我覺得我真係唔知點算……
無論係家庭、學業、人際關係，我都覺得我要頂唔順喇。點解可以做人做到咁失敗，一啲專長都冇，優點又冇，缺點就一大堆。其實我知我好平凡，但承認自己好平凡、好難呀……
一直以嚟我都唔知我想要咩，我已經中六，但一直都唔夠成熟。冇主見、人云亦云、三分鐘熱度，我根本唔知我想要咩。要填嘅jupas填晒，要揀嘅科睇晒，但我根本搵唔到我嘅未來。
先講家庭，屋企唔係一啲大富大貴嘅有錢人，但係基本上想要嘅爸爸媽媽都會滿足到我。佢哋好錫我，冇打過我，但我哋總係會有分歧。雖然話有分歧，但我哋到第二日之後又會一天到光晒咁，好似咩都冇發生過。我覺得唔應該係咁，問題從來冇解決過，所以我反駁咗。但係得到嘅結果只有：「我咁多年對你咁好為咩？有你食有你住，一啲都唔關心下我。」「我依家邊度係鬧你，我同你講道理咋。」其實聽到呢啲話嘅時候，我個心好痛。點解明明想和平咁解決件小事，但硬係會兜兜轉轉去返「唔孝順」「唔識諗」呢？點解次次都會係我錯呢？
再到朋友，我一直認為我哋可以keep到再耐啲。
小學嘅時候，我同啲「friend」（其實可以話係同學）都係一轉班就唔傾計，交流嘅都只有翻學時間，放咗學之後係完全冇嘢講。成個小學時期我都覺得咁樣係冇問題嘅，但係到咗中學變咗。f1嘅時候識咗佢哋，同小學唔同，我哋可以日傾夜傾，唔單止學校嘅，仲有生活嘅。我從來未試過有啲咁樣嘅friend。本身諗住f2我哋唔同班一定會冇交流，點知佢哋主動搵我傾計。我係不嬲喺學校一到班房，如非必要都唔會離開自己課室嘅人。所以當初見到佢哋嚟搵我嘅時候我超驚訝，又有啲開心。直到而家，我哋keep住有個group。但係，又有啲嘢唔同喇。之前嘅我哋明明無所不談，到而家我哋嘅chat room基本上冇郁過。大家開始有自己嘅其他friend，而我好似返返去小學咁，變返一個人。其實我有諗過一個人都幾好呀，我幾鍾意，冇人嘈你冇人搞你，可以靜靜地過一人世界。但當我打開ig嘅時候，睇到嘅係佢哋去同人玩嘅相，我又會好白癡咁諗，點解唔搵我呢？所以我del咗ig，諗住而家準備dse，再咁樣搞法我連覺到瞓唔好。明明友誼只不過係件小事，點解我要咁睇重。
最後再到我嘅成績。我諗唔明，點解明明小學攞頭5嘅我到咗中學之後只有中下游。明明已經讀咗band1點解predicted grade連25都冇。點解成績表上面都係會有fail。到咗而家準備dse，我個心一直定唔落。係做其他嘢時候又會諗點解而家仲唔溫書，明知時間無多，仲喺度玩其他嘢。但我成日都喺度諗，如果我冇溫書，噉咪可以證明我個成績係因為我未盡力啫。我知道我咁樣諗係唔啱嘅，有人都話你都未試過盡力又點知得唔得？我想講嘅係，因為我根本唔想面對盡全力但得唔到我想要嘅結果，我承受唔住呀。再加埋我一直唔知我未來想做咩，揀嘅elective散修修，完全冇關係嘅，連揀jupas都係睇住elective揀。我未來想做咩？有錢，然後洗錢。由細細個想做科學家，到甜品師，再到而家冇嘢想做，我真係好迷惘。考dse嚟為咩呢？我根本唔知我個分入到啲咩，做到啲咩。有時諗過，不如去環遊世界啦，一邊玩一邊喺嗰個城市做part time。我好嚮往，但係一諗到我要自己一個人，抌低屋企人去其他國家，我就縮沙啦。
仲有就係我頂唔順我嘅妒忌心。明明自己係個生得普普通通嘅人，但係硬係想有人贊自己得意，嚟證明我都係有人care嘅。點解會咁諗呢，係因為我身邊有個friend，明明我哋經常性成日喺埋一齊，我自認為我俾佢更識同人相處，有咩問題都係我解決先，但係所有人都係贊佢，贊佢得意，贊佢好睇，贊佢成績好，贊佢人好。明明我係佢個firend，我聽到呢啲應該為佢開心，點解會係妒忌？
好似暴露咗好多個人嘢，但我根本搵唔到人講呢啲嘢。同屋企人講嘅話佢哋會好擔心我，但係得擔心，佢哋冇俾過解決方法我。同朋友一樣，佢哋根本唔理解點解我會咁諗。不如一了百了好過，但我怕痛，又驚未知嘅嘢，又諗到屋企會傷心，根本冇勇氣去做咁唔負責任嘅嘅。
其實見到你呢個post，我有少少難過。難過係因為呢個係一個普遍性問題，大家都會遇到；難過係因為，似乎大家都搵唔到出路，深困其中。
家庭方面，其實你要認知到自己想「解決問題」呢個立場係無錯，佢哋做法其實係一種「PUA」同「情緒勒索」。生兒育女，唔通覺得有得食同有得住，就已經算「好」？固然唔可以否定佢哋付出，但依家係2026年香港，已經唔再係大飢荒年代，三餐溫飽即可。精神健康﹑溝通交流都係一種重中之重嘅問題，作為父母，引導仔女都係其中一個責任，否則你生命中遇到好多問題，好多信念，要用咩作為你支撐嘅根據？
又，「我同你講道理咋」。第一，你嘅道理係咩？屬好屬壞？有何根據？定係只係屬於自己嘅一種「情執」或者「我執」（即是將自己價值觀套用落其他人身上）。我覺得咁樣對你「好」，我嘅「覺得」係咪就一定適用於你？你要明白，好多人所謂「好」，只係基於自己冇深入獨立思考而又執著非常嘅「觀點」，你要當自己係一塊鏡，去照出佢哋種種唔同信念，而係當中又唔會迷失自我。
第二，既然講道理仔女唔聽，點解唔係反省自己點解教育唔到佢？點解唔係自己教育方式出現問題？身教永遠重於言教，細雨潤物無聲先係真正嘅感化。
世間萬事萬物都係相向，假使佢哋真係可以理性溝通，又識好好表達愛意，我真係唔信你會唔關心佢哋。你想仔女吸收維他命C，可以係食橙﹑龍眼﹑木瓜，甚至食鈣片都得；而唔係自己鍾意食橙，就要逼埋仔女食橙，然後覺得咁樣對佢哋「好」。教育方式唔夠有技巧﹑唔夠善巧，就只會係拔苗助長，最後只會一無所有。
第三，何謂「孝順」？孝順唔係聽話﹑受控制﹑全盤接收就叫孝順，有啲人會叫佢仔女去死添，唔通聽咗就叫「孝」？孝順係要「順於正理」，孝順係一種相向；孝順唔係一種控制，孝順唔係一種操控。
我呢番說話，唔係要你大張旗鼓咁去反駁佢哋，而係你要深明道理，了解自己唔一定有錯，佢哋都唔會係完全正確。只有信念清晰，睇得清望得透，然後你先可以心平氣和。心平則氣和，然而如何心平？明事理也。
至於朋友方面，固然需要少少緣份，但更重要係你要相信「真正同自己相應，又可以走得長遠」嘅朋友，係需要一啲時間去等待，而且係值得等待。我以前都會好重視朋友，事無大小，呵護備至，毫不誇張。但，得到咁又點？如果大家志不同，道不合，勉強都只係浪費時間。
我身邊最好嘅朋友都係最近兩三年先出現，但係喺佢哋出現之前，成個中學我都一直等緊，我相信我終會遇到。再者，往往好多時候，太過重視友誼，不過是「希望被認同﹑被肯定」呢種感覺，呢個先係你最後出口。佢決定你即使遇到，或者遇不到，都會知道自己條路應該點行。
你所謂「專長﹑優點﹑缺點﹑平凡」，不過是社會﹑學校﹑家庭交織的產物。邊個話你知你一定要偉大？偉大又為了什麼？偉大就可以得到愛和肯定嗎？不盡然也。有時候就算你好叻好叻，條件唔配合，你都一樣無用武之地。
講咁多，無非你要明白，你冇錯。生命很長，很遠；哈利都要滿11歲先收到霍格華茲入學信。你依家可能仲係行緊第一章第一回，可能到第二章你先開始入場呢？之後點行，你要重視自己內心力量，善學習﹑善觀察﹑善分析﹑善引導自己，此是解方。
師傅～你冷靜啲先
安靜左之後先可以諗到方法去解決問題
你個人愈唔冷靜，你就愈混亂。
關於讀書～ 你要揀讀乜野，或者有少少方向思考：
1. 你想第時坐office定其他？
2. 要了解下AI發展之後有乜野工種會受影響（即係因AI可能隨時比人炒）
3.有乜野工作類型係唔受經濟、疫症等災害影響（例如： 早幾年新冠，令航空癱瘓，空姐，機師等等失業； 餐飲因為隔離令又有好多人失業）
所以諗一d科目，唔受呢d影響而你又有少興趣讀～
再諗下 你揀左果科啦， 個錢途同前途係點呢？
如果你係男仔，我唔建議你用興趣行先，試下用將來生活諗先⋯因為男仔將來娶妻又要用錢。
你DSE,盡你最大能力去溫書，務求做到問心無愧🫂加油
其次： 朋友 唔緊要 你活到去30幾歲
留返幾個真心朋友就夠，因為慢慢你會發現家人比朋友重要，因為生病嘅時候，只有家人陪你身邊。
外表，內心⋯ 最重要係你自己嘅修養
知道自己嘅不足就慢慢改。