大壓力！哥哥也可放棄，不必再在意他的一切！
我阿媽曾經鬧我：「 你都無同我地諗過我嘅退休計劃呀 ！！ 」 （我真係拗晒頭！？！？？）
你睇，佢哋咩都覺得係我責任
我阿哥都係咁
係我媽確認有精神病之後
又咁啱得咁蹺 話結婚搬出去住
當年我只有18歲 佢得23歲
就係咁 要我獨自一個人面對計時炸彈 隨時向我發火掃我啲嘢落地
不停鬧我 又會反鎖自己喺房鎅手
我日日都提心吊膽
佢呢
話自己大時大節有返嚟陪阿媽已經好好
成日話大把人已經冇陪老人家
到我依家離開香港個日
佢係我班朋友面前假惺惺唔捨得咁攬住我 我真係想嘔
事後俾我發現原來有拍片
講到幾感慨係度呃流量
我係獨生女，唔通我成世都要比我父母困住？我走咗喇。
最多touch wood有咩事我返去。
你父母飛得去加拿大，即係佢地都健康行得走得。感覺係你自己困住自己多d
作為仔女嘅 只要父母一日再生一日 冇咩事千祈唔好將啲錢使喺唔應該洗嘅地方 例如興趣旅遊 真係孝順嘅話就應該將啲錢留返俾父母養老醫病等等 溫馨提示樓豬唔好買樓結婚生仔等等因為呢啲都好大支出下 會嚴重影響到你父母嘅退休生活
我好理解你，抱抱🫂。咁你家姐起碼要比家用兩老，咁條氣都冇咁chok 
佢地話有，真假我唔知，點都一定話有架啦我知。
仲話層樓我第時要分返比佢地😌