1. HKTV 到底係科研突破，定係管治災難？
最近 HKTV 嗰份全年業績，最爆嘅竟然唔係佢蝕幾多錢，而係王維基突然喺 presentation 入面，拋出一個好似科幻片咁嘅「頭身分離」生命科學項目。根據 1137 香港科技探索 2025 年嘅全年業績報告，佢哋承認呢單嘢已經默默做咗四年，仲話係喺『兩個國家』做。但最弔詭嘅係，由頭到尾份報告都無寫過嗰兩個國家係邊度，亦無講過係邊間大學合作。
見自己吹大左而個個都O晒嘴，HKTV拿拿聲澄出澄清聲明，但都只係不斷強調『符合當地法規』。試諗吓：一間做開超市網購嘅公司，點解會無啦啦走去搞呢啲咁極端嘅科研？
大家最驚嘅都未必係「頭身分離」，而係呢間公司嘅資金運用同管治透明，已經變得肆無忌彈想點就點，完全唔係一間上市公司應有嘅駛錢態度。
2. 主業困局 — 唔救火反而去放煙花
我哋睇返 HKTVmall 嘅老本行，網購，可以用四面楚歌去形容。本地消費降級、大家放假就北上或者飛日本，加上內地電商平台用幾蚊運費就滲透香港，HKTVmall 嗰份業績顯示電商部分仲蝕緊超過三億。
HKTVmall成為香港網購龍頭，可以歸因於「疫情果幾年」。佢地目前主要係靠「貨品種類多」同「香港人網購慣性」支撐住，但論「消費者體驗」，它絕對稱不上是優良，甚至有些不進則退。
搞網購，正常黎講應該係集中火力改善個 App 嘅體驗、搞好物流派送，售後服務，又或者諗吓點樣同內地平台鬥。但關於以上種種，王維基偏偏唔去諗點去完善。
喺佢地平台開檔嘅小商戶都唔好過，佢地賣出一件貨物嘅分成、出貨遲左罰款，以至收取不同形式嘅費用包括廣告費、物流費，加加埋埋條數都唔係人敢品，而且仲要俾晒銷售數據俾平台，但平台從來無承諾唔會用數據嚟同商戶競爭。
當一個電商平台需要靠「壓榨供應方」同「犧牲用戶體驗」去維持帳面數字顏色，通常代表佢地已經遇到瓶頸。喺網購主業火燒眼眉仲走去搞個同主業完全無關仲要燒好多錢嘅生命科學實驗。呢份「驚喜」更加似想轉移大家對主業失利嘅視線。
3. 亂洗錢嘅歷史 — 錢多定唔識用？
如果你話搞科研係「創新」，咁我哋不如回顧吓佢地過去係點樣洗錢。好多香港人都知，佢哋好鍾意喺港鐵站搞「包場式」廣告。唔止一個站，而係每次、個個站、成個月台咁包落嚟。呢啲廣告費貴到嚇死人。
但佢哋個 App 難用，而送貨、客服問題都一路長期存在。基礎建設唔肯投資，但偏偏肯花大錢去買曝光、買掌聲。
好多人一講起王維基，都仲係嗰幾句：轉數快、有諗頭、電訊魔童。呢啲讚美，全部係停留喺回撥長途電話、殺價超人嗰陣嘅陳年往事。
不過又有幾多人敢質疑佢？冇。
因為『大家都要開飯』：廣告公司要接佢嗰啲包晒成個地鐵站嘅大 project，製作公司要接佢啲宣傳片黎拍。
識得欣賞佢『有創意』、『敢諗敢做』就係一張同佢合作、入去分一杯羹嘅『入場券』。
最危險嘅係佢老哥偏偏最鍾意聽呢啲掌聲。寧願花大錢買廣告、買掌聲都唔肯落手落腳執好個 App 嘅 user flow 同物流，全世界都因為利益而唔敢講真話，呢啲本末倒置已經唔單止影響公司管治，甚至影響埋香港成個創業文化，同埋大眾對「創新」、「創科」嘅信心。
4. 投資黑洞 — 英國無人店到街市即日送
除咗廣告，HKTV 過去幾年整咗好多「短命項目」。
例如當年話要去英國開無人店，掉咗一大嚿錢落去，最後無聲無息收咗皮。
又例如搞名牌代購，結果搞出假貨爭議，因為佢根本冇監管貨源嘅能力。
搞分支「Shoalter」，話就話幫不同公司搞網上平台，但同i.t合作搞個壇賣fashion七個月就收檔。
仲有嗰個街市即日送，明明物流成本高，根本冇得同外賣平台鬥，仲要蝕住做。
HKTV好多新項目都有一個共通點：就係投入嘅時候好大聲，但完全冇回報框架，亦都冇退出機制，蝕完就算；大小股東只能夠喺事後睇財報先知，原來又掉咗錢落鹹水海。
5. 捨本逐末 — 對手在乎效率，你卻堅持門店虛榮
王維基當年大舉進駐港鐵站開門店，表面上係增加曝光，實際上係商業邏輯嘅大崩壞。高昂租金嚴重攤薄毛利，已經背離電商「輕資產、低成本」嘅邏輯。而且舖面又細，功能又模糊。
做自提點？如果你買得多，點解唔直接送上屋企？
做零售？嗰啲貨周街都有得賣，甚至隔離超市更平。
賣埋生鮮肉菜？你點同街市鬥平、鬥新鮮？
當王維基仲喺度用『廣告＋昂貴租金』嚟增加負擔，對手已經用緊最頂尖嘅自動化技術兼做埋資源整合。
就好似之前收購咗佳寶嘅京東，佢地真係唔需要喺地鐵站做自提點，反正人哋最值錢嘅係攞咗佳寶嗰套深耕香港多年、極度成熟嘅社區物流同冷鏈資源。當佢地用佳寶遍布屋邨嘅物流網絡嚟送貨。就算佳寶嘅分店唔兼營做埋自提點，滲透率與便利性已遠超HKTVmall。
6. 管理慣性 — 從電視時代就開始嘅「做左再算」
其實王維基呢種「想點就點」嘅風格，由佢當年搞電視已經見到。當年佢大舉挖角，好似簽陳錦鴻咁，簽咗幾年返嚟竟然冇劇拍，出糧畀人但零曝光。
雖然你可以話最後係因為冇牌先拍唔成，但呢種「先簽咗先、到時至算」嘅做法，反映出佢根本冇系統化嘅規劃。
佢享受嘅係嗰種「做大嘢」嘅快感，多過實際去經營一門生意。今日佢突然話要搞生命科學，其實就係當年「亂簽藝人」嘅變奏版，同時亦係好多領導者常見的心理現象──擁有，就有快感。
7. 商業邏輯的「去中心化」 vs. 王維基的「高度集權」
電商的本質是效率與數據，App 多一個步驟、結帳慢一秒，流失的就是真金白銀。
但王維基的風格更像是一個「傳媒人」，肯花大錢賣廣告，卻不肯執好個 App，這反映出他一直以來對「輿論」和影響力的病態追求。
一間公司可以瞞住股東做四年極端實驗，而投資者係到今日先知，聽日佢又可以做出啲咩更離譜嘅事？呢啲唔係創新，呢種叫管治失控。王維基曾經是香港創業精神的代名詞，但如果最後演變成「利用上市資金滿足個人科學幻想」，將會打擊大眾對本地「創科」的信心。
8. 公司私有化與妖股化風險
最後要問，點解「頭身分離」生命科學呢件事會令外界咁大迴響？唔睇倫理道德、動物褔祉，凈係以上市公司管治做大前題。呢間公司咁多年黎都係佢鍾意做乜就做乜，好似完全唔受董事會或者股東制衡敢。
現在的 1137，比起一間電商公司，更像是一間由「魔童」掌舵的、不受監管的私人創投基金，而股東們則是這場豪賭中被動的贊助人。
當一間上市公司嘅價值，唔再係睇業務增長，而係睇創辦人今日嘅心情或者個人興趣，呢間公司就已經具備晒「妖股」嘅特徵：行為不可預測、透明度極低。
上市同私人公司最大嘅分別，就係你每一分錢都要對股東負責交代。但一個涉及生命科學項目可以隱瞞四年，而家 HKTV 給人嘅感覺，係創辦人嘅個人興趣大過一切