Ceci 投稿站#1
Y小姐
*如有不友善，粗俗或冒犯的留言將被刪除*
//曾經有一段時間，我因為情緒徹底失控，主動要求入住精神科病房觀察。
當時我本身做緊一份壓力好大嘅工作，精神狀態已經差到覺得自己根本無辦法再返工。本來只係想去睇醫生攞假紙，點知當我如實講出自己嘅情況之後，醫生就叫我即刻去急症室。去到之後，我照直講返自己嘅狀態，之後院方安排咗人同我做評估，問咗我好多問題，最後問我願唔願意自願入精神科病房觀察，我答應咗。
其實我答應，唔單止因為當時已經返唔到工，而係我真係想知道自己到底發生緊咩事。一直以來，身邊好多人都只會當我係性格敏感、諗太多，從來無人真正同我講過，我可能一直都係有情緒問題，只係無被理解、無被處理。
嗰段時間，我經歷咗感情打擊，加上長期失眠、食唔落、身體狀況愈來愈差，成個人去到一個臨界點。我開始想，或者入院觀察係一個方法，至少可以俾專業人士認真了解我，而唔係再用一句「你減壓啦」就帶過。
但真正入到精神科病房之後，我感受到嘅唔係被接住，而係一種強烈嘅失去自由。同普通病房好唔同，嗰種被監視、被限制、乜都要經人手嘅感覺，令我覺得自己唔似病人，更似一個失去自主權嘅人。嗰種壓迫感令我好想逃走，甚至懷疑自己係咪做錯咗決定。
我明白病房可能有佢哋嘅安全規則，但對一個本身已經情緒崩潰嘅人嚟講，當你喺最脆弱嘅時候，仲要面對冷淡同缺乏尊重嘅對待，個感受真係好難受。唔單止無令我安心，反而令我更想快啲離開。
所以入院冇耐，我就開始主動要求出院。之後我同醫生表達自己狀況好返咗少少，最後成功離開。嗰次經歷令我第一次好深咁意識到，原來當一個人失去對自己狀態嘅掌控，之後好多嘢都唔再由自己決定。
直到而家，我都仲記得嗰種感受。我唔係想否定所有精神科治療，而係想講，對一啲本身已經處於極度脆弱狀態嘅人嚟講，若然制度只剩低控制，而無足夠理解、尊重同人性，嗰種傷害係會好深。
而我亦因為呢次經歷，更加開始反思自己一直以來點樣生活。原來我好多年都習慣咗壓抑自己、犧牲自己、成全別人，表面上好似無事，但其實內裡累積咗好多無人睇見嘅委屈。同埋當你長期被人話敏感、諗多咗，慢慢連自己都會懷疑自己。
及早發覺同治療可以找出答案找到根治方法，不要逃避，勇敢面對。我覺得對
八卦一句，咁你出院再返公司補返假紙，嗰種心理壓力應該好大？因為意味著全間公司都知道自己情緒出現問題.
首先要俾個👍你，你係肯主動同正面去認識，了解自己，搵出自己身體上，心理上同精神上到底出現乜嘢問題，從而搵出正面同正確嘅治療方向，呢個係最重要
身體係我地呢世人最親密同唯一可以去到尾嘅拍檔💪佢識得俾訊號我地話自己唔妥，但係我地都要有一個啱用嘅解碼器先可以讀出個error code係乜嘢，所以你當初求醫係非常正確👍 如果個個人都好似你咁做，根本社會上就會少咗起碼一大半嘅所謂精神病發作相關問題
要怪就怪社會上好多嘢其實仲未完善，尤其係適切去關注精神病人相關嘅醫療服務🙇 其實精神病個範圍好廣泛，唔係淨係精神分裂啊，人格障礙啊，有嚴重暴力傾向甚至有自殺傾向嘅人先係精神病人，思覺失調症，妄想症，情緒病一樣係屬於精神病嘅範疇。
作為醫生，首先係要正確去檢查同分類呢位病友到底係屬於邊個類別嘅症狀，先再安排適切嘅醫療安排，唔係一嚟就有理冇理用高壓管理去處理，依家人地係去求醫唔係入獄，唔係是必要完全將佢同外界隔絕，搞到佢好似囚犯咁，咁搞法明明人地冇暴力傾向都俾你刺激到有啦！
佢係一個非常好嘅榜樣 💪 其實我有一個願景，就係有NGO可以舉辦活動邀請你地用過來人身份喺社區分享呢個資訊，尤其係教育界，社福界嘅從業員要增加呢方面嘅了解，佢地喺接觸病友或者相關照顧者先可以更加設身處地去聆聽對方嘅聲音
通過跟開你case嘅醫護社工(如果有)，或者可靠嘅地區人士，譬如認識嘅區議員/社區幹事，又或者主動聯絡NGO提出都得
因為呢個世代社會壓力係非常大，好多隱形精神病患者自己都未必知道自己有機會出事
加上1月份醫療費用改革之後，通街都多咗有暴力傾向嘅病友因為經濟原因放棄治療，越來越多相關案件發生，其實成個社會都有責任去檢視呢個話題，唔好次次都淨係識得話病友鬧事，只會不斷加深對病友嘅誤解，甚至製造更加多嘅病友出嚟