臼井靈氣（8）

不過老實講，我當時都係一個迷惘少女所以先至會俾佢啲多愁善感嘅文字吸引到，只不過我個人太i，所以見有好多人圍住佢，我就會企埋一邊果種。Anyway上完兩堂就完成咗Level 1，第二堂教咗啲咩我完全冇印象，大概都係catch up下閑話家常。印象深刻既係佢同我地講，我地係唔需要害怕人地「放負」，一但聽完人地「放負」後感到受影響，只係因為當中內容trigger到我地，點解會trigger到呢？就係我地內心都面對緊相似既事，或者一隅有相似嘅感受。唔好太into當事人既說話，自自然然就能減低影響。佢亦鼓勵我地有煩惱可以拎出黎一齊傾，或者傾既過程都令其他人有得著。當時係個emo小女生既我覺得呢個人包容力好強，我好buy佢講既說話，亦都好想將來有胸襟可以好似佢咁。

Level 1係完全冇教任何符號嘅，所以未做到當日C先生遙距傳靈氣嘅效果，毫無疑問地我就上埋level 2。靈氣既傳統係頭三個level都有兩堂，第二堂叫「跟進班」，係上完第一堂之後隔一兩星期再上既，主要睇下大家上完有咩變化或者疑問，最後level 2我一直未上跟進班，因為我覺得做完attunement冇令我有任何變好，甚至差左，就係第度識左幾個同我一樣鐘意身心靈既友仔，跟佢地轉埋跟另一老師。