週二國際賽檔期有3場幾有意思嘅戲碼，打頭陣下晝2點先有中國繼續喺澳洲嘅FIFA系列賽大戰喀麥隆；深夜2點45分有英格蘭主場迎戰日本，兩隊各自為今個夏天的世界盃備戰做準備。較早時於夜晚7點35分開波，中國U23亦會喺西安國際青年足球錦標賽煞科戰硬撼越南U23添！

1️⃣ 3月31日 14:00 喀麥隆 vs 中國

中國上仗喺FIFA系列賽首戰以2:0擊敗庫拉索，韋世豪同張玉寧上下半場各建1功，全場更加令對手0中龍，防守紀律同戰術執行都交足功課。最驚喜係主帥邵佳一首場正式領軍就夠膽出4個U23正選，徐彬同楊希更加係大國腳處子戰，證明今次點兵真係想試吓班新血喺國際賽嘅抗壓能力。

喀麥隆上仗就以0:1不敵東道主澳洲，去到85分鐘先失守。成場波多數時間都係拉鋸狀態，澳洲甚至射失過12碼，最後先靠佐迪保斯尾段致勝。睇返比賽內容，喀麥隆唔算被人㩒住砌，身體對抗同攻守轉換速度都有，只係前線最後一傳同埋門欠缺銳利度。

今場波未必會踢得好開放。中國上仗贏在防線企位穩陣、反擊唔急躁，加上張玉寧喺前場做到支點作用；但喀麥隆身體質素更強，中場埋身肉搏會令國足踢得幾辛苦。另一邊廂，喀麥隆自己攻力亦唔算流暢，面對中國縮後死守兼勤力補位嘅踢法，未必可以輕易撕破防線。中國上場贏波固然振奮士氣，但今場面對喀麥隆嘅高壓逼搶同單兵對抗，考驗肯定大過對住庫拉索。雙方好大機會先求穩陣，入球數字偏細嘅方向更值得捧場。

阿Lo推介：全場入球 2.5細

2️⃣ 4月1日 02:45 英格蘭 vs 日本

英格蘭上仗喺友賽布萊同烏拉圭踢成1:1，賓韋特去到81分鐘接應角球混戰篤入領先，可惜補時階段失守被逼和。賽果事小，最頭痛係英軍踢完之後有唔少人退隊，官方確認包括史東斯、阿當禾頓、馬杜基、迪格蘭賴斯同沙卡等主力都因為受傷或者要返球會檢查而避戰。

日本陣容就完整得多，上仗作客蘇格蘭小勝1:0，伊東純也84分鐘奠定勝局。藍武士上半場已經同對手拉成均勢，換邊後仲創造到更多入波機會。雖然富安健洋因傷退隊對防線有一定影響，但整體戰術框架依然完整。今場係日本足協指定嘅重點熱身賽，擺明車馬會當正路比賽咁搏命。

交手紀錄方面，英格蘭近3次對日本錄得2勝1和保持不敗。不過友誼賽更睇重現時狀態同陣容完整度。英格蘭雖然佔主場之利兼球員質素較高，但中前場多名主力缺陣，進攻組織未必順暢；日本啱啱贏完蘇格蘭士氣正盛，防守層次同走位默契十足，面對強隊亦識得利用陣型同反擊製造威脅。呢類世界盃前嘅試陣大戰，多數重視防守結構多過比數，預計節奏唔會大開大合。

阿Lo推介：全場入球 2.5細

3️⃣ 3月31日 19:35 中國U23 vs 越南U23

中國U23上仗喺西安錦標賽第2輪1:1逼和北韓U23，向余望尾段射入12碼扳平，個人連續2場有波入。國青今次主場出擊，頭2場劇本都好似：首戰對泰國U23落後2球下追和2:2，第2場對北韓又係尾段發力追和。走勢反映球隊韌力十足，但同時暴露咗開局唔夠集中同入局太慢嘅老毛病。

越南U23今次係頂替伊朗參賽，首戰先同北韓踢成1:1，第2場就0:1不敵泰國，最慘係開波短短22秒就已經失守。呢個賽果幾傷士氣，反映球隊攻力不穩之餘，開局專注度亦有極大問題。相反中國U23雖然2戰不勝，但起碼展現到後勁同持續壓迫嘅能力。

今場勝負分野將會落喺中場同邊路爭第二落點。中國U23喺安東尼奧麾下，最大賣點係陣型保持得夠緊湊，落後都唔會自亂陣腳。越南U23一向以體能同爛打見稱，但近兩場可見，一旦被拖入陣地消耗戰，前場最後一傳同埋門質素就會現形。中國U23坐擁主場同體能優勢，仲有連續兩場絕地反擊嘅氣勢，只要今場減少前場無謂失誤，贏面絕對秤先。

阿Lo推介：全場主客和 中國U23



入場及投注人士須年滿十八歲，切勿沉迷賭博。