📌 睇完12歲報警拉亞媽
共 49 條紀錄
睇完12歲報警拉亞媽單野，想問幾多人比父母打，打到想報警拉佢地？
最癲果次係點打法？
我細個真係比佢地打到出血，唔止用籐條，衣架，用褸既拉鍊fit 埋去都有，最癲用電熱膠鎗「辣」都試過。
果時真係諗過報警😭不過報完警拉左佢地，可能之後仲打得勁😅
細個俾老豆用不求人咪落黎打斷咗隻手指（破皮流血+變左L型），佢冇帶我睇醫生金監粗俾佢駁返埋，今時今日我隻手指有返100%活動能力真係奇蹟
細個試過因為唔俾我遊戲Account我細佬用，臨返學前俾老母打到牙血鼻血一齊流，佢要我戴口罩唔好俾人發現。做錯事要跪低俾人鬧一邊用腳踢。但細個最ptsd唔係皮肉之苦，係有次同細佬鬧交，老母拎起我隻倉鼠，放落個圓筒膠兜，係我面前放熱滾水落去，我唔敢望，好記得大聲吱咗一聲，我隻倉鼠就死咗，喊咗幾日喊到成個人乾曬，但點都改變唔到個事實
8歲俾監護人（親戚）打到個頭殼淋咗，我同學仔話咗俾老師知，我瞓咗醫院個半月，結果社工都喺監護人哀求下無送到我去其他住宿服務。
13歲，俾同一監護人（親戚）用菜刀劈，避開咗所以只係劈到膊頭。成個bra top都係血。
細個俾老母打到仆街
純粹情緒發洩，唔係教仔
衣架藤條呢啲基本嘢
最勁嗰次地拖棍，打到埋牆角，阿爸終於忍唔住出手撳低，話再打落去會死
最記得有一次喺屋企，阿媽返嚟就打咗一鑊金嘅，但唔知發生咩事。
打完，跟住我問佢係咪輸咗麻雀
佢淨係笑一笑
細個我係好曳成日比人打，雞毛掃、木衣架、拖鞋呢啲都係我兒時玩伴，通常亞媽係劊子手。
最深刻一次成世都記得，小學唔知做錯乜，亞媽用個裝米嘅麻包袋，以前果啲好大個，入住我一手揸住袋口，一手揸住雞毛掃狂打我，我一路喊一路叫佢唔好打，知錯啦對唔住，佢冇理繼續打，喺個袋入面好黑、好焗、成口毛、唞氣好辛苦。
唔知係咪睇得武俠片多，我詐死唔出聲唔郁，死忍住痛過咗一陣，可能佢以為我死咗先停手，之後我淨係夠膽唔啋佢一日，我又好勁冇PTSD，好似冇事發生一樣。
我話比啲fd聽個個眼都突，有啲笑到仆街，諗起都好癲，估唔到我細個求生技能咁出色🤣
其實個12歲去報警處理，係真係好無助下先咁做，假如佢唔咁做，可能重大鑊，有身心精神受傷 到大過重有反社會人格傾向….
我爸係圍村人，我係女佢地覺得係蝕本貨，佢喺出面做嘢受完啲氣就返嚟打我，老母就因為我駁佢咀打我，打到成身藤條印返學。公公見到咁嘅情況，同我爸講你地咁樣打個女，唔好搞到個女咁低賤得唔得，但都改變唔到繼續俾佢地打。
依家就係咁催我生小朋友俾佢地玩，佢地都on lun 9，咁想生自己生啦
我係資優兒童
父親係紀律部隊
冇原因咁打
半夜三更
除晒啲衫
唔俾喊
喊繼續打
母親言語暴力
而家抑鬱症
一生人剩係俾阿媽用藤條打過一次，打完之後佢好心痛攬住我喊，從此之後就冇再打過我。
睇左你哋呢啲打，係虐待兒童嘅級別😓我細個都好曳，我阿婆都會打我，不過最多都係攞筷子，一係藤條追我九條街fit我兩野，係諗番覺得好笑嘅回憶，但你哋呢啲完全係童年陰影🥺
我都想知
細個試過畀老豆用膠水喉通打
我老母仲話我老豆係扮嘢，打落張床都唔係打我都唔痛
佢都on 9，我老豆打咗落隻腳度打條水喉通邦邦聲，乜撚嘢打落張床
打嘅原因係佢帶我去佢朋友啲飯局
小朋友返完學，用誇張嘅修辭手法，咁我就讚啲嘢食：「未食過啲咁好食嘅嘢」
（事實上係好食）
佢返屋企嗰陣時話我失禮佢、搞到佢好冇面，人哋會以為我哋屋企好窮（事實上係好窮，家徒四壁嗰隻）
自己窮又死要面又唔接受現實🤡
細個媽媽癌症過世後我老豆開始棍棒教育，我都明嘅壓力大又唔識教（以前都係阿媽負責晒）
有一次有唔知邊度嚟嘅“親戚”嚟屋企借住一兩日（1男2女），走咗之後發現少咗啲金器。我老豆就覺得係我拎嘅，用吸塵機管狂抽我。因為果時我間唔中要去醫院見心理專家（癌症關懷），我老豆打我果時打到面，就畀姑娘發現咗，最終報警
上一代人更本唔識教小朋友，打係為咗發洩～明明講好咗好幾下，一fit落嚟好似high大咗咁，不停狂fit，真係雞毛掃都打爛幾條，衣架係最L痛，點解會捨得咁樣打自己個女，不如唔好生～我放唔低，到而家都放唔低，正常打可以教可以但唔好發洩囉～唔該
我媽睇完還珠格格，學容嬤嬤用針吉，冇明顯傷痕，勁變態。。。
6歲唔識做功課，我老豆一張木櫈離遠車埋嚟
我同朋友打邊爐，我媽用地拖打，我懷疑係佢自己冇朋友，唔想我有🤫
仲有好多，不能盡錄，已繼聯5-6年 🤣
最難忘係3-4歲時講大話，俾媽咪用針狂拮條脷😂😂😂😂😂😂之後仲俾媽咪綁咗喺廁所，望住佢拎個菜刀斬咗我Barbie個頭落嚟😂😂幾個鐘後仲綁住遊街，最後喺大排檔見到契爺，幫我鬆綁幫我抹血😂😂😂
瞓瞓下覺，俾阿媽開門入嚟、扯開張被、扯起身直接摑咗幾巴，到而家提返佢都仲會理直氣壯咁話，咁我嬲呀嘛，嬲就控制唔到㗎啦，你係我個女我鍾意點都得，我使咩尊重你。 呢次唔係最傷但係最驚。
到我26歲果陣 佢都仲係會直接車嘢埋嚟，雖然大咗之後會識擋識避。細個果陣根本就無得避。細個果陣成日聽到你唔曳點會打你，聽得多就真係以為係。
細個考試冇80分 比阿媽用衣架打到身上無數咁多條痕是基本
做功課計錯數 打
比佢打喊得太大聲 再打得勁d
落街玩遲5分鐘番屋企 打
唔食苦瓜 芫茜 打
果陣有諗過佢係咪有精神病
到大個搬咗出嚟住冇同佢聯絡 個人輕鬆咗好多
試過籐條、衣架、高踭鞋。
同你一樣覺得報警冇用仲會俾人打得勁d
所以15歲就同自己講畢業即刻搬走💩
而家移埋民見都唔洗再見
佢地話想黎探我但我連住邊區都唔想講。
有咩悔意？
我老母早兩年同嬸嬸傾計果陣仲大大聲話
「父母兩個都打先教得好個女」
佢地從來都冇覺得自己做錯過😉
你呢個情況我感同身受。若有人話：「好好同亞爸亞媽溝通，乖」並唔係所有父母真係願意坐低同仔女溝通或聆聽仔女嘅感受。有啲仔女甚至可能因為咁樣而遭受父母更多嘅凌虐。
根據心理學分析，事實上，俾父母「糟蹋」嘅仔女係唔會討厭父母，仔女可能更加討厭自己。
「天下無不是父母」「企喺爸爸媽媽嘅角度諗下喇」「但你爸爸媽媽明明幾好啊」呢三句難聽過粗口，係完全唔適合用於「俾爸媽糟蹋/身體虐待/心靈虐待/精神虐待」嘅仔女身上；喺呢類無溫暖嘅家庭中成長嘅仔女從細蚊仔時候嘅經驗，幾乎係以爸媽嘅角度出發，作為仔女嘅根本無法擁有自己嘅感受同發表意見嘅餘地。
「天下無不是父母」即使有人深信不移，但咁講等於否定咗仔女嘅負面感受，合理化父母嘅失職行為。
身為局外人嘅，係永遠唔會知道父母喺外面嘅態度同喺屋企嘅態度相差有幾多。
細個大約7歲開始，阿媽可能輸麻雀或者見我駁嘴就用藤條/衣架/鐵衣架打我再罰跪地主公公一個鐘。一星期都打2-3日。我記得小學有個同學係每日同我鬥多藤條印。以前覺得體罰係正常。媽媽上年同我道歉，佢話當年都唔知點解咁過分。我其實原諒佢嘅，但真係好大童年好陰影同創傷！所以我一次都冇打過自己小朋友，真心唔想變成同佢一樣嘅人。
我阿媽有個雀友個女仲慘。佢比我細3年，但係佢長時間係俾人用鐵鏈鎖住，衣不蔽體困響廁所入面。仲要周不時入去開凍水淋佢！屋企人唔俾嘢佢食，好瘦似營養不良，每日都捱肚餓。我真係好懷疑係咪親生嘅？當年覺得佢好慘，好想陪佢玩同講嘢，但當我一行埋去嗰啲仆街大人就會阻止。唔知呢個女仔而家點呢？我間中都諗起佢，佢真係好苦。
睇左幾個留言真係睇唔落去，都唔明，點解咁多人生得出黎係自己仔女都要咁嚴重打法，嬲極用手幾吓咪算，要發洩自己唔打牆嘅？恃住自己係大人有力量咁係欺凌唔係教導喎
無嘢嗰啲無出聲啫，用咩鐵通水喉就嚴重咗，但我相信大部分娘親都只係籐條炆豬肉，大把人畀人打完大個都正正常常
試過係屋企睇住我呀媽攞木棍打我呀哥打足40分鐘，最後支木棍斷咗，我呀媽攞2枝藤條摺疊一齊繼續打。
我嗰晚一邊沖涼一邊喊，真係好冇力好心痛。最後得知原因係因為我呀哥冇聽到我呀媽電話
雖然一直都係被屋企人由細打到大，（被人打完聽日要著褸番學）但係呢件事過咗6年仲好大陰影
我細個唔記得咗因為啲咩事，俾我阿媽用藤條打到成身都係傷痕，仲有流血，然後罰我企喺大門同鐵閘中間，企足一個鐘企到我瀨尿，然後佢發現我瀨尿之後繼續再打，藤條都打斷埋，跟住就轉雞毛掃，然後雞毛掃都打斷埋，佢就用鐵衣架，我記得我隻腳啲傷口加埋尿液跟住發炎，啲傷成個月先好返
仲有一次無啦啦發脾氣拎起把生果刀就飛埋嚟，好彩我用手擋開咗，但係都戒咗個幾深嘅傷痕到而家20幾年都仲喺度，當時佢仲唔俾我入醫院聯針，用啲紅藥水倒落去就咁消炎
我淨係想知你地係咪每個！每個！！都有離開原生家庭！！
我老母用單車鎖打我手臂都無諗過報警wor。點講好呢，我的心態係以大欺小係唔啱，但唔夠人打咪認囉，諗下點強大自己好過啦。
舊時無社工 藤條+拳腳+棍都有
細過玩過武術 會定期訓練體能
開始還屋企人拖搶藤條 徒手擋棍
擋甩灑啲架餐就雙方你一拳我一拳
老母冇眼睇就番入房由我地打餐飽
可能男仔皮粗肉厚啦 生涯冇流過血
但好多時上半臂擋棍/擋拳到瘀灑
瘀痕好多時4吋長都有 外觀成隻手黑灑
到老豆受傷幾次 無限期冷戰就冇再互毆
到而家就黎20年冇講野
至於原因 佢好enjoy欺凌對方而對方反抗唔到嘅快感
好多時無啦啦言語挑釁 你敢反抗就動武
唔係壞 只係同啲虐待狂同見到啲可愛小動物就想打爆佢嘅病態一樣
上一輩父母 唔識愛護細路 又無咩學識 邊有而家d父母會關注心理發展 永遠做錯小小野就打 仲要情勒 土皇帝咁 要人服從 cls 仲要求返仔女孝順自己
上一代生得多啲仔女唔矜貴，同埋上上一代都係咁打咁教，慣咗教仔要打打打
以前細個比老母用針吉，吉完都無咩傷口呢下先絕，到中學仲比老母打，直至有次打我，我啤佢，心諗等你老左，你就知道咩後果，過左幾日，佢幾日佢同大陸親戚打電話，講唔會再打我，因為我眼神好恐怖。到依家大左，有次講起你係我細個打我，佢扮無呢件事😀
嗯有一次 唯一一次 老豆飲醉酒打鳩我 係地鐵 一巴車埋黎 我後尾有當住佢屋企人面講返 委屈到一路講一路喊
然後佢：「比佢講！佢不滿佢咪講出黎」
然後我講完 就完咗 無解釋無道歉
哦我而家單方面block臭咗佢 因為啖氣真係落唔到
細個8-9歲， 老豆補緊房門框啲油漆， 我唔小心揩到， 佢將我成個人打橫抬起行去客廳用力丟我落梳化， 因為太大力我反彈落地成棚牙同塊面流哂血腫哂， 個口合唔埋講唔到野。 番學校老師見到急召我老母去學校問係咪家暴， 我老母話係我自己跌親
塊面同棚牙包撚左幾個月先好番
呢單野記一世
仲有鎖黑房， 趕我跪門口，衫架藤條打出血呢啲巳經濕濕碎
家姐都會打我， 最勁係做緊功課時一枝鉛筆插落我手臂度， 即時噴血， 但我老母偏心無鬧佢🤡
12歲個單都冇我老豆阿媽打得咁金
細個比我老豆用鐵衣架打到對腳瘀晒
亦都試過比佢攞皮帶fit左兩下
細個偷阿媽錢去冒險樂園玩
佢又係攞鐵衣架打我 同埋想攞刀斬我隻手
雖然最終冇斬到 但同佢搶刀時
比佢把菜刀𠝹親隻右手 條痕仲係到
除左用鐵衣架 亦都試過攞雞毛掃
不求人 掃把打我
但我細個完全冇諗過要報警
咁嘅父母，真係直情報警拉佢地坐監喇，唔使心軟手軟
大個之後直情唔俾家用甚至搬走，斷絕關係
我只經歷籐條／衣架打過，大約1X歲非常憤怒的反抗，自此，媽媽就改變策略，變成言語暴力。但我也是在38歲，Psychopath 的長期折磨虐待下， 長期針對變成Body Dysmorphic Disorder 毁容脫髮，才明白自己一直被Coercive control,自己被虐待。
細個試過唔止一次俾老竇用藤條打，fit到我成身都係紅痕
睇完你們每位講嘅往事，好想講一句辛苦晒你地🥲 而家冇事安全啦🫂🫂