📌 有業主開價放$445
共 53 條紀錄
有業主開價放$445，但因為宜家有個生約既租客住緊所以安排唔到睇樓，所以業主肯降低叫價到$425。
同屋苑我地都睇過唔同座唔同樓層既單位，唯獨宜家呢個心儀既無得睇。AA話問過業主單位內無漏水問題，1手裝修，我地自己本身都諗住收樓全爆裝修。
想請教，無睇樓情況下買唔買得過，同埋AA話業主想5個月成交因為驚個租客唔夠時間搬，大家覺得會唔會有伏？求高人指教🙏🙏🙏
1，業主驚租客唔够時間搵樓搬，係因為佢想預多啲時間比租客，因為業主如果唔係交吉期比到樓你，業主要賠你好多錢，呢個係業主自身考慮的問題，
2，你可以去管理處問下，平時果一層樓有冇麻煩人投訴，或問題
3，如果你全爆，其他問題不大，如果滲水，外墙滲，係管理處負責，樓上滲，樓上負責，樓上唔理，可以出律師信賠你損失，或者你買家居保險都有理賠，屋內滲，你就要自己搞，但因為你全爆，問題不大，為咗保障你，可以係簽臨時合約時加一條：如果屋內有滲水，可以取消合簽，加賠償律師費，退回訂金，所有一切關於呢次買賣的費用，如果業主知道自己樓有問題，佢一定唔敢簽合約（有個阻嚇作用）簽晒文件，交吉前兩星期，買家有權要求睇一次4，要睇返土地成交紀錄，比較過往成交，再睇下425搏唔搏過，睇下會唔會再壓佢底啲
5，如果真係好想睇樓先放心，可以同A講：叫A說服業主比你睇一眼，我己準備支票，睇完即比票，寫好支票比A睇，比多啲信息A，話一定買，A會有計叫業主比你睇，A做sells,佢要想辦法幫你做野，佢要賺你佣金😂
6，我唔係A,只係剛剛同係一樣買一層唔比睇的樓，最後我諗盡辦法成功令到業主比我睇，樓價平過市價百位數，
希望幫到你
唔係迷信，但係置業始終都係好重要嘅事，盡量都揀啲自己可以親身視察嘅盤。記得前幾年睇過個二手盤，十幾年樓齡，業主已搬走，簡單家俬，牆身都企理，是是正正咁。但我仲有另一個屋企人總係覺得好唔舒服嘅感覺，agent當時就話可能係陰天加上潮濕。因為位置價錢都啱，約咗另一日再睇一次，撞到住對面，個樣望落亦好健談嘅太太，問吓佢覺得好唔好住有冇乜嘢大問題，佢即刻講咗好多嘢，話嗰間屋就唔係凶宅，但前後換過三個業主，第一個交通意外走，之後嗰兩個都係患癌走咗(都叫對得上個agent同我地講業主太太過咗身，所以業主唔想睹物思人嘅說法)。佢的確唔係凶宅，但個氣場可能就唔太夾自己(另一個一齊睇樓嘅長輩就唔覺有乜問題)，所以最後冇入手。
以前經歷同你相似，不過我在臨時合約有加條款：屋內如存在漏水問題，凶宅、屋契有問題，交易會取消
不過簽咗約，等待成交日子的時候每一日都不安心🤣好怕做錯決定，不過當時我是比市價便宜了七位數，所以我搏咗一次🙌🙌🙌🙌 仲要去問吓樓下保安單位有沒有接過任何投訴，知唔知有沒有漏水問題發生，個業主好唔好人，正唔正常？好彩最後間屋正正常常、沒有任何問題
不過再揀，我都唔會簽，因為真係好驚🥹 
如果樓上漏水唔肯整呢？樓上漏水但你買間屋無問題，算唔算完整交付？
我朋友10幾年前買咗間千零尺既屋，用咗2球裝修。 入伙無耐佢屋企樓上間屋既主人套房個廁所漏水滲落佢屋企個天花板導至滴水，攪到佢連住廁所個邊有1大衣櫃上層1/2完全用唔到，樓上個印度人就算被釘契都唔肯處理（有錢就是任性😅）。
只減4.4494%，你自己決定博唔博。再者，5個月成交期比普遍成交多出3個月。當$10000租金一個月，變相只平17個，即平得3.82%。
有租客住緊唔開門係正常。
首先你係買來自住咁你是否這個單位是心儀選擇，如果你已經睇過好多單位都不合適，咁你可以同A A傾，帶你去管理處問一問有冇漏水發生，上個單位看一看個門口左右隔離，有冇啲古怪嘢？ 再同業主講成交期最長三個月咁就合適啲。
因為你都決定全屋裝修，所以都唔需要單位裏面內籠如何，不過你都要問聲是否原裝間隔。
有緣既點都會屬於你
同你情況差唔多，比睇樓費個租客都唔肯開門
但由於自住都驚入到去會周身唔聚財
結果我mon實，要求做交吉後第一個睇既人
最後加左價，但成功買到
其實個單位入面冇好靚/令我好心動
因為個租客走左半個鐘後我就睇，化妝都趕唔切
最後買係因為理性上知應該要買，又好彩一直同個單位有緣
多口問句：加咗價，睇樓趕到化唔切妝，冇好靚，冇心動，咁個理性係喺邊一part？
間隔、發展商、尺價、屋苑、位置、景觀、保值潛力等令我覺得值得買
比起預期 Net 比多左$35000，我覺得還好
我覺得唔睇樓買樓個風險最大就係驚樓上漏水啫，但如果係嚴重嗰啲漏水，管理處同租客都會知道啦，你可以睇上下唔同層嘅單位睇吓，如果你無啦啦肯-200,000覺得咁樣先有啲危險囉😅除非你真係我好鍾意嗰度又好少放盤啦，如果唔係建議就搵第二度囉，同埋五個月成交就太長啦，正常兩三個月點會搬唔到呢？
越有得睇你越心儀？心理作用
其實你都全爆，你應該narrow down邊一座+邊一個座向+樓層。再係呢堆盤㨂最平個幾間睇，冇得睇就壓佢兩口價。
講真$400左右既盤，質素分別唔會大，主要因素係樓層同座向，爆間好驚艷、非買不可既單位機會極微。
我唔係agent, 買過幾次樓，又放過租又賣過樓叫有少少經驗🙏🏻
我同你一樣。睇左同一個屋苑同一個尺數既單位，但唔同座。呢個租左俾人唔俾睇樓，租約到7月尾
但我諗左一晚，都決定買，業主1蚊都唔減6xx,但私諗住麵環全部裝修，同埋呢個景觀比之前睇既座數開揚。
睇左上年佢放上地產放租既VR片同相，感覺唔差。所以都照入票照買，好似開盲盒咁，之後交吉就睇到
其實又冇乜伏，價錢反映左冇樓睇嘅事實
1） 你要睇清楚租約幾時完
2）我覺得你誤會咗經紀的說話. 有邊個收租業主賣樓唔想盡快收錢？成交期正常2個月內便可以. 成交後你就做左業主完成餘下租約及踢租客走
3）你要同銀行講明申請按揭時冇得俾銀行去驗樓
4）如果你要高成數按揭就不可以買連租約物業.
當年第一次買樓因為有租客無睇樓比估價平10萬買了，之後我賣出去同樣因為有租客所以佢無睇樓下買了（市價賣）。當時我租客已住緊第3年，我自己覺得租客肯續租都唔會差得去邊，睇晒屋宇其他單位知間格同景觀，你又諗住全爆真係無咩所謂，反而問比你入去睇一間好靚的化妝樓你又識睇咩？
少伏，我之前心儀租住緊嘅屋苑高層單位
我Offer 9.8m, 但業主聲稱唔想打擾租客，所以唔俾我睇，我話我真係有心買，連支票都準備埋
Agent 話唔使睇可以9.6m, 更加覺得伏，冇理由自願劈20幾萬都唔肯俾我睇
最後單位9.4m賣出🤷🏻♀️
AA講嘅嘢信一成好喇！唔俾睇又無熟人有情報真係唔好搏，尤其舊樓太多有樓上漏水，樓上唔肯搞你就一世，如果你唔係投資者係自住，我係你就一定揾過另一間有得睇嘅，信自己對眼唔好信趕住促成成交賺你佣金嘅AA巴口呀！
話唔會冇得睇嗰啲，應該都係未買過樓，好多時靚單位嘅業主企得硬，唔怕賣唔出，有租客唔會俾睇樓，買就買，唔買就算，講真個價錢計平咗，你就要有心理準備收樓後可能有啲嘢要執修，有冇漏水都可以嘗試問管理處嘅
樓主都講有租客，一般租客唔想俾人打搞，佢無義務俾睇。所以啲業主寧願減多少少免睇。話五個月呢，可能新租客，死約，如果趕走要賠租，同埋食多幾個月租金，所以你唔急要咪遲啲交收，價錢又係反映左售價內。
以前做過5年地代，其實你買樓都係入去睇一陣，好多野都係收左樓先知。如果座向樓層你接受，買上下層問題唔大，當買盲盒，開出來靚仔咪當獎賞，唔靚咪自己攪裝修。我建議去馬，最緊要係單位正常狀態。
我上一層樓買個陣都係無睇過，仲要一年後先成交😂我覺得呢啲野都係你岩就岩，吾岩就吾岩既~ 我個陣又係全爆所以佢原本有咩問題都會全爆就解決返，所以我無諗咁多。so far我住左幾年都無問題😀
除非你唔志在訂金，冇左都冇所謂，否則建議要睇左單位先好比訂金，agent 講野唔好信晒，講到天花龍鳳都冇用，佢都係想做生意，最緊要用自己對眼睇。間屋又係租客住緊，唔知道租客住成點。
冇得睇, 就係博, 大問題可以試問管理處, 漏水嗰類有可能會講
5個月成交唔算合理, 我覺得正常係成交後, 新業主同租客傾合理啲
建議你叫AA 同業主傾, 用成交期長短, 去試下叫租客俾你睇樓
如果係生約期，唔駛拖5個月，1-2個月應該收到樓嘅，拖5個月點解要接受？點解唔連租約放賣？
如果生約期住客冇趕住搬，間屋應該冇大問題，小問題就難講，你預左全爆應該ok
唔建議，睇咗先好！另外必須交吉簽約。如果你買咗租客賴死唔走，或者上手無退按金，你真系隨時要搞好耐先得返間屋。得不償失！而且按揭未必做到高數
你本身諗住全爆 睇唔睇樓就好閑 好死
不過長交吉就留意下面問題
下面都冇問題
咁睇下長交吉業主可以平幾多比你
你就曬業主冇可能業主唔洗平返比你
我想當年都試過喺冇睇樓嘅情況下買咗層二手樓 壓價平好多
如果你諗住全爆裝修 就算有漏水問題
你都係會重新處理過防水層之類
我覺得問題不大
去樓下管理處度問，第一個單位有冇投訴過樓上漏水，第二樓下單位有冇投訴過佢漏水。其他嘅嘢你唔需要在意。全爆嘅話你唔需要理佢入面咩狀態
一聽就覺得伏，衰啲講句20萬夠俾好多個月租金
業主係有心嘅就趕走個租客蝕少少租金都唔蝕俾你啦
分分鐘個業主都唔知個單位內部依家咩情況
五個月成交有啲奇怪
因為租客搵樓唔會需要搵咁耐
至於單位無樓睇 老實講
agent同你講 無漏水 係無意思
到時真係有漏水 唔通佢會同你負責咩
我20幾年前買樓時，重帶埋個3~4歲小朋友去睇樓，當時小朋友跑來跑去，好開心。
最後我就買左了，住左20幾年，安安穩穩咁生活左20幾年。
一定要睇樓，Agent 把口話乜都得！而家明明係buyer’s market!
成交期長，咁要要求訂金托管於律師樓到成交，以防空中釘！仲要查多幾次冊
如果你可以選擇，不如睇過其他樓！無樓睇去買，真係好大風險。仲有可能業主根本唔係開445，話減多20萬俾你，應該AA有蠱惑。😎😎😎
一聽到5 個月成交已經可以睇過第二間，經驗之談。你有冇睇過份租約，份約有冇打厘印？我估租客份生約可能係5 個月之後先夠一年。
咪玩啦，唔通業主同你講：「係啊我廁所漏晒水，你壓多我50萬啦！」咁咩？
除非一心諗住全爆啦，無睇樓就買真係高風險🤧
我之前租樓，業主賣樓唔想俾我知，唔俾人睇樓
但咁岩agent 係我同期買樓同一個
佢就收平我買樓嘅佣， 求我俾個買家入屋睇
全唔全爆都要去睇下間屋先啦
有feel 下間屋同你夾唔夾下
如果touch wood 間有你買左先入去，周身唔自然，咁你點呀…買左囉
唔建議，好多伏位你要入左去單位睇先知，例如附近有垃圾房臭味、樓上長期有細路大叫揼地、附近機房長期有聲等等
成個香港又唔係第一個盤
做乜要冇咁嘅風險？
就算佢平咗將來如果維修遇上大問題，你都係要自己食
唔需要因小失大
除非本身都諗住租俾人，否則都唔好有租約。一陣有乜嘢壞又要你整，都好麻煩。再壞啲遇到西租客或者租霸就大x鑊。
我地最近入手個個就係有租客無睇，睇左外圍花園 村屋就即刻落訂了，因為都真係好快就會比人秒殺 ，鍾意就買
無得看情況下，我經歷買過2次。
一次連死約
一次看相片，舊業主合約上寫明，要交吉交易＇不成功就減錢
驚你買到租霸，層樓係你，但租霸唔肯走，上庭都幾个月，東張定youtuber有講，比我唔會買有租约的樓
全爆裝修50萬起跳，減廿萬咁少😒
而且有啲嘢係錢解決唔到嘅，例如樓上樓下左鄰右里住咗個怪人🤪
我睇個間有租客，都真係叫咗好耐有得，但啲時間當然唔係咁好，但買樓真係要睇 ,唔係買咗有伏唔知
一陣原來廁所塞，天花滴水，牆有個大窿，咁點算？又或者個租霸唔交租又唔肯走，你就做咗替死鬼
如果冇睇樓情況下，真係唔建議你買，始終買樓都係要入屋睇眼緣，同埋你自己入屋要感覺舒唔舒服
俾封利是個租客，叫agent幫口問吓入去睇，順便問吓單位有冇問題，佢係租客又唔係佢賣應該肯嘅
睇都未睇過就心儀
四百幾萬既二手野
如果你覺得400幾萬都唔係啲乜嘢嘅話
咁其實都可以買嘅
就算有得睇有時內在流水都唔知。更何況冇得睇。大娜娜四百幾萬，我一定唔會冇睇樓之後買。
原來真係好多人乜都唔識😂
建議你都係問番啲專業人士啦，如果真係過唔到自己，咪唔好買囉
如果我係租客，業主安排有人睇樓，只要約好時間冇問題。除非業主怕我講左D唔應該講嘅嘢！