見呢排大家都講緊傳銷 我都分享下同一個傳銷狗拍拖兩年既經歷 嗰兩年會話係生不如死

當年20出頭 係交友app認識對方 嗰陣大家都係大學生 一開始佢無同我講佢做傳銷 係一齊咗個半月之後 佢同我講佢同啲朋友經營一個網上平台 賣下supplement化妝品嗰啲 我以為係hktvmall嗰啲 問佢係咩平台佢冇講 佢淨係話：如果你有興趣想知道我做咩嘅話 我可以帶你上去參觀吓我哋個Office 跟住我就話好

去到嗰日 我着到靚靚 諗住真係純粹去參觀吓 認識吓佢啲朋友 點知一上到去 有個西裝佬行埋嚟同我握手 然後佢同我個傳銷狗ex一左一右咁夾住我坐 我坐喺中間 佢哋就開咗個PowerPoint嚟同我講 當時我完全唔知係聽緊啲咩 純粹係覺得好似幾好咁 然之後又有個大佬行埋嚟同我講 話咩：你咪當係將你平時啲日用品由百佳惠康度轉嚟我哋呢度買囉 / 覺得好用嘅咪同你啲朋友分享吓囉 嗰下我仲係覺得冇乜嘢

跟住個傳銷狗ex就話佢哋間舖頭喺隔籬 行過去好近 可以帶我過去望吓 跟住我就跟咗佢哋過去

間鋪係家樂坊15樓 我係第一次去 上到去個傳銷狗ex拎咗一份form俾我填 叫我俾$380做會員 然後有袋雜誌宣傳單張嗰啲 佢就話袋嘢佢幫我keep住 話咩因為60年代有一場直銷風波 你阿爸阿媽可能聽過呢單嘢 跟住又話你返到去唔好上網search喎 唔好理上網啲人點樣講 唔好信佢哋

跟住我返到去上網search
仆街原來佢係Amway既傳銷狗☺️
係我人生中第一次咁近距離咁樣接觸傳銷呢樣嘢

事後諗返其實佢真係好撚仆街 咁樣水自己條女去做傳銷

事後我有同佢講話我唔想做傳銷 佢嗰陣冇逼我
跟住後尾就係咁叫我食supplement 不斷話我肥 不斷話我缺呢樣缺嗰樣 每日要食好撚多supplement
又話我皮膚唔好 要我用佢哋嗰啲護膚品
有一次喺家樂坊嗰度做inbody test 係咁話我缺啲乜缺啲乜 嗰吓我突然間喊咗出嚟走返屋企 嗰陣覺得自己身體好差好大壓力
又試過叫我跟佢去上Amway既減肥班 我減左幾%體脂佢開心到打晒飛機咁 即刻影低我個inbody report擺上佢哋個group俾人睇佢哋嘅減肥班係幾咁有效
跟住去到我體重反彈番嘅時候 佢對住我閪口閪面 冷暴力左我個幾月
利申 我有份俾錢買 唔係佢比曬

做得傳銷狗個腦都係黐撚晒線 當初同佢完全係冇咩話題傾唔到偈 食飯嘅時候不斷同我講點樣做生意點樣賺錢 講佢哋做傳銷嘅理念 財富自由 被動收入 創業 追夢 創造價值 blablabla呢啲 傻鳩你只係一個sales嚟㗎咋 次次食飯佢講呢啲嘢我都已經黑晒面表現到好唔耐煩但佢都會繼續講 又試過夜晚10點幾打黎 喺度同我講佢今日Amway上堂學到啲咩 同我講MBTI講咗個幾兩個鐘 我完全冇聲出 又試過搭緊扶手電梯 佢喺後面無端端咁話：呢個社會 你無錢 就係人都憎你

傻鳩 呢個社會係人都憎你地呢啲害人不淺既傳銷狗咋

一齊兩年 我會諗 唔通我要同一個傳銷狗結婚 下半世人每一日都喺度食supplement 每一日都要對住一個咁樣嘅人 聽埋晒啲咁樣嘅嘢 我真係唔想 覺得好撚辛苦 去到最後分手 我真係覺得係解脫左 Become another person咁

Fyi 佢正職係老師 真係好想同教育局舉報呢啲社會敗類係到誤人子弟 

點解咁你都拍到兩年?…

咁你都忍到2年

佢哋有好成熟嘅系統
由點樣開始帶人入嚟 去到點樣傾
都有晒詳細計劃
係咁PUA你

請問咁樣點拍到2年？

算啦，呢啲劇本係剩係得你唔知

On9 第一次當你唔小心 知道後仲拍多年半 除左抵撚死仲可以講啲咩？

2年？？？

KK園既前身咪就係傳銷狗囉

忍耐力驚人

@0.7.18