關於中醫診所賣套票，我想講下呢樣野背後反映緊嘅係啲乜。

套票有好多種，幾百嘅天灸，幾萬嘅治療套票都係。目的都係一樣，就係賺錢。套票可以做到嘅就係，你未用到，但已經俾左錢。係商業入面，錢就係話事權。

當你俾左錢，話事權就係對方度。之後用套票嘅時候，對方做多做少，做成點都好，錢已經袋袋平安。只要唔好差到個客要求退錢。所以點解噤多體驗唔好嘅事件都涉及套票，尤其係套票直接同分成掛勾。

因為對待已經落袋嘅錢同未落袋嘅錢絕對係截然不同嘅心態。當你未俾錢買套票，就會有好多驅使你買嘅野出現。有試做價，有醫師會同你講需要幾多個療程，有sales會根據情況同你講優惠。商家會諗到好多好合理嘅理由。「套為左驅使病人完成成個療程，達到最好效果。」「優惠啲可以慳返啲錢」「用黎綁住個客，唔綁就會去左幫襯第二個。」其實目的都係想你快啲攞多啲錢出黎。

喺大環境唔好，消費降級嘅時候，診所或者係作為生意要有現金流先可以生存落去。而中醫傳統嘅治療模式比較難做到大嘅現金流。病人每次黎到，做針灸理療，或者開中藥5日，7日，或者兩個禮拜，人均消費幾百，個別千幾，而且每日都唔太穩定，受好多因素影響。

中醫個特點係病人黎多幾次，睇多幾次，做多幾次，一黎可以追蹤病人個情況，二黎持續治療個效果都會更加好。但係，現代人都市人最寶貴嘅係時間，就算唔介意俾呢個錢，但要佢黎多幾次，或者日日黎針，針灸點都最少15-20分鐘，佢冇噤多時間。所以好多病人追求快，但內心亦都抹唔走中醫比較慢嘅印象。喺呢個拉鋸中，衍生出套票。佢就好似一個任務進度條，話俾病人知，用曬個套票之後就係完成呢個療程，就會改善到佢個問題。

至於係咪真係改善到，或者治療效果係咪符合預期，就已經係之後嘅事。錢已經到手，要點樣演繹都係睇做嗰個人嘅良心。

原則上對任何套票都很反感，通常會自行爛尾，最後一两次唔做，以免又被sell，所以計算時亦會以8次計單價😂
但從 positive 方面看，買了套票起碼會去幾次，而效果會有少許，好過做一两次閃。