📌 近年睇香港電影，我有
共 63 條紀錄
近年睇香港電影，我有種愈來愈強烈嘅感覺：眼高手低。至於「眼高手低」有幾「低」？有幾次完場我要特登Google導演個名Confirm下係咪學生作品先敢評價既「低」。
創作人想講道理、想借喻香港處境、甚至想「教育」觀眾，呢啲諗法本身唔係壞事。有話想說有感而發，本來就係創作嘅一部分。但問題係：大佬你連基本功都未做好。
劇情推進生硬甚或零碎散亂，人物塑造面譜化，節奏尷尬到令人出戲。高明嘅創作，Message會融喺情節同氣氛入面，等觀眾自己感受。香港反而興「講」出嚟，甚至安排角色輪流發表論文式獨白。唔信觀眾識感受，亦唔信自己識用敘事去傳達。每次滿心期望入場，出嚟都得失望。
有時我會懷疑：佢哋明明「手低」都要夾硬「講道理」，係咪純粹為左Noise為左入獎？呢個現象令我諗起之前台灣網民嘅玩笑：繪畫比賽最怕對手畫「一班人手拉手圍住個地球」，因為呢種題材最似「有意義」，評判最容易俾高分。明明技法一般，但主題先行、食正某種政治正確，就可以掩蓋技術上嘅不足。而家嘅香港電影，俾我嘅感覺就係咁。
更令人無奈嘅係輿論環境。
明明一套戲頂多係moderate，全靠同行襯托，正常水準都吹到神作。你講真心話、寫honest review，就被人PUA話「唱衰香港電影」。諷刺嘅係，上映前導演同團隊會走出來叫大家「入場支持本土製作，俾下意見」。到大家真係入場支持、票房好轉，轉個頭呢啲票房就成為左「觀眾嘅肯定」。到最後，真正嘅評價消失哂，剩低只有一面倒嘅吹捧。
有次喺threads碌到過某「神作」逆風但頗中肯嘅評論，最後都係delete post收場。香港電影票房好係喜事，但票房好可以源於好多因素：題材、社會氣氛、Cast、觀眾嘅支持心態，唔等於呢套作品係完美。將商業成績當成藝術成就同品質嘅背書，只係暴露咗自滿同封閉。
可能呢篇野都會有人覺得係唱衰緊香港電影，我一張100蚊既戲飛多一張少一張亦實在微不足道。但愛之深，責之切，正因為對香港電影有期望，先在此不吐不快。
我覺得至少啲對白要似返真人講野嘅pattern已經好好....
我算係電影圈一員，有點覺得呢件事有兩個主因，一係故事每次都serve創作者而唔係serve故事本身同觀眾，二係圍內人太nice，創作期間屌得唔夠金
藝術創作serve返藝術家，所以第一點我尚且理解。
第二點圍內人太Nice、唔忍心講真話，呢啲我都明。但基本功叫得做「基本」，supposedly係擔大旗之前就已經累積好嘅野，無論serve邊個、創作方向點走，都無理由交出「業餘」水準或唔完整嘅作品。
就算唔同觀眾交代，都係對自己專業嘅基本尊重。
我唔係電影人，以前算半個廣告人。商業創作同藝術創作嘅世界，真係唔同到可以閉門造車？
我估你講緊嘅係電影嘅匠氣。呢個連繫返去已經講到冇人講嘅電影業界青黃不接，當年sars同合拍片造成嘅技術斷層一直存在。中庸係常態，但當年啲人至少可以不斷咁通過練習去進步，但依家少咗好多機會去培養。
你講緊嘅「基本」其實非常困難。每一個故事都要由頭建立世界觀同人物，就算係普通劇情片都要。稍一不慎就會變成業餘。
如果大家肯努力屌互相磨練，件事會好啲嘅。但問題係，當大家都知創作係好個人嘅，而你同對方差唔多斤兩，你夠唔夠膽屌佢？你點知你嘅睇法比佢更好？所以大家都互相尊重，出到嚟嘅成品就係依家咁樣。
另外都想補充下第一點。「藝術家」想serve自己嘅話，就唔好怪觀眾唔買帳。想觀眾入場睇，唔該做返服務業，寫啲觀眾想睇嘅野。
啲導演個個睇王家衛羅蘭大，唔知自己只係一個濕鳩，想學啲大師懶有性格，但係就唔識尊重觀眾。
對上一次真心覺得好睇係踏血尋梅，導演是有想法也有執行力，但之後就冇了。
至於政府搞個首部劇情片培訓新導演，可以說完全失敗，嗰啲就係成班以為自己大師實際係nothing嘅人，而且拍出黎嘅戲清一色賣唔出埠
又唔可以咁講，淪落人、年少日記、一念無明都係經首部劇情片出嚟嘅作品
淪落人好明顯嚴重抄考閃亮人生，我覺得呢啲行為比拍爛片更丢架。一念無明已算最好，起碼成個故事完整唔尷尬，但問題係呢啲題材賣唔出，票房都唔會特別好，因為弱勢社群對主流大眾冇咁有共鳴而且故事又冇乜娛樂性，比較似港台節目
一念無名都二千萬票房㗎，當年都算話題之作
其實拍社會議題嘅電影唔係問題，白日之下、年少日記都好睇，講到底都係質素問題
Unpopular opinion：我反而覺得呢個年代港產片質素平均同題材黎講好過以前80-00年代。當然宜家好睇既港片冇以前果啲咁經典，同時以前太多胡鬧爛片什至好多為洗錢而開拍既電影，個人覺得舊港片既下限真係低太多。
宜家問題一來係敵唔過時代既洪流，二來資金缺少，新導演斷層之餘容錯率又極低
雖然睇左幾十年港片但唔識電影
唔知樓主講邊套
但再見ufo真係唔使睇
睇完我同港產片講再見
- 香港電影市場極度委縮，前中後期一致資源極度緊縮，以致質素下降？
- even票房好嘅大商業片，破地獄嗰啲，都係畫出腸金句合集（手拖手圍地球），市場口味可能就係咁？
- 承上，市場本身保守，因此有特定議題、類型片，風格相對保守、冇咁多不可預計嘅個人風格，會相對易pitching，令到創作者本身為咗拍得成都多咗自我約束，成品變得保守，無限loop？
- 香港拎資源就焗住做手拖手圍地球，但想出去外國，香港最易被relate嘅題材都唔拍得，要搵方法去講或者有覺悟地下化，但就難啲喺香港商業市場上？
- 再「藝術」（難以界定）嘅片拎得投資上得戲院都係商業創作，以前可能電影業勁，藝術片蝕咗開套喜劇警匪片又賺返，有個生態平衡，而家難啲有呢回事？
- 例如Jun、金都呢啲都係好好嘅戲，入埋柏林，但香港都唔見得有幾buy
我講幾次真話都比人鬧，話我唔撐香港人、香港電影。啲人講嚟講去都係話：好嘅就要讚，就算唔好嘅亦都唔好鬧
而家我學叻咗，套戲幾差都好，忍咗佢，盡量唔鬧電港電影。而我覺得好多有心人都同我一樣唔想、唔敢提，又睇吓大家都唔鬧、唔提個業界係咪真係會好
仲有啲導演、編劇、影評人，你一話唔好睇，就出嚟屌你話你唔識貨🤡
我覺得UFO佢就好似諗好晒公式，我要講咩講咩，再質三條友落去演繹呢d嘢。三條線中間完全無交集過，去到尾先嚟一個畢業生式搶婚，我睇咗個幾鐘都好難投入到佢地所謂嘅友情？唔講天佑可能唔會想回顧有佢老豆回憶嘅童年，阿sa你搬屋啫，又南又無搬屋間鋪又响度，自細有血癌，咁多年妳自己無諗過上門搵下佢，佢死咗定未死都唔知㗎喎😅
我唔係做呢行，所以我講唔驚冇嘢做，開名舉個例飯氣攻心，明明就係一大段抄咗活地亞倫嘅電影，連個配樂都一樣，雖然我大贊飯氣攻心，但係終歸都係抄襲。我相信睇得明知道嗰段戲嘅人唔止我一個，但係冇人攞出嚟講。咁究竟係真係觀眾水平低落？定係製作團隊大家都圍威喂？評論水平嘅下降，直接影響咗其他日後製作嘅水準。鐵磨鐵先至能夠練出一個刀刃。
老實講，要抄完擺得返落本土接駁到已經係好好既第一步 。 你諗下有幾多套做到..
港產片幾個弊病：
1）對白冇潛台詞，潛台詞直接用作對白
2）想拍得靚，道具靚，人靚。但係忽略左有啲故事要核突先係靚，靚反而令套戲核突。
3）太多角色，有時啲角色其實都只係主角既不同面向但係唔知點解要整多個角色。
4）港產片budget係全世界都係micro-budget，港產片係都要攞住micro-budget做full budget嘢睇落好似好勁咁但係只係內燒。如果唔用arri，唔用咁多crew，拍小故事大理念嘅題材會keep到。（其實好多攞獎外國戲就算有budget都係講緊小人物小故事，只不過係人地搵到一啲小故事係突顯到一啲大題材）
中肯。唔覺得UFO太差，都覺得值得入場支持嘅，但當太多人lip service 話咩近10年最佳香港電影，我就R晒頭 - 講緊近10年嘅香港電影仲有樹大招風、年少日記、窄路微塵、命案 etc 喎？
我批UFO.之後收了聲，
因為我祗係70歲老人家，
可能我唔識欣賞。
但不時有別人有同樣
感覺令我不覺得孤單！
agree，好多都劍指Hitchcock王家衛但最基本storytelling都未講好
作為觀眾唔知點解一定要換位思考幕後嘅人，但好少覺得佢地有換位思考過觀眾，講真我係有錢我係識拍我電影系畢業我一早就去拍電影啦🙊
香港電影新一輩嘅導演，係唔可以比人話，如果唔係佢就會話你呢個係新賬號，跟住就再話你識條鐵，睇返cctvb，所以由佢哋自生自滅，佢哋咁鍾意就睇飽佢啦
啲角色懶係煞有介事咁，質啲似是而非嘅金句出嚟，質滿套戲質飽你；其實好幼稚
黃子華嗰套冚家食飯正正就係你所講既。（please唔好話番俾我聽套戲叫咩名，唔想污染腦袋）
市場係一個好大問題。
如果係英語電影（例如 Heretic），
佢有足夠大巿場，佢可以曲高和寡，
因為點寡都夠冚返條數（製作費）。
要响廣東話市場曲高和寡，除非零成本。
我不是要為任何團隊辯護，我想表達嘅係，或者傳統電影業，唔係想曲高和寡廣東話創作人嘅戰場。
唔係曲高和寡，係本身「曲都唔高」，所以樓主先批評港產片水平。
如果「曲高」，就算本地冇人睇，都可以賣埠，在海外藝術影院市場發展，或者本地累積口碑，從而提升票房。
同意港產片「曲唔高」
我 comment 正正係refer to 曲唔高到底係雞定蛋（chicken or egg)
我覺得都有（both)
我開名。又要寸9 juno套風林山火，自己拍嗰啲片又不見出色，畫面鏡頭為玩而玩⋯我講緊張家輝，佢算唔算眼高手低？
講得好🙌🏻🙌🏻
好想支持本地創作🥹🥹
但而家真係愈嚟愈驚入場睇港產片🙈🙈
愛之深，責之切
如果你既“愛”只帶來傷害，就拜託你不如不愛啦。你愛其他嘢啦。
你首先要明白，你講呢堆嘢係廢話嚟架。你呢番話，N嗰人講過了。
你呢啲就等同有啲阿媽話愛嗰仔，之後話“點解呢度做唔好，嗰度做唔掂，點解唔再努力啲讀書，我話你都係為你好咋........”
你估得你識睇電影，拍嗰啲唔識睇咩
咁我又覺得唔係淨係近幾年先出現，近幾十年嚟不斷都有你講嘅電影，但點都好，會感謝仲入場睇電影嘅人🫶🏻
每個年代都一定有強差人意嘅作品。但當市面上90%以上（甚或更多）都係呢個水準，就令人好憂慮了😔🫶🏻
當Ryan Gosling 都話拯救電影業唔係觀眾嘅責任，而係電影人需要做嘅事，相反香港電影日鳩日同你情緒勒索
本身拍低調係好睇，硬要加流行元素，搞gag搶戲嘅演員
唔識電影唔識製作。睇過極少數嘅作品，我覺得題材hyperlocal係致命傷，令作品欠出口潛力。
上流寄生族係好local咁講一個好global 嘅問題, 香港文藝創作人 -- 甚至係香港人 -- 一般思考香港本地問題有幾可會諗埋同比埋外地有冇面對同樣困難？ 要點樣令非港人易代入同理解? (雖然年少日記有)
應該都起碼6、7年，對上交得出功課嘅新晉導演最有印象係黃俊（？）嘅《一念無明》
近期睇過嘅港產片最好係不赦之罪，節奏好唔造作唔賣慘有中心思想，其他真係難搞。
同時都有唔少人睇都冇睇就插到套戲一文不值 咁都搞唔掂啦 你講嘅「唔信觀眾識感受」我都認同 但係可能咁啱推俾我嘅都係話「唔知佢想講咩」「講得咁隱晦邊個明」
以新導演黎講 正義迴廊真係做得好好
可惜果年金像獎有心打壓班港產片新血
都唔只香港電影，仲有好多嘢都係，明明實力唔得，硬係要吹到天上有地下無，過份盲撐只會令件事衰多兩鑊
新人熱血有想法，惜港片近年製作不多，他們缺乏參與電影拍攝吸收實戰經驗機會。